Къарачай-Черкесияны башчысы быйылны Ана тил бла литератураны джылы этиб баямлагъаны себебли «Эльбрусоид» ана тил бла литературагъа аталгъан декаданы бардырады. Ёсюб келген тёлюню ана тил культурасын байындырыргъа, миллет тил-дин дегенча затладан фахмулу джаш адамланы ачыкъларгъа джораланган декаданы «Эльбрусоидни» биргесине Къарачай шахарны округуну администрациясыны билим бериу управлениеси, КъЧКъУ-ни къарачай эмда ногъай кафедралары, Сюйюнчланы Азамат атлы шахар библиотека бардырадыла.
Декаданы кёзюуюнде Къарачай шахарны округуну школларыны сохталары «Ана тилим- джаным-тиним»деген темагъа конкурс сочинение джазарыкъдыла. «Таурухчу акка» деген къарачай-малкъар таурухланы персонажлары болуб кёрлюкдюле, гитче спектакльчикле салыб кёргюзюрюкдюле сахнада. «Эм билимли сохта» деген номинацияда диктант джазарыкъдыла. Ана тиллеринде назмула джазгъанланы, иги окъугъанланы араларында да конкурсла бардырыллыкъдыла.
Декада уллу фестиваль бла тамамланныкъды. Андан сора, сохталаны джыйыб, Сюйюнчланы Азаматны юйюнде ачылгъан музейге къонакъгъа барыллыкъды.

Февралны 12-ден башлаб Къарачай шахарны округуну школларыны сохталары «Ана тилим- джаным-тиним» деген темагъа конкурс сочиненияла джазыб, офисге келтиредиле. Бюгюнлюкде 20- дан артыкъ сочинение барды. Биринчи орунну алгъан сочинение «Эльбрусоидни» статьяла деген бёлюмюнде чыгъарыкъды.