- Тил – миллетни джаны.
- Джолда аягъынга сакъ бол, ушакъда тилинге сакъ бол.
- Эки элинги тыйсанг, джети элде махталырса.
- Джашда акъыл джокъ, къартда къарыу джокъ.
- Къаллай салам берсенг, аллай джууаб алырса.
- Адеб джокъда, намыс джокъ.
- Сабийликде юретмесенг, уллу болса – тюзелмез.
- Чомарт къолда мал къалмаз.
- Эринчекни эр алмаз, эр алса да, кёл салмаз, кёл салса да, кёб бармаз!
- Джылкъыдан – ат чыгъар, тукъумдан – джаш чыгъар.
- Ариу сёзде ауруу джокъ.
- Ишни аллы бла къууанма да, арты бла къууан.
- Тёзгеннге, джабылгъан эшик ачылыр.
- Акъыллы эркиши атын махтар, акъылсыз эркиши къатынын махтар.
- Суугъа – чабакъ, къаягъа – ыргъакъ.
- Иги бла джюрюсенг, джетерсе муратынга, аман бла джюрюсенг, къалырса уятха.
- Тилчиден кери бол.
- Ашхы тенг джолгъа салыр, аман тенг джолдан тайдырыр.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Башынга джетмегенни сорма.
- Иги джашны ышаны – аз сёлешиб, кёб тынгылар.
- Тай асырагъан, атха минер.
- Джюрекге ариу – кёзге да ариу.
- Къайтырыкъ эшигинги, къаты уруб чыкъма.
- Аурууну келиую тынч, кетиую – къыйын.
- Тик ёргени, тик энгишгеси да болады.
- Бети бедерден, намыс сакълама.
- Айраннга суу къош, телиге джол бош.
- Къонакъ болсанг, ийнакъ бол.
- Эм ашхы къайын ана мамукъ бла башынгы тешер.
- Рысхы – сют юсюнде кёмюк кибикди.
- Кийиминг бла танылма, адамлыкъ бла таныл.
- Ёлген ийнек сютлю болур.
- Таш бла ургъанны, аш бла ур.
- Джарлыны эшигин махтагъан джабар.
- Насыб бютеу халкъны юлюшюдю.
- Харам къарнашдан, халал тенг ашхы.
- Ишленмеген джаш – джюгенсиз ат, ишленмеген къыз – тузсуз хант.
- Бёрю да ач къалмасын, эчки да ашалмасын.
- Ёлген аслан – сау чычхан.
- Сёз сёзню айтдырыр.
- Къобан да къуру да къобханлай турмайды, адам да къуру да патчахлай турмайды.
- Элни кючю – эмеген.
- Кёзюнде тереги болгъан, чёбю болгъаннга кюле эди.
- Эм уллу байлыкъ – джан саулукъ.
- Экеулен сёлеше тура эселе, орталарына барыб кирме.
- Тойгъандан сора, ашны сёкме.
- Урунуу – насыбны анасы.
- Къумурсхала джыйылсала, пилни да джыгъадыла.
- Иги – алгъыш этер, аман – къаргъыш этер.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72