- Ёнгкюч къууана барыр, джылай келир.
- Адамгъа аман кюн соруб келмейди.
- Джарлыны эшигин махтагъан джабар.
- Тойгъан джерге джети къайт.
- Джумушакъ сёз къаты таякъны сындырыр.
- Чомартха Тейри да борчлуду.
- Къыйынлы джети элге оноу этер.
- Таукел адам тау тешер.
- Эртде тургъан джылкъычыны эркек аты тай табар.
- Шекер бла туз – бир болмаз, ушамагъан – юй болмаз.
- Насыб бютеу халкъны юлюшюдю.
- Кёзю сокъурдан – къоркъма, кёлю сокъурдан – къоркъ.
- Атадан ёксюз – бир ёксюз, анадан ёксюз – эки ёксюз.
- Огъурлуну сёзю – суу, огъурсузну сёзю – уу.
- Ашда – бёрю, ишде – ёлю.
- Джыгъылгъанны сырты джерден тоймаз.
- Юйюнгден чыкъдынг – кюнюнгден чыкъдынг.
- Арбаз сайлама да, хоншу сайла.
- Хатерли къул болур.
- Ана къойну – балагъа джандет.
- Башсыз урчукъ тюзюне айланмаз.
- Айырылмаз джууугъунга, унутмаз сёзню айтма.
- Къуллукъчума, деб махтанма, къуллукъ – хаух джамчыды!
- Баш – акъыл ючюн, акъылман – халкъ ючюн.
- Кюлме джашха – келир башха.
- Адамны сыфатына къарама, сёзюне къара.
- Чакъырылгъанны аты, чакъырылмагъанны багъасы болур.
- Тили узунну, намысы – къысха.
- Бёрю да ач къалмасын, эчки да ашалмасын.
- Къулакъдан эсе, кёзге ышан.
- Тил – кесген бычакъ, сёз – атылгъан окъ.
- Эркишиге тары кебек танг кёрюнюр.
- Къумурсхала джыйылсала, пилни да джыгъадыла.
- Къайтырыкъ эшигинги, къаты уруб чыкъма.
- Тойну къарнашы – харс, джырны къарнашы – эжиу.
- Сёз садакъдан кючлюдю.
- Тюзлюк шохлукъну бегитир.
- Кимни – тили, тиши онглу, кимни – къолу, иши онглу.
- Байны къызы баймакъ болса да, юйде къалмаз!
- Билимден уллу байлыкъ джокъду.
- Мухар, кеси тойса да, кёзю тоймаз.
- Сыфатында болмагъаны, суратында болмаз.
- Эки къатын алгъанны къулагъы тынгнгаймаз.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Халкъны юйю – туугъан джери.
- Нёгер болсанг, тенг бол, тенг болмасанг, кенг бол.
- Эри аманны, къатыны – аман.
- Байны оноуу, джарлыгъа джарамаз.
- Дуния малгъа сатылма, кесингден телиге къатылма.
- Ана кёлю – балада, бала кёлю – талада.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72