- Айтылгъан сёз ызына къайтмаз.
- Билимсиз иш бармаз.
- Хунаны тюбюн къазсанг, юсюнге ауар.
- Халкъны юйю – туугъан джери.
- Къартны сыйын кёрмеген, къартлыгъында сыйлы болмаз.
- Акъыллы эркиши атын махтар, акъылсыз эркиши къатынын махтар.
- Аш кетер да бет къалыр.
- Джаханимни кёрмей, джандетге кёл салмазса.
- Ашыкъгъан cуу, тенгизге джетмез.
- Ишин билген, аны сыйын чыгъарады.
- Джашынгы кесинг юретмесенг, джашау юретир.
- Джерни букъусу кёкге къонмаз.
- Тил – миллетни джаны.
- Кёзю сокъурдан – къоркъма, кёлю сокъурдан – къоркъ.
- Керти сёзге тёре джокъ.
- Азыкъ аз болса, эртде орун сал.
- Ач уят къоймаз.
- Кёб къычыргъандан – къоркъма, тынч олтургъандан – къоркъ.
- Джаным-тиним – окъуу, билим.
- Билеги кючлю, бирни джыгъар, билими кючлю, мингни джыгъар.
- Ойнай билмеген, уруб къачар.
- Къарнынг бла ёч алма.
- Кютгени беш эчки, сызгъыргъаны уа, джерни джарады.
- Ашхы тенг джолгъа салыр, аман тенг джолдан тайдырыр.
- Джюрекге ариу – кёзге да ариу.
- Кёпюр салгъан кеси ётер, уру къазгъан кеси кетер.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Шайтан алдады, тюзлюк къаргъады.
- Таукел къуру къалмаз.
- Атлыны ашхысы, ат тизгининден билинир
- Къууут – джелге, берне – бошха.
- Ханы къызы буюгъа-буюгъа киштик болду.
- Чёбню кёлтюрсенг, тюбюнден сёз чыгъар.
- Джети тилни билген джети кишиди.
- Сибиртки да сыйлы болду, кюрек да кюнлю болду.
- Этек чакъмакълары баш джаргъан, сёлешген сёзлери таш джаргъан.
- Чомартны къолун джокълукъ байлар.
- Ишни ахырын ойламай, аллын башлама.
- Кёкдеги болмаса, джердегин кёрмейди.
- Таукелге нюр джауар.
- Орну джокъну – сыйы джокъ.
- Адамны аманы адамны бети бла ойнар.
- Мал кёб болса, джууукъ кёб болур.
- Къонакъ аман болса, къонакъбай джунчур
- Арба аугъандан сора, джол кёргюзтюучю кёб болур.
- Нёгерсизни джолу узун.
- Къар – келтирди, суу – элтди.
- Сабыр джетер муратха, сабырсыз къалыр уятха.
- Тынгылагъан тынгы бузар.
- Ач да бол, токъ да бол – намысынга бек бол.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72