| Сюймекликден
Къутулурча бир мадар…
Анга нёгер
Болуб туру къыйынды.
Сюйген адам -
Багъылмазлыкъ джаралы,
Сагъышлары -
Сыртда джанлы джыйынды. *** Сабыр джауа
Тургъан къаргъа къарайма,
Кёзлеримча
Чыракъ кетгенд джаным да,
Мен кесиме
Бир ёлюкча кёрюндюм,
Чабмай эди,
Сууугъан эд къаным да. *** Не этесе
Тансыкъ болуб термилсенг
Сюймекликни
Эм насыблы кюнюне,
Мыллыкъ атса
Джаныг, чыдаб болалмай,
Эртде ётген
Джашлыгъынгы тёрюне? *** Сюймекликни
Эм насыблы кюнюне,
Сени кёрген
Хар кюнюмю санаем.
Кече, кюн да
Сен эдинг да сагъышым,
Сени кёрсем,
Кууанч отда джанаем. *** Энди сени
Кёрюрге да тапмайма…
Къаллай сезим
Берилгенед саугъагъа!
Анны ючюн
Кюрешмедик, къарамай,
Джашау кесген
Кемсиз уллу багъагъа. *** Ауру берген
Сюймекликни отундан,
Сейир тюлмюд,
Кесим сюйюб ичеме;
Анны тюрлю
Халисине тюзелмей,
Отдан чыгъыб,
Джалынына киреме. *** Бу кёпледен
Къалгъан дуния менден да
Къалырына
Къыйналмайма аллай бир,
Къыйналгъанча,
Болмазына джазыуум, джангылып да,
Сенники бла чыртда бир.
*** Кёкню къоюб
Учхан джулдузлай, сёзюнг
Джюрегиме
Къууанч болуб тюше эд.
Узакъ кетсенг,
Олсагъатлай, тансыкълаб,
Мени джаным
Сени кемсиз кюсей эд. *** Джарыкъ сёзню,
Джылы сёзню, сакъ сёзню,
Сынгар кере
Эштирге да табмайма.
Сени кёрсем,
Къурман болуб, къор болуб,
Мен да сеннге,
Алгъынча, баш атмайма. *** Не болду да,
Къайдан келди сансызлыкъ?
Къыш келгенча,
Джай иссиде элиме.
Кёкню къоюб
Учхан джулдузлай, сёзюнг,
Къууанч болуб,
Нек тюшмейд джюрегиме? *** Чапракъ артыб,
Джалан болгъан терегим
Джангур такъгъан
Тамчыланы агъызад.
Кюн кюсеген,
Къачхы джерлей, джюрегим,
Сени кюсеб,
Тансыкъларгъа ашыгъад.
Ашыгъады
Джылла кетмей арадан,
Джангыз кюн бла
Джангыз кече кетгенча.
Сен да меннге
Юлюш этиб джанынгдан,
Биягъынлай,
Сюйюб, кемсиз этгенча.
| *** Джокъду мадар
Джазыуунга кирирге,
Тёлесем да
Сау дунияны багъасын;
Кечинмесем,
Джокълай тургъан болмаса,
Джокълагъанча
Толкъун тилсиз джагъасын.
Не сезгенин
Билдирмеген джагъадан
Тенгиз шашмай,
Къалай джырлаб турады?
Сеннге керек
Болмай эсе джюрегим,
Тохтаб къалмай
Ол неликге урады?! *** Джангызлыкъдан
Къачар джеринг болмаса,
Мыдахлыкъгъа
Кезиу дженгил джетеди.
Джазгъы джулдуз
Кёкню бауурун тешиб,
Тешген джерин
Отча джарыкъ этеди.
Джулдузну да
Кёзюм сюймей кёреди,
Хар саным да,
Къоргъашынлай бир ауур.
Мени джаным
Сарнагъанча бир джел бла,
Бек керек эд
Бюгюн меннге буз джангур. *** Мыдахлыкъны
Кёб тюрлюсю болады,
Бюгюннгю уа -
Джаным чыгъа тургъанча.
Джазыуум да
Болгъан джолуму кесиб,
Хар къалайда
Меннге къабхан къургъанча.
Джангыз сени
Джетеригед къарыуунг,
Мыдахлыкъны
Булутларын чачаргъа,
Джан къалдырлыкъ,
Сюйген джаным, табылмай,
Нек къаласа
Къууанч эшик ачаргъа? *** Джолум башха, джолунг башха болса да,
Иги сезим
Джюрегимден кетмесин.
Боранлагъан
Танг эсе да сюймеклик,
Танг - умутду,
Аллах ансыз этмесин! *** БЮГЮНЛЮКДЕ Джазыу эрише,
Насыб гиреше,
Бузча сууукълукъ
Джерге илеше. Ауру, чалпыу да
Халкъгъа къатыла,
Джаш тёлюсю да
Ишсиз атыла. Намыс къаласы
Оюла кетгенд,
Тин байлыгъы да
Ёлюрге джетгенд. Хар не заты да
Бирча джарсыуулу,
Улху бералгъан
Джашайд асыулу. Окъуу да, не да
Сатылыб алынад.
Билимсиз дуппукъ
Ишге салынад. Уятлы - ачды,
Бетсиз а - токъду.
Миллетге джаны
Ауругъан джокъду. Анны къачындан
Къоркъгъан кёрюнмейд. Анны ючюн деб,
Джукъу бёлюнмейд. Ёрге ёрлеген -
Кеси къайгъылы,
Кёлюне джетмей,
Джыртхан байлыгъы. Кечинед миллет
Кесине база,
Ышанмакълыгъы
Кюн-кюнден аза. Бюгюннгю - базар,
Тамбласы - базар.
Боллукъмуд ХАЛКЪГЪА
Бир башха мадар? *** |
Комментариев нет