- Тамырсыз терекге таянма – джыгъылырса.
- Рысхы джалгъанды: келген да этер, кетген да этер.
- Джерни букъусу кёкге къонмаз.
- Аман киши кеси юйюнде – къонакъ.
- Тели турса – той бузар.
- Башланнган иш битер, къымылдагъан тиш тюшер.
- Ач да бол, токъ да бол – намысынга бек бол.
- Татлы тилде – сёз ариу, чемер къолда – иш ариу.
- Ашарыкъда сайлагъаннга – чий гырджын.
- Ана къойну – балагъа джандет.
- Арбаз сайлама да, хоншу сайла.
- Ач къарынны, токъ билмез
- Юйюнг бла джау болгъандан эсе, элинг бла джау бол.
- Ат да турмайды бир териде.
- Ёпкелегенни ашы татлы болады.
- Таякъ этден ётер, тил сюекден ётер.
- Кимни – тили, тиши онглу, кимни – къолу, иши онглу.
- Кёбден умут этиб, аздан къуру къалма.
- Аджаллыгъа окъсуз шкок атылыр.
- Кийиминг бла танылма, адамлыкъ бла таныл.
- Окъумагъан сокъурду, сокъур ташха абыныр!
- Кёбге таш атма.
- Ачлыкъ отха секиртир.
- Келгинчи, къонакъ уялыр, келгенден сора, къонакъбай уялыр.
- Къалгъан ишге къар джауар.
- Кёбню кёрген – кёб билир.
- Билимсиз иш бармаз.
- Кёб къычыргъандан – къоркъма, тынч олтургъандан – къоркъ.
- Кенгеш болса, уруш болмаз.
- Тенги кёбню джау алмаз, акъылы кёбню дау алмаз.
- Байлыкъдан саулукъ ашхыды.
- Ачлыкъда тары гырджын халыуадан татлы.
- Ушамагъан – джукъмаз.
- Тойгъа барсанг, тоюб бар, эски тонунгу къоюб бар.
- Бети бедерден, намыс сакълама.
- Келлик заман – къартлыкъ келтирир, кетген заман – джашлыкъ ёлтюрюр.
- Ёлюр джаннга, ёкюл джокъ.
- Аманнга игилик этсенг, юйюнге сау бармазса.
- Адам къыйынлыгъын кёлтюрюр, зауукълугъун кёлтюрмез.
- Халкъны джырын джырласанг, халкъ санга эжиу этер.
- Кёб джашагъан – кёб билир.
- Ариу сёзде ауруу джокъ.
- Иги – алгъыш этер, аман – къаргъыш этер.
- Аманны эки битли тону болур, бирин сеннге кийдирир, бирин кеси киер.
- Олтуруб кёрюнмей эди да, ёрге туруб кёрюне эди.
- Иги бла джюрюсенг, джетерсе муратынга, аман бла джюрюсенг, къалырса уятха.
- Тенгинг джокъ эсе – изле, бар эсе – сакъла!
- Айырылмаз джууугъунга, унутмаз сёзню айтма.
- Гугурук къычырмаса да, тангны атары къалмаз.
- Аууз сакълагъан – джан сакълар.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72