Эльбрусоид :: Форум :: Архив форумов

Ётген ёмюр – акъгъан суу.
Эр абынмай, эл танымаз.
Чыкълы кюнде чыкъмагъан, чыкъса къуру кирмеген.
Артына баргъанны, къатына барма.
Ойнай билмеген, уруб къачар.
Таукел тауну аудурур.
Джашны джигитлиги сорулур, къызны джигерлиги сорулур.
Акъыллы эркиши атын махтар, акъылсыз эркиши къатынын махтар.
Кюл тюбюндеги от кёрюнмейди.
Бермеген къол, алмайды.
Хар ишни да аллы къыйынды.
Къарны аманнга къазан такъдырма, къолу аманнга от джакъдырма.
Келинни – келгинчи, бёркню кийгинчи кёр.
Алгъанда – джууукъ, бергенде – джау.
Ата Джуртуму башы болмасам да, босагъасында ташы болайым.
Экеулен сёлеше тура эселе, орталарына барыб кирме.
Тамбла алтындан бюгюн багъыр ашхы.
Тёзген – тёш ашар!
Эринчекге кюн узун.
Тамчы таш тешер.
Акъыллы айтыр эди, акъылсыз къоймайды.
Айтылгъан сёз ызына къайтмаз.
Адебни адебсизден юрен.
Бозанг болмагъан джерге, къалагъынгы сукъма.
Тойчу джашха къарама, къойчу джашха къара.
Ат да турмайды бир териде.
Чомартха Тейри да борчлуду.
Кёзден кетген, кёлден да кетеди.
Джаш къарыу бла кючлю, къарт акъыл бла кючлю.
Ачлыкъда тары гырджын халыуадан татлы.
Уясында не кёрсе, учханында аны этер.
Тойгъа алгъа да барма, тойда артха да къалма.
Джол бла сёзню къыйыры джокъ.
Эркиши – от, тиширыу – суу.
Тамырсыз терекге таянма – джыгъылырса.
Ата джурт – алтын бешик.
Арба аугъандан сора, джол кёргюзтюучю кёб болур.
Ашхы тенг джолгъа салыр, аман тенг джолдан тайдырыр.
Джарлыны эшигин махтагъан джабар.
Адеб базарда сатылмаз.
Аз сёлешген, къайгъысыз турур.
Тау башында, тау болмаз, джангыз терек, бау болмаз.
Бет бетге къараса, бет да джерге къарар.
Сакъ юйюне сау барыр.
Джашда акъыл джокъ, къартда къарыу джокъ.
Кёбден умут этиб, аздан къуру къалма.
Сабийликде юретмесенг, уллу болса – тюзелмез.
Таш бла ургъанны, аш бла ур.
Тил джюрекге джол ишлейди.
Кимни – тили, тиши онглу, кимни – къолу, иши онглу.

Логин:
Пароль:
	Запомнить меня на этом компьютере

Забыли свой пароль?
Регистрация