- Ач отунчуну ачыуу – бурнунда.
- Аманнга да, игиге да оноусуз къатышма.
- Аман эсирсе, юйюн ояр.
- Башы ишлегенни, ауузу да ишлер.
- Къызбайны юйюне дери сюрсенг, батыр болур.
- Къыз тиширыу кеси юйюнде да къонакъды.
- Башда акъыл болмаса, эки аякъгъа кюч джетер.
- Эки къатын алгъанны къулагъы тынгнгаймаз.
- Аманны къуугъан, аманлыкъ табар.
- Уясында не кёрсе, учханында аны этер.
- Хантына кёре тузу, юйюне кёре къызы.
- Бозаны арты дауур болур.
- Билмегенинги, билгеннге сор.
- Ариу сёзде ауруу джокъ.
- Кёзю сокъурдан – къоркъма, кёлю сокъурдан – къоркъ.
- Кесине оноу эте билмеген, халкъына да эте билмез.
- Эки къатын алгъан – эки ташны ортасына башын салгъан.
- Игилик игилик бла сингдирилиучю затды.
- Къонакъ болсанг, ийнакъ бол.
- Гырджын – тепсини тамадасы.
- Шапа кёб болса, аш татымсыз болур.
- Суу ичген шауданынга тюкюрме.
- Сёз сёзню айтдырыр.
- Арба аугъандан сора, джол кёргюзтюучю кёб болур.
- Адеби болмагъан къыз – тузсуз хант.
- Экеу тутушса, биреу джыгъылыр.
- Ёлген аслан – сау чычхан.
- Ашда уялгъан – мухар, ишде уялгъан – хомух.
- Кёзюнде тереги болгъан, чёбю болгъаннга кюле эди.
- Къызны минг тилер, бир алыр.
- Босагъагъа джууукъ орун болса, ашыгъыб тёрге озма.
- Джолда аягъынга сакъ бол, ушакъда тилинге сакъ бол.
- Зарда марда джокъ.
- Алгъанда – джууукъ, бергенде – джау.
- Эрине къаргъыш этген къатын, эрнин къабар.
- Aдам боллукъ, сыфатындан белгили.
- Джырчы джырчыгъа – къарнаш.
- Кёлсюзден сёзсюз тууар.
- Дууулдаса – бал чибин, къонса – къара чибин.
- Татлы тилде – сёз ариу, чемер къолда – иш ариу.
- Ашхы сёз таш тешер.
- Аман адам этегингден тутса, кес да къач.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Ариу сёз – къылычдан джити.
- Ариу джол аджал келтирмез.
- Туз, гырджын аша, тюзлюк бла джаша.
- Тёзгеннге, джабылгъан эшик ачылыр.
- Джылар джаш, атасыны сакъалы бла ойнар.
- Адамны сыфатына къарама, сёзюне къара.
- Тилде сюек болмаса да, сюек сындырыр.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72