- Аман хансны – урлугъу кёб.
- Къуру гыбыт бек дыгъырдар.
- «Ёгюз, джаргъа джууукъ барма, меннге джюк боллукъса», - дегенди эшек.
- Намысы джокъну – дуниясы джокъ.
- Джан саулукъ бермей, сан саулукъ бермезсе.
- Сакъ юйюне сау барыр.
- Къан бла кирген, джан бла чыгъар.
- Ауругъанны сау билмез, ач къарынны токъ билмез.
- Адам сёзге тынгыла, акъыл сёзню ангыла.
- Джауумдан сора, кюн кюйдюрюр, ётюрюкден сора, айыб кюйдюрюр.
- Къартны бурнун сюрт да, оноугъа тут.
- Билген билмегенни юретген адетди.
- Акъыл сабырлыкъ берир.
- Эрине къаргъыш этген къатын, эрнин къабар.
- Билим къая тешер.
- Керек ташны ауурлугъу джокъ.
- Айранын берсенг, челегин да къызгъанма.
- Биреу къой излей, биреу той излей.
- Аман адам этегингден тутса, кес да къач.
- Атлыны ашхысы, ат тизгининден билинир
- Рысхысына кёре, джаш ёсер, къышлыгъына кёре, мал ёсер.
- Танг атмайма десе да, кюн къоярыкъ тюйюлдю.
- Биреуню къыйынлыгъы бла кесинге джол ишлеме.
- Таукел къуру къалмаз.
- Татлы сёз – балдан татлы.
- Мен да «сен», дейме, сен да «кесим», дейсе.
- Айтхан сёзюне табылгъан.
- Игилик игилик бла сингдирилиучю затды.
- Джеринден айырылгъан – джети джылар, джуртундан айырылгъан – ёлгюнчю джылар.
- Намыс сатылыб алынмайды.
- Ариу сёз джыланны орнундан чыгъарыр.
- Акъыл аздырмаз, билим тоздурмаз.
- Аман къатын сабий табса, бий болур…
- Магъанасыз сёз – тауушсуз сыбызгъы.
- Уллу сёлешме да, уллу къаб.
- Къарнынг къанлынга кийирир.
- Ишлерге уял да, ашаргъа табма.
- Итли къонакъ джарашмаз.
- Чёбню кёлтюрсенг, тюбюнден сёз чыгъар.
- Арбаз къынгырды да, ийнек сауалмайма.
- Бал – татлы, балдан да бала – татлы.
- Таугъа чыгъаллыкъ эсенг, тюзде къалма.
- Хар зат кесини орнуна иги.
- Киштикге къанат битсе, чыпчыкъ къалмаз эди.
- Насыблы элин сюер, насыбсыз кесин сюер.
- Иги адам абынса да, джангылмаз.
- Башы ишлегенни, ауузу да ишлер.
- Билгенни къолу къарны джандырыр.
- Джумушакъ сёз къаты таякъны сындырыр.
- Экиндини кеч къылсанг, чабыб джетер ашхам.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72