- Мен да «сен», дейме, сен да «кесим», дейсе.
- Къобан да къуру да къобханлай турмайды, адам да къуру да патчахлай турмайды.
- Къанны къан бла джуума, аманны аман бла къуума.
- Тилчиден кери бол.
- Джети тилни билген джети кишиди.
- Айыбны суу бла джууалмазса.
- Адеби болмагъан къыз – тузсуз хант.
- Эрни эр этерик да, къара джер этерик да, тиширыуду.
- Ишлерге уял да, ашаргъа табма.
- Намыс сатылыб алынмайды.
- Джиби бир къат джетмей эди да, эки къат тарта эди.
- Джангыз терек къынгыр ёсер.
- Айтылгъан буйрукъ, сёгюлмез
- Таш ата билмеген, башына урур.
- Ата Джуртуму башы болмасам да, босагъасында ташы болайым.
- Сёз къанатсыз учар.
- Арбаз сайлама да, хоншу сайла.
- Дуния мал дунияда къалады.
- Арбаз къынгырды да, ийнек сауалмайма.
- Сескекли кесин билдирир.
- Хансыз джомакъ болмаз.
- Экеу тутушса, биреу джыгъылыр.
- Ач бёрюге мекям джокъ.
- Къыз келсе, джумуш эте келеди, къатын келсе, ушакъ эте келеди.
- Чомартны къолу берекет.
- Эл элде бирер малынг болгъандан эсе, бирер тенгинг болсун.
- Бал – татлы, балдан да бала – татлы.
- Тойгъан антын унутур.
- Атынг аманнга чыкъгъандан эсе, джанынг тамагъынгдан чыкъсын.
- Джарашыу сюйген – джалынчакъ.
- Ариу – кёзге, акъыл – джюрекге.
- Керилген да, ургъан кибикди.
- Байлыкъ келсе, акъыл кетер.
- Бастасын ашагъан, хантусун да ичер.
- Къыйынлы джети элге оноу этер.
- Огъурлуну сёзю – суу, огъурсузну сёзю – уу.
- Айран ичген – къутулду, джугъусун джалагъан – тутулду.
- Ана кёлю – балада, бала кёлю – талада.
- Сормай – алма, чакъырылмай – барма.
- Адамны аты башхача, акъылы да башхады.
- Мал тутхан – май джалар.
- Суугъа – чабакъ, къаягъа – ыргъакъ.
- Магъанасыз сёз – тауушсуз сыбызгъы.
- Чабакъсыз кёлге къармакъ салгъанлыкъгъа, чабакъ тутмазса.
- Кёб джат да, бек чаб.
- Тил – кесген бычакъ, сёз – атылгъан окъ.
- Чабар ат – джетген къыз.
- Тойчу джашха къарама, къойчу джашха къара.
- Мал кёб болса, джууукъ кёб болур.
- Адам сёзге тынгыла, акъыл сёзню ангыла.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72