АЛЛАХ АЙТСА


Бек кёблени ийнамлары тас болуб,
Аугъандыла, къобалмайла чырт ёрге.
Намыслыла бюгюн тамам аз болуб,
Бетсиз къауум чыгъыдыла чинг тёрге.

Белгисизлик къалайлагъа элтеди?
Къайда, къачан тауусулур къыйын джол?
Джаш джюрегим тесукъа да этеди,
Кёл этеме мен кесиме: «Джигит бол!..

Джюрегибиз таукелликге ачылыб,
Кюреш этсек кийикликни джыгъарбыз.
Тёгерекни басхан тубан чачылыб,
Аллах айтса, джарыкъ кюннге чыгъарбыз!»

БЮГЮННЮ СУРАТЛАРЫ


Дамсыз джашау! Джюрекледе басым джокъ…
Радио да аны айтыб кюрешед.
Бек кёблени билгенлери – бычакъ, окъ,..
Бош зат ючюн биреу бир бла ёчешед.

Сыйсыз сёзле джесирлейле орамны,
Ариулукъгъа табынмайды бюгюн кёз.
«Хахай-туай» джутад ариу макъамны,
Кимге керек ариу сурат, акъыл сёз?!

Эшитмейле бир-бирлерин адамла,
Иннетлерин айталмайла эсеблеб.
Бедиш эте болурламы аламла
Бизге къараб: «Бютюн кийиклесиз!» – деб.

СОРУУЛА БЛА ДЖУУАБЛА


- Кимсе, бир айт, не игилик этгенсе?
Къарайма да, бек уллугъа кетгенсе…

- Аманлагъа кёре, мен а, тамамма,
Кертисича айтсакъ, бир тюз адамма –
Адамланы джарсыуларын кёреллик,
Керек болса, онгсузгъа къол береллик.
Ол джигитлик тюлдю, шохум, бил аны,
Ол борчуду джерде хар бир инсанны.
Аны ючюн излемейик биз махтау.
Болушдум деб, чырт салмайыкъ артда дау.

- И-й, кимлеге юретесе сен акъыл,
Болмагъанча чыртда сенден бир такъыл?

- Аманлагъа кёре, мен а, тамамма,
Шыйыхлагъа кёре, бир тюз адамма!