- Игиге айтсанг – билир, аманнга айтсанг – кюлюр.
- Тулпарлыкъ, билекден тюл – джюрекден.
- Иги болса, тамадама – махтау, аман болса, меннге – айыб.
- Чомарт къолда мал къалмаз.
- Джаш болсун, къыз болсун, акъылы, саны тюз болсун.
- Чыбыкълыкъда бюгюлмеген, къазыкълыкъда бюгюлмей эди.
- Ауругъанны сау билмез, ач къарынны токъ билмез.
- Арбаз къынгырды да, ийнек сауалмайма.
- Башы ишлегенни, ауузу да ишлер.
- Харам къарнашдан, халал тенг ашхы.
- Аман адам этегингден тутса, кес да къач.
- Зар адам ашынгы ашар, кесинги сатар.
- Байлыкъ келсе, акъыл кетер.
- Кёзю сокъурдан – къоркъма, кёлю сокъурдан – къоркъ.
- Ач, тоймам, дейди, тойгъан, ач болмам, дейди.
- Садакъачыны джаны – къапчыгъында.
- Тёзген – тёш ашар!
- Керек ташны ауурлугъу джокъ.
- Кеси юйюмде мен да ханма.
- Таукелге нюр джауар.
- Болджал ишни бёрю ашар.
- Эл ауузу – элек, анга ийнаннган – халек.
- Чакъырылмагъан къонакъ тёрге атламаз.
- Джырына кёре эжиую.
- Кесинге джетмегенни, кёб сёлешме.
- Ашлыкъны арба юйге келтирир, чана базаргъа элтир.
- Аууздан келген, къолдан келсе, ким да патчах болур эди.
- Биреуге аманлыкъ этиб, кесинге игилик табмазса.
- Джангыз терек къынгыр ёсер.
- Биреуню эскиси биреуге джангы болмайды.
- Алтыннга тот къонмаз.
- Асхат ашлыкъ сата, юйдегиси ачдан къата.
- Къалгъан ишге къар джауар.
- Акъыл сабырлыкъ берир.
- Аджашханны ызындагъы кёреди, джангылгъанны джанындагъы биледи.
- Бичгенде ашыкъма, тикгенде ашыкъ.
- Уллу сёлешме да, уллу къаб.
- Ашхы тенг джолгъа салыр, аман тенг джолдан тайдырыр.
- Айтылгъан сёз ызына къайтмаз.
- Этим кетсе да, сюегим къалыр.
- Халкъны юйю – туугъан джери.
- Иги адам абынса да, джангылмаз.
- Джумушакъ терекни къурт ашар.
- Узун джолну барсанг, бюгюн келирсе, къысха джолну барсанг, тамбла келирсе.
- Акъыл аздырмаз, билим тоздурмаз.
- Келинин тута билмеген, къул этер, къызын тута билмеген, тул этер.
- Къуллукъчума, деб махтанма, къуллукъ – хаух джамчыды!
- Уллу суу бла уллу ауруудан башынгы сакъла.
- Эл тойса, тоймагъан, эл къойса, къоймагъан.
- Бюгюн дуния кибик, тамбла ахыратды.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72