Хар жыл сайын, жылны эм ариу кезиулеринден биринде - жазда, Тюркде жерлешлерибиз битеу къарачай – малкъарлыла жашагъан элледен бирини сайлап анда жыйыладыла. Заманларын тепсеулерибизге къарай, жырларыбызгъа тынгылай, ойнай – кюле, тепсей, араларында таныша, хал – хатыр сурай зауукълу ётдюредиле. 2012чи жылны аллай кезиую да жууукълашды. Быйыл жерлешлерибиз 30 июньда Афьон Карахисар шахарны Доглат элинде "ТАУЛУЛАНЫ УЛЛУ ЖЫЙЫНЫ" атлы фестиваль ётдюрлюкдюле. Ары Тюркде, Кавказда эм дунияны башха къыралларында жашагъан къарачай – малкъарлыла жыйыллыкъдыла. Халкъны сыйларгъа эм программаны ётдюрюрге быйыл Афьон Карахисарны Къарачай – Малкъар культура эм болушлукъ бирлигине сыра жетгенди. Анга болушханла Тюркде болгъан битеу культура эм болушлукъ бирликлерибиз боллукъдула.
30 июньда бизден барып, жыйыннга къошулургъа сюйгенлени да сабырсызлыкъ бла сакълагъанларын билдирирге сюедиле.
