Расширенный поиск
1 Ноября 2024 года
Логин: Регистрация
Пароль: Забыли пароль?
Навигация
Словарь
  • Сютден ауузу кюйген, суугъа юфгюре эди.
  • Алма терегинден кери кетмез.
  • Ишлегенден, къарагъан уста.
  • Тойчу джашха къарама, къойчу джашха къара.
  • Чыбыкълыкъда бюгюлмеген, къазыкълыкъда бюгюлмей эди.
  • Ишлегенде эринме, ишде чолакъ кёрюнме.
  • Аманны эки битли тону болур, бирин сеннге кийдирир, бирин кеси киер.
  • Чалманны аллы къалай башланса, арты да алай барады.
  • Сабийни джумушха джибер да, ызындан бар.
  • Акъыллы – эл иеси, тели – эл баласы.
  • Окъугъан – асыу, окъумагъан – джарсыу.
  • Адамны джюреги нени кёрюрге сюйсе, кёзю да аны кёрюрге ёч болады.
  • Адамны артындан къара сабан сюрме.
  • Ёлюк кебинсиз къалмаз.
  • Ойнай билмеген, оюн бузар.
  • Юреннген ауруу къалмаз.
  • Бал ашаргъа сюе эсенг, чибин ургъаннга тёз.
  • Къызбайны юйюне дери сюрсенг, батыр болур.
  • Уллу сёлешме да, уллу къаб.
  • Биреуню тёрюнден, кесинги эшик артынг игиди.
  • Кюл тюбюндеги от кёрюнмейди.
  • Эринчекге кюн узун.
  • Суугъа – чабакъ, къаягъа – ыргъакъ.
  • Чомартны къолу берекет.
  • Берекет берсин деген джерде, берекет болур.
  • Арбаз къынгырды да, ийнек сауалмайма.
  • Аш хазыр болса, иш харам болур.
  • Аз айтсам, кёб ангылагъыз.
  • Мени джылытмагъан кюн, меннге тиймесин!
  • Кирсизни – саны таза, халалны – къаны таза.
  • Аман эсирсе, юйюн ояр.
  • Эки итни арасына сюек атма, эки адамны арасында сёз чыгъарма.
  • Башда акъыл болмаса, эки аякъгъа кюч джетер.
  • Тил джюрекге джол ишлейди.
  • Чабар ат – джетген къыз.
  • Байлыкъдан саулукъ ашхыды.
  • Эркишиге тары кебек танг кёрюнюр.
  • Аджал соруб келмез, келсе, къайтыб кетмез.
  • Джерни букъусу кёкге къонмаз.
  • Джарашыу сюйген – джалынчакъ.
  • Джол бла сёзню къыйыры джокъ.
  • Ариу сёз – къылычдан джити.
  • Бал чибинни ургъаны – ачы, балы – татлы.
  • Сангырау къулакъ эл бузар.
  • Миллетни бойну – базыкъ, аны бла кюрешген – джазыкъ.
  • Эр абынмай, эл танымаз.
  • Иги сёз – джаннга азыкъ, аман сёз башха – къазыкъ.
  • Джаш болсун, къыз болсун, акъылы, саны тюз болсун.
  • Айтхан – тынч, этген – къыйын.
  • Суу да къайтады чыкъгъан джерине.

Форум

Форум / Администрация / Билдириуле :: Объявления / Помощь
Страницы: 1 2 3 4 5 След.
ИНЖИ БЮРТЮКЛЕ, Айтхылыкъ фарс тилли назмучуланы фикирлери. Ёлмезланы Мурадин кёчюргенди
 
#1
Джаратама0
24.03.2019 17:28:16 Translit
ИНЖИ БЮРТЮКЛЕ
ФАРС ХАЛКЪ БЛА АНЫ НАЗМУЧУЛАРЫ АЙТХАН АКЪЫЛ (УЧУКЪ) СЁЗЛЕ

Хурметли окъуучу, бу акъыл-учукъ сёзлени окъуп башлардан алгъа, санга бир-эки сёз айтыргъа сюеме. Бу китап – китапла китабыды, кёп айтхылыкъ чыгъармаланы инжи бюртюклеринден тизилген тамаша боюнчакъ. Аны жазгъанла – битеу адам улусуна белгили, фарс тилли шайырла, акъылманладыла – таматалары Рудаки IX-чу, кичилери Бахар а – XX-чы ёмюрде жашагъан. Айтхылкъ шайырла бла бирге, мында белгисиз акъылманланы къачан эсе да бирде айтхан акъыл сёзлери да бардыла. Ёмюрден ёмюрге, аууздан ауузгъа ёте, халкъ аланы бюгюннге дери, сыйлы кёрюп, сакълагъанды. Кесигиз билгенликден, акъыл-учукъ сёзлени бири да – нарт сёзлени да алагъа къошуп – не салым[1], не таза ахыр хакъ тюйюлдю. Кече кюнню ёнгюча[2], хар нени да эки бети-жаны. Бир бир акъыл сёзлени оюмлары, кёз къарамлары уа бизни бюгюннгю ангылауубузгъа чюйре окъуна келеди. Алай анга сейир этерге керек болмаз – андан бери, не азындан, XII ёмюр озгъанды. Алайды да, багъалы окъуучу, китапны ачханса, аны ахырына дери окъуп чыкъсанг, санга саугъа, манга уа насып болур деп умут этеме.

Ёлмезланы Мурадин


[1] Салым – тёре, закон.
[2] Ёнг – затны башха жаны, оборотная сторона.
Изменено: elbars - 24.03.2019 17:29:15
 
 
 
#2
Джаратама0
24.03.2019 17:30:30 Translit
l . ЖАШАУ МАГЪАНАСЫ

*
Адам, къартлыкъ жетип къалгъынчы,
Аны ёлюм женгмез сунады.
Да къуш да бийикде талгъынчы,
Къанат кючюн сёнгмез[1] сунады.
(Кисаи)

*
Жерде жашау сыйлы,
Алай кюнлюкдю.
Андан махтау сыйлы –
Ол – ёмюрлюкдю.
(Фирдоуси)

*
Хау, жалан да от, жауун, боран
Махтаугъа жетдирмейле заран.
(Фирдоуси)

*
Таныкълы[2] алим эсе да ол
Акъылман а болалмаз, кеси
Бармагъан эсе жетмиш да жол,
Туз да, бал да татмагъан эсе.
(Фирдоуси)




[1] Сёнгмез – азаймаз.
[2] Таныкълы – халкъ таныгъан; узнаваемый, известный.
Изменено: elbars - 24.03.2019 17:30:48
 
 
 
#3
Джаратама0
25.03.2019 19:05:31 Translit
*
Хата шо бир кюн бир
Къайтыр иесине,
Азап берир, темир
Бугъоуча, кесине.
(Фирдоуси)

*
Чагъыр бла къызыл къан бир тюйюл.
Аямай тарт, къан ичме ансы.
Салам кибик жанып да къалма, бил:
Сен топракъдан жаратылгъанса.
(Фирдоуси)

*
Тенгим, дуньяда алай жаша,
Тауусулмазлыкъча жашауунг.
Сен ёмюрюнгю алай боша –
Тохтамазлыкъча жашауунг.
(Унсури)

*
Билсин улан да, къарт киши да, хау:
Бирден сора берилмейди жашау.
(Фаррухи)

*
Билмей тургъанлай къадар
Аллай тюйюмчек тюер,
Эталмаз анга мадар
Не уста да. Бош кюер.
(Гургани)
 
 
 
#4
Джаратама0
26.03.2019 17:34:30 Translit

*
Тенг тюйюлдю хар адам да, бил.
Кёрчю, бармакъла да тенг тюйюл.
(Асади Туси)

*
Алай жаша: «Ол итди!» – деп,
Киши къаргъыш этмезча,
Бушууунгда, кюлюмсюреп,
Кёл кенгдирип кетмезча.
(Асади Туси)

*
Кир эсе да суу илипинде,
Сюзюлюр, таза болур, бара.
Не ауур эсе да, бир кюнде
Сау болур кюйюп тургъан жара.
(Асади Туси)

*
Эр эсенг, халкъгъа жарат
Ётюнгю, кючюнг барда.
Кералмазса сен къанат,
Къарт болурса да артда.
(Асади Туси)

*
Ат жоргъалатып бара,
Кетме чал къартны озуп.
Бир кюн, дайым ауара
Къартлыгъынг жетер, тозуп.
(Насир Хосров)
 
 
 
#5
Джаратама0
27.03.2019 19:29:21 Translit
*
Адамгъа сенден татлы,
Багъалы да жокъду жукъ,
Жай эрттенча къууатлы,
Къудретли да азатлыкъ.
(Хакани)

*
Къадар жолун кесип, ары
Кетип тебрегеннге
Жарамайды дарман-дары,
Алсанг да жюз минге.
(Низами)

*
Къарт тюйюлбюз да, къалмаз
Тиймей туманда да кюн.
Биз эталмазлыкъ болмаз
Муратларыбыз ючюн.
(Низами)

*
Да жашау ауур бирде.
Бир тюрленмейди, медет.
Не къыйын ишни да эт,
Жокъ аны тынчы жерде.
(Сузани)

*
Бош жилтин эсе да ол,
Алауган кючю уа бар.
Досум, сен анга сакъ бол
Ансы от салып къояр.
(Аттар)
 
 
 
#6
Джаратама0
28.03.2019 15:55:42 Translit
*
Къажаулукъну оту жана
Башлагъанлай, ёчюр аны.
Жилтин ёртен болуп кетер,
Жарлы ана сыйыт этер.
(Аттар)

*
Алыкъа жашса да, къара
Къартха, кючюн тауусханнга да.
Жашау къыстау кетип бара,
Болушурла жашла санга да.
(Аттар)

*
Ёзгелеге тирмен бурду
Ол жолатлы[1] адам.
Ауур жюк элтгенлей турду,
Кетгинчи дуньядан.
(Аттар)

*
Санга жара салды эсе да,
Зорлукъ этип,
Шугут[2], жара алды кеси да,
Хорлукъ этип.
(Аттар)

*




[1] Жолатлы – кимни сёзюне да ийнаннган, доверчивый.


[2] Шугут – огъурсуз.
 
 
 
#7
Джаратама0
29.03.2019 18:22:15 Translit
*
Уру къазады биреулен, талакъ
Солуу этеди къарангы кече.
Шуёхуна хата-палах биче,
Ол кесине эшеди буугъалакъ.[1]
(Руми)

*
Чалдиш азабында
Тургъан сейир чыпчыкъ,
Къанат азатындан
Билсе эди бир жукъ
Мадар этер эди,
Учуп кетер эди.
(Руми)

*
Амырынг[2] уллуду, кёп,
Бохчангда ахчанг а – аз.
Бош алданма, досум, чёп
Къаягъа тиреу болмаз.
(Руми)

*
Келген кетеди, – хакъ.
Жалан да дуньяда
Жашап турлукъду халкъ
Махтау берген адам.
(Саади)




[1] Буугъалакъ – ат къылдан эшилген ау, аскер керек; боевая сеть из конского волоса.


[2] Амыр – желание.



 
 
 
#8
Джаратама0
30.03.2019 21:34:09 Translit
*
Игиле, аманла да жашап кетдиле,
Игиле – игилик, аманла – аманлыкъ этдиле.
Не къалады да сора, кетсек ёзюбюз?
Ол этген ишибиз, ол айтхан огъурлу сёзюбюз
(Саади)

*
Аякъ тюпде къумурсхадан
Башхамыды халынг?
О, пил басхан жарлы адам,
Алайды амалынг.
(Саади)

*
Сыйлы жерден, къумда кюе,
Азап бла, жети ыйыкъ
Келген эсенг да, ол тюе
Сенден шо жюз кере шыйых.
(Саади)

*
Энди тюнене узакъды,
Тамбла уа жетмей. Бил:
Бизники болгъан – бу чакъды.
Ол да, тенгим, аз тюйюл.
(Саади)

*
«Эрттеги тукъумбуз биз!» – десе,
Махтанып сырсыз, къутсуз,
Айт: «Шо не къадар эски эсе,
Ол къадар инжи мутхуз».
(Саади)
Изменено: elbars - 30.03.2019 21:36:10
 
 
 
#9
Джаратама0
31.03.2019 16:16:33 Translit
*
Адамла бла иги жаша къуру,
Ажалгъа, жетсе, кючюнг къарырча,
Сюегинг чирип, кёрде муру
Болгъанда да адамла бла къалырча.
(Амир Хосров)

*
Кёгетин алама деп,
Терекни эзген,
Экинчи кере, излеп,
Жукъ тапмазса сен.
(Амир Хосров)

*
Жаша, жиляй да къууана.
Жаша толу, кючюнг барда,
Жаша, жашау – къысха. Аны
Къайтаралмазса сен артда.
(Хафиз)

*
Дунья – татлы. Терек бахча чагъады,
Алай сен хаух адамса, хаух – мында.
Къууан сен бюгюн тал ауанагъа да,
Жатып аны жашил салыкъынында.
(Хафиз)
 
 
 
#10
Джаратама0
01.04.2019 18:37:52 Translit
*
Башы чал жаш тюйюл –
Уланча жыр айтмаз.
Юзмез жутхан суу, бил:
Сууканына[1] къаймаз.
(Хафиз)

*
Аз эсе да бюгюнню санга
Бергенин ал, тенгим, табу эт да.
Тюнененг кетгенди туманнга,
Тамбланг а жетмегенди, энтда.
(Ибн Йамин)


*
Сен юйден кюле чыкъсанг,
Ышарыр, кюлюр орам.
Кесинг не деп къычырсанг
Аны къайтарыр бора.[2]
(Джами)

*
Жашау – китап. Тарыкъмай, китапха
Къара, окъу, излеме да сылтау.
Андан жашаууна хайыр тапхан
Адам керти да насыплыды, хау.
(Джами)






[1] Суукан – исток.


[2] Бора – эхо.
 
 
 
#
Джаратама0
  Translit
 
 
 
#11
Джаратама0
02.04.2019 18:40:13 Translit
*
Залимге антлы эсенг да,
Ачыргъа болукъса сен да.
(Джами)

*
Халкъына къарайды хан.
Залими – тёгеди къан.
Сабанчы бла къабан
Бирча сюрмейле сабан.
(Навои)

*
Былай сордум кёпню кёрген къартха:
– Нени санайса эм сыйлы затха?
– Адам баласына акъылды эм сыйлы.
– Акъыл жокъда уа? – Адепни сайла.
– Да ол да жокъ эсе уа, не этгин?
– Болсун алтын, кюмюш ахчанг эркин.
– Жарлы, мискин эсем а, не амал?
– Да сора, досум, жат да ёл да къал.
(Алишах Самарканди)

*
Балалыкъдан чыкъсанг, ёсе,
Баям болур бир зат:
Жаз башы иги эсе,
Сау жыл да – аламат.
(Бинои)
 
 
 
#12
Джаратама0
03.04.2019 17:59:14 Translit
*
Къутсузду юй, суууп эсе тыпыр.
Къара сокъурду гынттылы гыбыр[1].
Тёшек – гулла, жангыз кесинг эсенг а.
Жанжат эсенг а, юй санга – къабыр.
(Бедиль)
*
Биреуню эркинлик сырына
Аз да жетмей эсе зараны,
Ол керти да азатды, аны
Къууанабыз ёхтем жырына.
(Ата сёзле)
*
Да жашау бла азат магъанасы
Бир болгъан, къырал да, жамауат да,
Жашасын къууанч кёрюп, насып
Юлюшлерин табып, не аламат да.
(Ата сёз)
*
Ташдан темир сыкъгъан а, бал
Сыкъгъанча бош тюйюлдю, тынч.
Бир темирден алпха къылыч,
Этди уста, эшекчикге уа – нал.
(Ата сёз)




[1] Гыбыр – гурмук, неуживчивый.
 
 
 
#13
Джаратама0
04.04.2019 09:19:18 Translit
elbars, у меня такой вопрос: перевод с оригинала с фарси или с русского? Если с русского или, если даже переводили с фарси, но есть вариант на русском, хотела попросить выкладывать здесь, чтобы сравнить, как звучит на русском и как звучит на карачаево-балкарском.
Я самая классная на форуме))))))))))))))
 
 
 
#14
Джаратама0
04.04.2019 19:02:39 Translit
Сэстренка, мен орусчадан кёчюреме. ("Истины", Издательство "Наука", Москва, 1968 г. , перевод Наума Гребнева) Гребнев да эркин кёчюргенди, мени кёчюргенлерими да алайгъа санаргъа тийиншлиди. Орусчасын салыргъа заман керекди, интернетде табылса тынч боллукъ эди. Орусча кёчюрмени атлашын сакълап (силлабо-тоника), алай кёчюреме мен. Аны эслеген болурса.
 
 
 
#15
Джаратама0
04.04.2019 19:06:15 Translit
*
Ётер сейир ариу жайнау[1] заман,
Озар, суугъа тохтар да, кериуан.
Юч жыл кетер, жети, сегиз да…
Ызларындан а – кесибиз да.
(Ата сёз)
*
Сен эр эсенг, ёле-къала жашама,
Къама сууур, отха да кир!
Ёмюрюнгю сыйсыз эрлей бошама –
Намысынга къондурма кир!
(Ата сёз)
*
Не дегин жаудан къачып келеген
Баштёбен, сыйсыз жашха,
Намысынг бла бирге ёлгюн
Деп сындыргъандан башха.
(Ата сёз)
*
Этме чал къартны терен
Акъылын сансыз.
Абынчакъ[2] болурса сен,
Шуёхум, ансыз.
(Ата сёз)




[1] Жайнау – жаз башы чагъыу.


[2] Абынчакъ – терк-терк абыныучу.
 
 
 
#16
Джаратама0
05.04.2019 13:17:08 Translit
Цитата
elbars пишет:
Орусча кёчюрмени атлашын сакълап (силлабо-тоника), алай кёчюреме мен. Аны эслеген болурса.
Эшта-эшта, алай терен билимим джокъду поэзия джанындан. Макъамы бирча баргъаннга айта болурсуз алай.
Интернетде табмадым орус тилде.
Я самая классная на форуме))))))))))))))
 
 
 
#17
Джаратама0
05.04.2019 19:46:59 Translit
Сэстренка, назму сыйдам айтылыр ючюн ямб, хорей, дактиль, анапест, амфибрахий дегенча назму атлашала бла жазылыргъа керекди. Алайсыз назму ариу эшитилмейди, кёлден билген да къыйын болады, аны кесигиз кёрюп турасыз. Бюгюнлюкде Малкъарда ёз сыйын билген назмучу силлабо-тоника жорукъ бла жазады назмуларын. Назмучу окъуучусун тергемесе, окъуучу да аны тергемейди. Жарсыугъа, къарачай-малкъар поэзия анга келип турады, бир къауумубуз халны тюзетирге кюрешгенликге. Биз бу жорукъну асыры кеч башладыкъ, Болсада, малкъар поэзияда арт 30 жылны ичинде кёп ахшы назму жазылгъанды.
Изменено: elbars - 05.04.2019 19:51:40
 
 
 
#18
Джаратама0
05.04.2019 19:47:08 Translit
*
Къайтмайды, сакълама, тамаша
Жашлыгъынг. Аны толу жаша.
Къарт гуппур болуп барады жол,
Эшта, жашлыгъын излейди ол.
(Ата сёз)
*
Сен, атынг эсде къалырча, тап жаша,
Сен ахыр сагъатынгы алай боша –
Бу дунья сенден угъай да, сен андан
Къутулгъан кибик, безип отдан, къандан.
(Ата сёз)
*
Къыйын – махтау алгъан,
Палахлагъа къалып.
Аякъ тюбю болгъан,
Кёрдюк, – такъыйкъалыкъ.
(Ата сёз)
*
Терс жол – кенг, иги ойла.
Тюз а – ёр, аны сайла.
(Ата сёз)
*
Кёрге кирди жазыкъ,
Бушуу къалды жерде.
Акъыл-эсге азыкъ
Болады ол бирде.
(Ата сёз)
*
Жыжым юзюлсе – да алай да болады –
Къысабыз, тапсыз тюйюмчег а къалады.
(Ата сёз)
*
Жашау – къыйын: бушуу болады,
Къууанч да – той, байрам, бала.
Ачы кюнлеринги да багъала –
Къайытмазгъа кетедиле ала да.
(Ата сёз)
Изменено: elbars - 05.04.2019 19:52:03
 
 
 
#19
Джаратама0
07.04.2019 00:09:19 Translit

ll . ИШ. ХУНЕР. ТАКЪЫШ[1]


*
Насыпха ишни юсю бла барады жол.
Насыпха элтген жолну салгъан да – къол.
(Абу Шукур)

*
Ишни халын терге алгъа,
Алай а салма болжалгъа.
(Абу Шукур)

*
Кемлик сынамазса, гиреж[2] болуп сен.
Артда, арысанг а – солурса эсен.
(Фирдоуси)

*
Иш бла келеди къолайлыкъ.
Алайсыз жомакъды, тюш – байлыкъ.
(Фирдоуси)

*
Сен, досум, кёл салып
Ишлемесенг, зая
Боллукъду жашауунг,
Заманынгы ая.
(Фирдоуси)




[1] Такъыш – труд.


[2] Гиреж – къажымагъан, настойчивый, настырный.
 
 
 
#20
Джаратама0
07.04.2019 19:56:47 Translit
*
Жарты къойма, ишге сюел танг бла,
Ким биледи не боллугъун тамбла.
(Фирдоуси)

*
Муратынга, сен таймай,
Барып турсанг – жетерсе.
Насыбынгы, тынчаймай,
Табып, къууанч этерсе.
(Фирдоуси)

*
Эрттен, ингир ауур ишде талгъан
Эрни алдамайды къолай.
Жашау бергенине разы болгъан
Тенгим, кимден да сенсе бай.
(Асади Туси)

*
Эринчекге сен не гитче ишчик да бер,
Аны да ол жарты-къурту этип кетер.
(Асади Туси)

*
Мытыр эсенг, къолай жашау этмезсе,
Ташдан кюмюш, къыйналмай, эритмезсе.
(Асади Туси)
Изменено: elbars - 07.04.2019 19:59:21
 
 
 
#21
Джаратама0
08.04.2019 18:35:44 Translit
*
Хошлукъ табаса ишингден.
Хакъы азчыкъ эсе да, ол
Асыуду кёп да, досум, жол
Бара, тапхан кюмюшюнгден.
(Насир Хосров)
*
Къолунг жарашмагъан ишге
Урунма сен – къалырса бедишге.
(Насир Хосров)
*
Усталыкъдан уллу байлыкъ къайда?
Ышангылыды налмасдан да ол.
Излеп да бош кюрешме, жокъду къол
Къыйынынга жетген халал файда.
(Насир Хосров)
*
Къолдан келмез ишни алып
Сен турма дайым къыйналып.
(Насир Хосров)
*
Ашай эсенг биреу салгъан
Тёрекледен, кёгет алып,
Кесинг терек бахча салып,
Башхаланы кёлюн алгъын.
(Масуд Сад Салман)
 
 
 
#22
Джаратама0
09.04.2019 20:01:03 Translit
*
Сен таш тюйюп келесе ингирде:
Къуралыргъа болурса сен алыкъа.
Ташдан алтын къусукъ чыгъып бирде,
Къууаныргъа болурса сен алыкъа.
(Санаи)
*
Мытырлыкъны арты алайды –
Аны басынчакълыкъ малтайды.
(Аттар)
*
Не уллу ишни да ахыры болады,
Да тамчы тама-тама, челек толады.
(Руми)
*
Байлыкъ алтын тюйюл,
Байлыкъ – хунерди.
Дебер сакъал тюйюл,
Акъыл деберди.
(Саади)
*
Алай къыйынды, жарсыуугъа,
Къую къазгъан суусуз жерде.
Иши зыраф болмаз, суугъа
Жетер да къуючу бирде.
(Саади)
 
 
 
#23
Джаратама0
10.04.2019 22:15:30 Translit
*
Атмай тюнене урлукъ,
Эринип къалгъанса,
Тамбыла атарса, жукъ
Алалмазса ансы.
(Саади)
*
Киши жардам[1] этерми деп
Ашырма кюнюнгю.
Хайт де да, сен кесинг сюеп
Къоярса юйюнгю.
(Саади)
*
Тёгерсе да, эринмей, тер,
Бара-бара, шинжи
Гокка болур, тамыр иер,
Чагъар да, чигинжи.
(Саади)
*
Хау, ишле, бош турма –
Ач къалмазса сен.
Дуньяны къыдырмай
Эр болмазса сен.
(Аухададдин Аухади)




[1] Жардам – болушлукъ.
 
 
 
#24
Джаратама0
11.04.2019 16:00:54 Translit
*
Эринчек, кёлсюз да эр
Чогъежлик сууун ичер.
(Амир Хосров)

*
Кючсюнюп, тыкъсып, алай
Тур да сен,
Табалмазса как угъай,
Худур да – сен.
(Хафиз)

*
Итинесе, адыргы чаба,
Сен муратынга.
Сора айландыр аны таба
Досум, атынгы.
(Хафиз)

*
Сен ишле, патчах да, хан да
Жашлыгъынг бирге къадар.
Къарт къуртсуз алма жалан да
Жаш бутакъчыкъда табар.
(Джами)

*
Не чырмау чыкъса да ол,
Эр эсе, кери этеди.
Не къыйын эсе да жол,
Ол муратына жетеди.
(Бедиль)
 
 
 
#25
Джаратама0
12.04.2019 17:23:34 Translit
*
Сёзден ишни ахырына, билебиз, жол
Узакъды: Багъдаддан Ракка дериди ол.


*
Болмайды къолу, буту да
Гыржынны, ашны.
Кёп, игиди да умутуду
Ол мытыр жашны.


*
Кесинги аяп турсанг,
Бор[1] да – турч[2].
Кёлюнгю ишге бурсанг,
Неди – къурч?

*
Аперим гиреж жашха:
Турмайды ахыр да бош.
Гам бола ташы ташха,
Сюелип барады къош.

*
Жигит жигитлигин этер,
Махтау а ызындан жетер.

*
Талмай ишлейик,
Тарыкъмай! Хайда!
«Ишди, иш – дейик, –
Саулукъ, къолай да!».

*
Жетип сабан иши,
Жер къаралтхан киши
Хоншусундан арпа
Тилемейди артда.

*
Гынттылы, сен бош этесе дау.
Иш бла келедиле ыспас, махтау.

*
Не иш да бармаз тири
Аллына къайтып турса.
Бири бир айтып, бири
Башхасын айтып турса.

*
Жаш къыйыкъ салды да биринчи ташны,
Хунасы къынгыр болду жашны.

*
Ишсиз, кючсюз табылгъан –
Желге, суугъа къабылгъан.

*
Жокъду, досум, шинжисиз
Байрымгюл жерде.
Да талан[3] да жокъ ишсиз,
Досум, бил – жерде.




[1] Бор – мел.


[2] Турч – чоюн, чугун.


[3] Талан – удача.
Изменено: elbars - 12.04.2019 17:25:50
 
 
 
#
Джаратама0
  Translit
 
 
 
#26
Джаратама0
13.04.2019 20:10:45 Translit
III. БИЛИМ. АКЪЫЛ. ОКЪУУ

*
Жанаша кёрмезсе сен сырлы
Билимни алтын бла десек
Терс болмабыз. Акъылман – жарлы,
Бай адам а сайды бир кесек.
(Шахид Балхи)

*
Хау, фахму бла билимди
Жюрекге жарыкъ саллыкъ.
Аласыз, бир айтчы, кимди
Бурлукъдан[1] къутулаллыкъ?
(Рудаки)

*
Акъыл кёзю – жютю. Ёмюрледен
Бери адамланы жакълайды.
Къоруйду ол залим бёрюледен,
Аман къылыкъладан сакълайды.
(Абу Шукур)

*
Атынгы билиминг, къаламынг
Узакъгъа айтдыргъанды, болса да,
Акъылман кишини келямын
Сансыз этмегин, бош айтылса да.
(Абу Шукур)




[1] Бурлукъ – невежество.
Изменено: elbars - 13.04.2019 20:11:13
 
 
 
#27
Джаратама0
14.04.2019 17:08:30 Translit
*
Къарангылыгъын билген –
Олду акъылман деген.
(Абу Шукур)

*
Сен юй сала, мурдоруна сакъ бол. –
Оюлургъа боллукъду ол.
(Фирдоуси)

*
Жашауун артха киши къайтаралмаз,
Билимсиз кетер, алим да сау къалмаз.
Билирге уа тийиншлиди хар кимге да:
Къарангы окъуулугъа тенгши болмаз.
(Фирдоуси)

*
Акъылынг жокъда, айыр,
Тынгылагъанынг – хайыр.
(Фирдоуси)

*
Эс этмез жигитге да хата,
Болмаса, ма олду хората.
(Фирдоуси)

*
Чийсил эсе да хапарда
Алыкъа сёлешген сёзю,
Да ачыла кёпге кёзю,
Акъыл кирир, башы барда.
(Фирдоуси)
 
 
 
#28
Джаратама0
15.04.2019 17:48:04 Translit
*
Зат билмеген кёлтен
Этерми жукъ?
Билмез бла ёлген –
Эки жууукъ.
(Асади Туси)

*
Акъылманладан дерсли
Жашса сен. Болса да – шарт
Буду: къарт сенден эсли –
Хау, кёпню кёргенди къарт.
(Асади Туси)

*
Жюз жулдуз да бошду, жаш,
Ай чыкъса, кёрдюк аны.
Жюз да къол этмез бир баш,
Бош, ойнай эталгъанны.
(Гургани)

*
Хурметли алим адам эсенг,
Жашауунг – керти да тынчыракъ.
Жюз сохта окъут да, жюз чыракъ
Жандырырса, алим, сен кесинг.
(Катран)

*
Сен хайт десенг, жазыкъ да, къул да
Болмазса, бурлукъдан къутул да.
(Насир Хосров)
 
 
 
#29
Джаратама0
16.04.2019 19:04:04 Translit
*
Сауут-саба тапхан да тынчды
Билимлиге – къайгъы кёрмез.
Алай а бил: алтын къылыч да
Санга окъуу-билим бермез.
(Насир Хосров)
*
Билим – шуёхха да тюбе,
Жаугъа да тюбе – жардамынгды.
Тапмазса аныча кюбе,
Аныча болмаз адамынг да.
(Насир Хосров)
*
Болсанг да сен бийик,
Биледиле уста:
Эсинг кесинг кибик
Тюйюлдю, ол – госта.
(Насир Хосров)
*
Уллу акъылманды акъыл батманы,
Айтхан сёзю айча, жулдузча жанады.
Таза къошунда болучуду жаланда
Таза, тазана[1] суу, билебиз аны.
(Насир Хосров)




[1] Тазана – прозрачный.
 
 
 
#30
Джаратама0
17.04.2019 18:24:58 Translit
*
Алтын да – бош. Анда
Жокъ тюк тенгли акъыл.
Керти алтын асыл
Къартны акъылында.
(Насир Хосров)
*
Бурлу[1] жашны юсюн-башын жангы
Этип махта, кёкге чыгъар, алай,
Бир айтчы, тенгим, акъылман къалай
Боллукъду ол дорбуча къарангы?
(Насир Хосров)
*
Билимден ёзге
Шо бир зат, бир жукъ
Бермейди бизге
Тауча уллулукъ.
(Насир Хосров)

*
Адепсиз эсе акъыл,
Жокъ аны жарар халы.
Адеплик бла акъыл –
Балжия бла балы.
(Санаи)




[1] Бурлу – невежественный.
 
 
 
Страницы: 1 2 3 4 5 След.
Читают тему (гостей: 1)

Форум  Мобильный | Стационарный