- Адамны джюреги нени кёрюрге сюйсе, кёзю да аны кёрюрге ёч болады.
- Ашда – бёрю, ишде – ёлю.
- Уллу къашыкъ эрин джыртар.
- Кёб къычыргъандан – къоркъма, тынч олтургъандан – къоркъ.
- Билмезни кёзю кёрмез, этмезни къулагъы эшитмез.
- Айтхан сёзюне табылгъан.
- Суу ичген шауданынга тюкюрме.
- Намыс болмагъан джерде, насыб болмаз.
- Шайтан алдады, тюзлюк къаргъады.
- Аджалсыз ёлюм болмаз.
- Атлыны кёрсе, джаяуну буту талыр.
- Ач къалгъандан, кеч къалгъан къолай.
- Бозанг болмагъан джерге, къалагъынгы сукъма.
- Кёзден кетген, кёлден да кетеди.
- Тилчи тилден къаныкъмаз.
- Ач отунчуну ачыуу – бурнунда.
- Тамырсыз терекге таянма – джыгъылырса.
- Эки элинги тыйсанг, джети элде махталырса.
- Ачылгъан эт джабылыр, кёрген кёз унутмаз.
- Джангыз терек къынгыр ёсер.
- Ётген ёмюр – акъгъан суу.
- Тили узунну, намысы – къысха.
- Къарт айтханны этмеген, къартаймаз.
- Махтаннган къыз, тойда джукълар.
- Кёбге таш атма.
- Окъугъан озар, окъумагъан тозар.
- Байлыкъдан саулукъ ашхыды.
- Садакъачыны джаны – къапчыгъында.
- Чомарт джарлы болмаз.
- Джиби бир къат джетмей эди да, эки къат тарта эди.
- Ата Джуртуму башы болмасам да, босагъасында ташы болайым.
- Джеринден айырылгъан – джети джылар, джуртундан айырылгъан – ёлгюнчю джылар.
- Ачлыкъ отха секиртир.
- Ариуну – ауруу кёб.
- Таугъа чыгъаллыкъ эсенг, тюзде къалма.
- Къазанны башы ачыкъ болса, итге уят керекди.
- Татлы сёз – балдан татлы.
- Эл элде бирер малынг болгъандан эсе, бирер тенгинг болсун.
- Кимни – тили, тиши онглу, кимни – къолу, иши онглу.
- Алтыннга тот къонмаз.
- Окъумагъан сокъурду, сокъур ташха абыныр!
- Бетинги сатма, малынгы сат.
- Джангызны оту джарыкъ джанмаз!
- Ауурну тюбю бла, дженгилни башы бла джюрюген.
- Ашхы тенг джолгъа салыр, аман тенг джолдан тайдырыр.
- Нафысынгы айтханын этме, намысынгы айтханын эт.
- Эл бла кёргенинг эрелей.
- «Ма», - дегенни билмесенг, «бер», - дегенни билмезсе.
- Къыйынлы джети элни къайгъысын этер.
- Бети бедерден, намыс сакълама.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72