- Ашлыкъ – бюртюкден, джюн – тюкден.
- Арыгъан къош чамчы болур.
- Сагъышы джокъ – джукъучу, акъылы джокъ – къаугъачы.
- Ана къолу ачытмаз.
- Адамны сабийин сюйген джюреги, бычакъча, джитиди.
- Мен да «сен», дейме, сен да «кесим», дейсе.
- Элиб деген, элге болушур.
- Биреуню эскиси биреуге джангы болмайды.
- Сабийни джумушха джибер да, ызындан бар.
- Тилчи бир сагъатха айлыкъ хата этер.
- Бастасын ашагъан, хантусун да ичер.
- Эм ашхы къайын ана мамукъ бла башынгы тешер.
- Чёбню кёлтюрсенг, тюбюнден сёз чыгъар.
- Айран ичген – къутулду, джугъусун джалагъан – тутулду.
- Джаханимни кёрмей, джандетге кёл салмазса.
- Дууулдаса – бал чибин, къонса – къара чибин.
- Орундукъ тюбюнде атылсам да, орта джиликме, де да айлан.
- Иши джокъну, сыйы джокъ.
- Ачлыкъда тары гырджын халыуадан татлы.
- Тенгни тенглиги джашай барсанг билинир.
- Кютгени беш эчки, сызгъыргъаны уа, джерни джарады.
- Тёрдеги кюлсе, эшикдеги ышарыр.
- Чакъырылмагъан къонакъ тёрге атламаз.
- Бозанг болмагъан джерге, къалагъынгы сукъма.
- Хаухну атма, ёнгкючню сатма.
- Джаз бир кюнню джатсанг, къыш талай кюнню абынырса.
- Азыкъ аз болса, эртде орун сал.
- Ишни аллы бла къууанма да, арты бла къууан.
- Айырылмаз джууугъунга, унутмаз сёзню айтма.
- Ёнгкюч къууана барыр, джылай келир.
- Кийиминг бла танылма, адамлыкъ бла таныл.
- Ашхы адам – халкъ байлыгъы, ашхы джер – джашау байлыгъы.
- Чомартны къолун джокълукъ байлар.
- Уруну арты – къуру.
- Тил бла келеди джыр да.
- Чомартха Тейри да борчлуду.
- Адам сёзюнден белгили.
- Бир абыннган – минг сюрюнюр.
- Сагъыш – къартлыкъгъа сюйюмчю.
- Джолда аягъынга сакъ бол, ушакъда тилинге сакъ бол.
- Къатын къылыкъсыз, эр тынчлыкъсыз.
- Юйюнг бла джау болгъандан эсе, элинг бла джау бол.
- Къулакъдан эсе, кёзге ышан.
- Чыкълы кюнде чыкъмагъан, чыкъса къуру кирмеген.
- Игилик игилик бла сингдирилиучю затды.
- Алим болгъандан эсе, адам болгъан къыйынды.
- Борчунг бар эсе, хурджунунга ойлаб узал.
- Ашхылыкъ джерде джатмайды, аманлыкъ суугъа батмайды.
- Къарт айтханны этмеген, къартаймаз.
- Эки къатын алгъан – эки ташны ортасына башын салгъан.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72