- Байдан умут эте, джарлыдан ёгюз багъасы къорады.
- Кёб ант этген, кёб ётюрюк айтыр.
- Телиге от эт десенг, юйюнге от салыр.
- Хаухну атма, ёнгкючню сатма.
- Эл бла кёргенинг эрелей.
- Джарлыны эшигин махтагъан джабар.
- Ёксюзню къалачы уллу кёрюнюр.
- Келгинчи, къонакъ уялыр, келгенден сора, къонакъбай уялыр.
- Тойгъандан сора, ашны сёкме.
- Баргъанынга кёре болур келгенинг.
- Насыблы элин сюер, насыбсыз кесин сюер.
- Борчунг бар эсе, хурджунунга ойлаб узал.
- Телиге акъыл салгъандан эсе, ёлгеннге джан салырса.
- Чакъырылмагъан къонакъ тёрге атламаз.
- Сескекли кесин билдирир.
- Таш ата билмеген, башына урур.
- Аманны эки битли тону болур, бирин сеннге кийдирир, бирин кеси киер.
- Билгенни къолу къарны джандырыр.
- Мухарны эси – ашарыкъда.
- Юй кюйдю да, кюйюз чыкъды, ортасындан тюйюш чыкъды.
- Хоншуну тауугъу къаз кёрюнюр, келини къыз кёрюнюр.
- Къууут – джелге, берне – бошха.
- Харам къарнашдан, халал тенг ашхы.
- Эски джаугъа ышанма.
- Азыкълы ат арымаз, къатыны аман джарымаз.
- Къуру гыбыт бек дыгъырдар.
- Джашны джигитлиги сорулур, къызны джигерлиги сорулур.
- Айтханы чапыракъдан ётмеген.
- Къонакъ кёб келюучю юйню, къазаны отдан тюшмез.
- Къызны минг тилер, бир алыр.
- Къарын къуру болса, джюрек уру болур.
- Зар адам ашынгы ашар, кесинги сатар.
- Джылкъыдан – ат чыгъар, тукъумдан – джаш чыгъар.
- Тил бла келеди джыр да.
- Келлик заман – къартлыкъ келтирир, кетген заман – джашлыкъ ёлтюрюр.
- Ургъан суудан башынгы сакъла.
- Къумурсхала джыйылсала, пилни да джыгъадыла.
- Бозанг болмагъан джерге, къалагъынгы сукъма.
- Билген билмегенни юретген адетди.
- Биреуге аманлыкъны тилеме да, кесинге ашхылыкъны тиле.
- Къыз келсе, джумуш эте келеди, къатын келсе, ушакъ эте келеди.
- Юйлю уругъа ит чабмаз.
- Джырына кёре эжиую.
- Суу ичген шауданынга тюкюрме.
- Бети – къучакълар, джюреги – бычакълар.
- Ачыу алгъа келсе, акъыл артха къалады.
- Тойну къарнашы – харс, джырны къарнашы – эжиу.
- Тили узунну, намысы – къысха.
- Ашхы атаны – джашы ашхы, ашхы ананы – къызы ашхы.
- Ёлюк кебинсиз къалмаз.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72