- Азыкълы ат арымаз, къатыны аман джарымаз.
- Ауругъанны сау билмез, ач къарынны токъ билмез.
- Ётюрюкчюню шагъаты – къатында.
- Кёзден кетген, кёлден да кетеди.
- Керилген да, ургъан кибикди.
- Къонакъ кёб келюучю юйню, къазаны отдан тюшмез.
- Ишленмеген джаш – джюгенсиз ат, ишленмеген къыз – тузсуз хант.
- Сёз къанатсыз учар.
- Джогъун бар этген, барын бал этген.
- Аурууну келиую тынч, кетиую – къыйын.
- Болджал ишни бёрю ашар.
- Ётюрюкню башын керти кесер.
- Къазанны башы ачыкъ болса, итге уят керекди.
- Тюзлюк тас болмайды.
- Кюл тюбюндеги от кёрюнмейди.
- Чакъырылмагъан къонакъ тёрге атламаз.
- Уллу атлама – абынырса, уллу къабма – къарылырса.
- Термилгенинги табмазса, кюлгенинге тюберсе.
- Эте билген, этген этеди, эте билмеген, юретген этеди!
- Мал ёлсе, сюек къалыр, адам ёлсе, иши къалыр.
- Иги сеники эсе да, сюйген кесимикин этеме.
- Азыкъ аз болса, эртде орун сал.
- От кюйдюрген, сау болса да, тот кюйдюрген, сау болмаз.
- Кёлсюзден сёзсюз тууар.
- Алтыда кюлмеген, алтмышда кюлмез.
- Къар – келтирди, суу – элтди.
- Кенгеш болса, уруш болмаз.
- Ач келгенни – тойдур, кеч келгенни – къондур.
- Зар адамны насыбы болмаз.
- Агъач – джерни чырайы, кийим – эрни чырайы.
- Акъдан къара болмаз.
- Кийиминг бла танылма, адамлыкъ бла таныл.
- Тойгъа алгъа да барма, тойда артха да къалма.
- Ишин билген, аны сыйын чыгъарады.
- Адамны джюреги нени кёрюрге сюйсе, кёзю да аны кёрюрге ёч болады.
- Джангызны оту джарыкъ джанмаз!
- Сакъламагъан затынга джолукъсанг, не бек къууанаса, не бек ачыйса.
- Ариу сёз джыланны орнундан чыгъарыр.
- Тилчиден кери бол.
- Сакъ юйюне сау барыр.
- Ата Джуртуму башы болмасам да, босагъасында ташы болайым.
- Тойгъанлыкъ къойгъа джарашады.
- Къарын къуру болса, джюрек уру болур.
- Къыйынлы джети элни къайгъысын этер.
- Телиге акъыл салгъандан эсе, ёлгеннге джан салырса.
- Арбаз сайлама да, хоншу сайла.
- Аманнга алтын чыдамаз.
- Эшекни не къадар тюйсенг да, ат болмаз.
- Бойнуму джети джерден кессенг да, мен ол ишни этеллик тюлме.
- Биреуню къыйынлыгъы бла кесинге джол ишлеме.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72