- Олтуруб кёрюнмей эди да, ёрге туруб кёрюне эди.
- Эрни эр этерик да, къара джер этерик да, тиширыуду.
- Чомарт къолда мал къалмаз.
- Башынга джетмегенни сорма.
- Этни да ашады, бетни да ашады.
- Тешик этген тынчды, аны джамагъан къыйынды.
- Чакъырылмагъан къонакъ тёрге атламаз.
- Мадар болса, къадар болур.
- Шекер бла туз – бир болмаз, ушамагъан – юй болмаз.
- Айтылгъан сёз ызына къайтмаз.
- Джумушакъ терекни къурт ашар.
- Сабийни джумушха джибер да, ызындан бар.
- Аман къатын сабий табса, бий болур…
- Джахил болса анасы, не билликди баласы?
- Биреу къой излей, биреу той излей.
- Атлыны кёрсе, джаяуну буту талыр.
- Дуния малгъа сатылма, кесингден телиге къатылма.
- Акъдан къара болмаз.
- Эллинг бла джау болсанг да, юйюнг бла джау болма.
- Къарнынг къанлынга кийирир.
- Кийим тукъум сордурур.
- Къошда джокъгъа – юлюш джокъ.
- «Ма», - дегенни билмесенг, «бер», - дегенни билмезсе.
- Керти сёзге тёре джокъ.
- Къарт болгъан джерде, берекет болур, сабий болгъан джерде, оюн болур.
- Чомартны къолу берекет.
- Тойгъан антын унутур.
- Ач, тоймам, дейди, тойгъан, ач болмам, дейди.
- Къонакъ болсанг, ийнакъ бол.
- Таукел къуру къалмаз.
- Юйлю уругъа ит чабмаз.
- Биреуню тёрюнден, кесинги эшик артынг игиди.
- Бети къызарыучу адамны, джюреги харам болмаз.
- Бермеген къол, алмайды.
- Азыкълы ат арымаз, къатыны аман джарымаз.
- Уруну арты – къуру.
- Къонагъы джокъну – шоху джокъ.
- Ишин билген, аны сыйын чыгъарады.
- Бети бедерден, намыс сакълама.
- Билмейме деген – бир сёз
- Айран ичген – къутулду, джугъусун джалагъан – тутулду.
- Кёб ант этген, кёб ётюрюк айтыр.
- Татлы сёз – балдан татлы.
- Бетинги сатма, малынгы сат.
- Кёлсюзден сёзсюз тууар.
- Сакъалы текени да бар, мыйыгъы киштикни да бар.
- Къайгъы тюбю – тенгиз.
- Ач къарынны, токъ билмез
- Айранын берсенг, челегин да къызгъанма.
- Акъыллы эркиши атын махтар, акъылсыз эркиши къатынын махтар.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72