- Джан саулукъ бермей, сан саулукъ бермезсе.
- Къонакъ хазыр болгъанлыкъгъа, къонакъбай хазыр тюлдю.
- Айтылгъан сёз ызына къайтмаз.
- Кечеси – аяз, кюню – къыш, джарлы къаргъагъа бир аш тюш!
- Джолда аягъынга сакъ бол, ушакъда тилинге сакъ бол.
- Айтылгъан буйрукъ, сёгюлмез
- Сабий болмагъан джерде, мёлек болмаз.
- Кёл – къызбай, къол – батыр.
- Айтханы чапыракъдан ётмеген.
- Таш бла ургъанны, аш бла ур.
- Атынг аманнга чыкъгъандан эсе, джанынг тамагъынгдан чыкъсын.
- Оюмсуз атлагъан, аджалсыз ёлюр.
- Кесине оноу эте билмеген, халкъына да эте билмез.
- Ауругъаннга – кийик саулукъ, джетген къызгъа – чилле джаулукъ.
- Мал кёб болса, джууукъ кёб болур.
- Сютден ауузу кюйген, суугъа юфгюре эди.
- Алгъанда – джууукъ, бергенде – джау.
- Шайтан алдады, тюзлюк къаргъады.
- Уллу суу бла уллу ауруудан башынгы сакъла.
- Кесине гебен этелмеген, биреуге черен эте эди.
- Чомарт къолда мал къалмаз.
- Уллу къашыкъ эрин джыртар.
- Кесинге джетмегенни, кёб сёлешме.
- Ашыкъгъанны этеги бутуна чырмалыр.
- Окъумагъан сокъурду, сокъур ташха абыныр!
- Къайтырыкъ эшигинги, къаты уруб чыкъма.
- Къарт болгъан джерде, берекет болур, сабий болгъан джерде, оюн болур.
- Суугъа – таянма, джаугъа – ийнанма.
- Джюрек кёзден алгъа кёрюр.
- Арбаз къынгырды да, ийнек сауалмайма.
- Тынгылагъан тынгы бузар.
- Чалманны аллы къалай башланса, арты да алай барады.
- Тамырсыз терекге таянма – джыгъылырса.
- Кёбден умут этиб, аздан къуру къалма.
- Ачлыкъ отха секиртир.
- Билимсиз иш бармаз.
- Кесинг сынамагъан затны, адамгъа буюрма.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Юйюнг бла джау болгъандан эсе, элинг бла джау бол.
- Таукелге нюр джауар.
- Агъач – джерни чырайы, кийим – эрни чырайы.
- Игини сыйлагъан адетди.
- Джаш къарыу бла кючлю, къарт акъыл бла кючлю.
- Ата Джуртча джер болмаз, туугъан элча эл болмаз.
- Джашынгы кесинг юретмесенг, джашау юретир.
- Тил джюрекге джол ишлейди.
- Сабий кёргенин унутмаз.
- Узун джолну барсанг, бюгюн келирсе, къысха джолну барсанг, тамбла келирсе.
- Ашына кёре табагъы, балына кёре къалагъы.
- Джаным-тиним – окъуу, билим.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72