- Чабакъ башындан чирийди.
- Къартха ушагъан джаш – акъыллы, джашха ушагъан къарт – тели.
- Бёрю да ач къалмасын, эчки да ашалмасын.
- Ханы къызы буюгъа-буюгъа киштик болду.
- Ашхы – джыяр, аман – джояр.
- Болджал ишни бёрю ашар.
- Акъыл аздырмаз, билим тоздурмаз.
- Келлик заман – къартлыкъ келтирир, кетген заман – джашлыкъ ёлтюрюр.
- Башланнган иш битер, къымылдагъан тиш тюшер.
- Эли джокъну – кёлю джокъ.
- Ауругъан – джашаудан умутчу.
- Тойгъандан сора, ашны сёкме.
- Ишни ахырын ойламай, аллын башлама.
- Аманны тукъумуна къарама, игини тукъумун сорма.
- Эки элинги тыйсанг, джети элде махталырса.
- Суугъа – таянма, джаугъа – ийнанма.
- Сакъалы текени да бар, мыйыгъы киштикни да бар.
- Ишлегенде эринме, ишде чолакъ кёрюнме.
- Джаханимни кёрмей, джандетге кёл салмазса.
- Халкъны джырын джырласанг, халкъ санга эжиу этер.
- Байлыкъдан саулукъ ашхыды.
- Хазыр ашха – терен къашыкъ.
- Эртде тургъан джылкъычыны эркек аты тай табар.
- Ётюрюкчюню шагъаты – къатында.
- Адамны адамлыгъы къыйынлыкъда айгъакъланады.
- Кийимни бичсенг, кенг бич, тар этген къыйын тюлдю.
- Чабакъгъа акъыл, табагъа тюшсе келеди.
- Къатын къылыкъсыз, эр тынчлыкъсыз.
- Байлыкъ болгъан джерде, тынчлыкъ джокъду.
- Бир онгсуз адам адет чыгъарды, деб эштирик тюлсе.
- Къарт айтханны этмеген, къартаймаз.
- Билим ат болуб да чабар, къуш болуб да учар.
- Керек ташны ауурлугъу джокъ.
- Окъумагъан сокъурду, сокъур ташха абыныр!
- Накъырданы арты керти болур.
- Аманны къуугъан, аманлыкъ табар.
- Хантына кёре тузу, юйюне кёре къызы.
- Сакъ юйюне сау барыр.
- Шапа кёб болса, аш татымсыз болур.
- Тойгъа барсанг, тоюб бар, эски тонунгу къоюб бар.
- Аз сёлешген, къайгъысыз турур.
- Экиндини кеч къылсанг, чабыб джетер ашхам.
- Чомартха хар кюн да байрамды.
- Адамны бетине къарама, адетине къара.
- Тулпарлыкъ, билекден тюл – джюрекден.
- Билимли ёлмез, билимсиз кёрмез.
- Тау башында, тау болмаз, джангыз терек, бау болмаз.
- Къонагъынгы артмагъын алма да, алгъышын ал.
- Къуру гыбыт бек дыгъырдар.
- Биреу къой излей, биреу той излей.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72