Эльбрусоид :: Форум :: Архив форумов

Байдан умут эте, джарлыдан ёгюз багъасы къорады.
Кёзю сокъурдан – къоркъма, кёлю сокъурдан – къоркъ.
Сыфатында болмагъаны, суратында болмаз.
Тынгылагъан тынгы бузар.
Чабакъгъа акъыл, табагъа тюшсе келеди.
Юйюнгден чыкъдынг – кюнюнгден чыкъдынг.
Биреуню тёрюнден, кесинги эшик артынг игиди.
Айтылгъан сёз ызына къайтмаз.
Ана кёлю – балада, бала кёлю – талада.
Бозанг болмагъан джерге, къалагъынгы сукъма.
Тюкюрюк баш джармаз, налат кёз чыгъармаз!
Тилчиден кери бол.
Иесиз малны бёрю ашар.
Намысы болмагъанны, сыйы болмаз.
Эринчекни эр алмаз, эр алса да, кёл салмаз, кёл салса да, кёб бармаз!
Сибиртки да сыйлы болду, кюрек да кюнлю болду.
Джылар джаш, атасыны сакъалы бла ойнар.
Татлы сёз – балдан татлы.
Окъдан джара эртде-кеч болса да бителир, сёз джара, ёмюрге къалыр.
Эринчекни аурууу – кёб.
Насыб бютеу халкъны юлюшюдю.
Мал кёб болса, джууукъ кёб болур.
Къарт бла баш аша, джаш бла аякъ аша.
Мухарны эси – ашарыкъда.
Эркиши – от, тиширыу – суу.
Эки къатын алгъанны къулагъы тынгнгаймаз.
Сууда джау джокъ, кёб сёзде магъана джокъ.
Къайгъыны сюйген, къайгъы табар.
Къарнынг бла ёч алма.
Адам туугъан джеринде, ит тойгъан джеринде.
Джюрекге ариу – кёзге да ариу.
Атадан ёксюз – бир ёксюз, анадан ёксюз – эки ёксюз.
Мени джылытмагъан кюн, меннге тиймесин!
Эринчекге кюн узун.
Кёзню ачылгъаны – иги, ауузну джабылгъаны – иги.
Джумушакъ терекни къурт ашар.
Кёлю джокъну – джолу джокъ.
Тойгъандан сора, ашны сёкме.
Къонакъ аман болса, къонакъбай джунчур
Окъугъанны бети джарыкъ.
Адеб базарда сатылмаз.
Тойгъан джерге джети къайт.
Ариу – кёзге, акъыл – джюрекге.
Ат да турмайды бир териде.
Къая джолда джортма, ачыкъ сёзден къоркъма.
Биреуню къыйынлыгъы бла кесинге джол ишлеме.
Суугъа – чабакъ, къаягъа – ыргъакъ.
Термилгенинги табмазса, кюлгенинге тюберсе.
Атынг аманнга чыкъгъандан эсе, джанынг тамагъынгдан чыкъсын.
Нарт сёз къарт болмаз.

Логин:
Пароль:
	Запомнить меня на этом компьютере

Забыли свой пароль?
Регистрация