- Ашлыкъны арба юйге келтирир, чана базаргъа элтир.
- Баргъанынга кёре болур келгенинг.
- Джаралыны джастыгъында сау ёлюр.
- Аманны эки битли тону болур, бирин сеннге кийдирир, бирин кеси киер.
- Терслик кетер, тюзлюк джетер.
- Къатын байлыкъны сюер, эр саулукъну сюер.
- Миллетни бойну – базыкъ, аны бла кюрешген – джазыкъ.
- Акъыл сабырлыкъ берир.
- Къонагъынгы артмагъын алма да, алгъышын ал.
- Аман киши кеси юйюнде – къонакъ.
- Эки итни арасына сюек атма, эки адамны арасында сёз чыгъарма.
- Ашхы атаны – джашы ашхы, ашхы ананы – къызы ашхы.
- Намыс болмагъан джерде, насыб болмаз.
- Сёлеш деб шай берген, тохта деб, сом берген.
- Аман къатын сабий табса, бий болур…
- Биреуню эскиси биреуге джангы болмайды.
- Иги адам абынса да, джангылмаз.
- Билим – акъылны чырагъы.
- Ханнга да келеди хариблик.
- Бек ашыкъгъан меннге джетсин, дегенди аракъы.
- Таугъа чыгъаллыкъ эсенг, тюзде къалма.
- Айранны сюйген, ийнек тутар.
- Аз сёлеш, кёб ишле.
- Билген билмегенни юретген адетди.
- Дуния малгъа сатылма, кесингден телиге къатылма.
- Ауругъаннга – кийик саулукъ, джетген къызгъа – чилле джаулукъ.
- Адебсиз адам – джюгенсиз ат.
- Къарны аманнга къазан такъдырма, къолу аманнга от джакъдырма.
- Ариу сёз джыланны орнундан чыгъарыр.
- Кёлсюзден сёзсюз тууар.
- Ачны эсинде – аш.
- Джукъу тёшек сайламайды.
- Джарашыу сюйген – джалынчакъ.
- Эм ашхы къайын ана мамукъ бла башынгы тешер.
- Байма, деб да, къууанма, джарлыма, деб да, джылама.
- Чомартны къолун джокълукъ байлар.
- Артына баргъанны, къатына барма.
- Къарт бла баш аша, джаш бла аякъ аша.
- Ашын ашагъанынгы, башын да сыйла.
- Чабар ат – джетген къыз.
- Билимден уллу байлыкъ джокъду.
- Ариу сёз – къылычдан джити.
- Бёрю да ач къалмасын, эчки да ашалмасын.
- Ишлегенден, къарагъан уста.
- Окъуу – билимни ачхычы, окъуу – дунияны бачхычы.
- Билмегенинги, билгеннге сор.
- Нафысынгы айтханын этме, намысынгы айтханын эт.
- Къызын тута билмеген, тул этер, джашын тута билмеген, къул этер.
- Киштикге къанат битсе, чыпчыкъ къалмаз эди.
- Бюгюн дуния кибик, тамбла ахыратды.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72