- Къалгъан ишге къар джауар.
- Къартха ушагъан джаш – акъыллы, джашха ушагъан къарт – тели.
- Ёзденликни кёбю ётюрюк.
- Шапа кёб болса, аш татымсыз болур.
- Тиширыусуз юй – отсуз от джагъа.
- Аууздан келген, къолдан келсе, ким да патчах болур эди.
- Ашыкъгъан cуу, тенгизге джетмез.
- Билим ат болуб да чабар, къуш болуб да учар.
- Кёзюнде тереги болгъан, чёбю болгъаннга кюле эди.
- Элге къуллукъ этмеген, элге ие болмаз.
- Иги болса, тамадама – махтау, аман болса, меннге – айыб.
- Тёзген – тёш ашар!
- Малны кют, джерни тюрт.
- Къыз тиширыу кеси юйюнде да къонакъды.
- Чомарт къонакъ юй иесин сыйлар.
- Эринчекге кюн узун.
- Эртде тургъан бла эртде юйленнген сокъуранмаз.
- Ургъан суудан башынгы сакъла.
- Борчунг бар эсе, хурджунунга ойлаб узал.
- Арпа, будай – ащды, алтын, кюмюш а – ташды.
- Тилчи бир сагъатха айлыкъ хата этер.
- Азыгъы аз, алгъа къабар, аты аман, алгъа чабар.
- Тойну къарнашы – харс, джырны къарнашы – эжиу.
- Шекер бла туз – бир болмаз, ушамагъан – юй болмаз.
- Окъдан джара эртде-кеч болса да бителир, сёз джара, ёмюрге къалыр.
- Джол бла сёзню къыйыры джокъ.
- Къарнынг къанлынга кийирир.
- Ойнай-ойнай кёз чыгъар.
- Кёкдеги болмаса, джердегин кёрмейди.
- Аууз сакълагъан – джан сакълар.
- Джауумдан сора, кюн кюйдюрюр, ётюрюкден сора, айыб кюйдюрюр.
- Ашда – бёрю, ишде – ёлю.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Келлик заман – къартлыкъ келтирир, кетген заман – джашлыкъ ёлтюрюр.
- Айтылгъан буйрукъ, сёгюлмез
- Эри аманны, къатыны – аман.
- Дуния малгъа сатылма, кесингден телиге къатылма.
- Намыс сатылыб алынмайды.
- Эл элде бирер малынг болгъандан эсе, бирер тенгинг болсун.
- Тюз сёз баргъан сууну тыяр.
- Къайгъы тюбю – тенгиз.
- Булут кёкге джарашыу, уят бетге джарашыу.
- Ханы къызы буюгъа-буюгъа киштик болду.
- Терек ауса, отунчу – кёб.
- Джарлы эскисин джамаса, къууаныр.
- Бозаны арты дауур болур.
- Къазанчы аман болса, къазаны къайнамаз.
- Аурууну келиую тынч, кетиую – къыйын.
- Гугук кесини атын айтыб къычыргъанча, мен, мен деб нек тураса?
- Ата джурт – алтын бешик.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72