- Акъыл къартда, джашда тюйюлдю – башдады.
- Къошда джокъгъа – юлюш джокъ.
- Аш хазыр болса, иш харам болур.
- Байны оноуу, джарлыгъа джарамаз.
- Келинни – келгинчи, бёркню кийгинчи кёр.
- Кёбге таш атма.
- Акъыл бла адеб эгизледиле.
- Къолунгдан къуймакъ ашатсанг да, атаны борчундан къутулмазса.
- Акъыл аздырмаз, билим тоздурмаз.
- Огъурлуну сёзю – суу, огъурсузну сёзю – уу.
- Шекер бла туз – бир болмаз, ушамагъан – юй болмаз.
- Игиге айтсанг – билир, аманнга айтсанг – кюлюр.
- Эшекге миннген – биринчи айыб, андан джыгъылгъан – экинчи айыб.
- Джюрекден джюрекге джол барды.
- Акъдан къара болмаз.
- Мал кёб болса, джууукъ кёб болур.
- Бюгюн дуния кибик, тамбла ахыратды.
- Айраннга суу къош, телиге джол бош.
- Рысхысына кёре, джаш ёсер, къышлыгъына кёре, мал ёсер.
- Къобан да къуру да къобханлай турмайды, адам да къуру да патчахлай турмайды.
- Тёрдеги кюлсе, эшикдеги ышарыр.
- Хар сёзню орну барды.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Суу да къайтады чыкъгъан джерине.
- Къуллукъчума, деб махтанма, къуллукъ – хаух джамчыды!
- Кесинг сынамагъан затны, адамгъа буюрма.
- «Ёгюз, джаргъа джууукъ барма, меннге джюк боллукъса», - дегенди эшек.
- Ата – баланы уясы.
- Уллу къазанда бишген эт, чий къалмаз.
- Бети бедерден, намыс сакълама.
- Аллахха ийнаннган кишини, Аллах онгдурур ишин.
- Ётген ёмюр – акъгъан суу.
- Ишленмеклик адамлыкъды.
- Тойгъанлыкъ къойгъа джарашады.
- Билим насыб берир, билим джолну керир.
- Адамны сыфатына къарама, сёзюне къара.
- Джашны джигитлиги сорулур, къызны джигерлиги сорулур.
- Тойгъа алгъа да барма, тойда артха да къалма.
- Телиге акъыл салгъандан эсе, ёлгеннге джан салырса.
- Мухардан ач ычхынмаз.
- Тил – кесген бычакъ, сёз – атылгъан окъ.
- Башда акъыл болмаса, эки аякъгъа кюч джетер.
- Къарт бла баш аша, джаш бла аякъ аша.
- Агъач – джерни чырайы, кийим – эрни чырайы.
- Къазанчы аман болса, къазаны къайнамаз.
- Ушамагъан – джукъмаз.
- Бетинги сатма, малынгы сат.
- Рысхы – сют юсюнде кёмюк кибикди.
- Аджаллыгъа окъсуз шкок атылыр.
- Намыс сатылыб алынмайды.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72