- Аз сёлеш, кёб ишле.
- Къая джолда джортма, ачыкъ сёзден къоркъма.
- Ёлген ийнек сютлю болур.
- Кёб ант этген, кёб ётюрюк айтыр.
- Атадан ёксюз – бир ёксюз, анадан ёксюз – эки ёксюз.
- Окъ къызбайны джокълайды.
- Ханнга да келеди хариблик.
- Джаханимни кёрмей, джандетге кёл салмазса.
- Эр сокъур болсун, къатын тилсиз болсун.
- Къонакъны къачан кетерин сорма, къачан келлигин сор.
- Ишлерге уял да, ашаргъа табма.
- Къалгъан ишге къар джауар.
- Эр абынмай, эл танымаз.
- Таш бла ургъанны, аш бла ур.
- Кёб джашагъан – кёб билир.
- Эри аманны, къатыны – аман.
- Ургъан суудан башынгы сакъла.
- Джарлы тюеге минсе да, ит къабар.
- Тели турса – той бузар.
- Биреуге аманлыкъны тилеме да, кесинге ашхылыкъны тиле.
- Адам туугъан джеринде, ит тойгъан джеринде.
- Мал кёб болса, джууукъ кёб болур.
- Керилген да, ургъан кибикди.
- Тамырсыз терекге таянма – джыгъылырса.
- Хар ишни да аллы къыйынды.
- Насыблы элин сюер, насыбсыз кесин сюер.
- Кёз – сюйген джерде, къол – ауругъан джерде.
- Бетинги сатма, малынгы сат.
- Ана къойну – балагъа джандет.
- Татлы тилде – сёз ариу, чемер къолда – иш ариу.
- Элге къуллукъ этмеген, элге ие болмаз.
- Байма, деб да, къууанма, джарлыма, деб да, джылама.
- Тил – миллетни джаны.
- Иги сёз – джаннга азыкъ, аман сёз башха – къазыкъ.
- Тил джюрекге джол ишлейди.
- Байлыкъдан саулукъ ашхыды.
- Эрине къаргъыш этген къатын, эрнин къабар.
- Ишни ахырын ойламай, аллын башлама.
- Ёмюрлюк шохлукъну джел элтмез.
- Ауузу аманнга «иги», деме.
- Эли джокъну – кёлю джокъ.
- Ишин билген, аны сыйын чыгъарады.
- Сууда джау джокъ, кёб сёзде магъана джокъ.
- Къанны къан бла джуума, аманны аман бла къуума.
- Байны къызы баймакъ болса да, юйде къалмаз!
- Адеб базарда сатылмаз.
- Чакъырылгъанны аты, чакъырылмагъанны багъасы болур.
- Къулакъдан эсе, кёзге ышан.
- Тешик этген тынчды, аны джамагъан къыйынды.
- Адамны адамлыгъы къыйынлыкъда айгъакъланады.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72