Садакъчы клуб къуралгъанды
29.03.2016
0
3151
Мындан алда, мартны 19-да, Карачаевск шахаргъа Дагъыстандан садакъ тартыуну усталары келиб, «Развитие лучного спорта в СКФО» деген проектни ышыгъы бла мастер-класс кёргюзюб кетдиле.
Садакъ тартыу бизни кавказ миллетледе бурундан бери джюрюген затды. Бюгюнлюкде ол спорт оюннга бурулгъанды, кеси да кенгден кенг джайылыб барады. Анга шагъат биз башында айтхан иш. Аны къурагъанла «Эдельвейс» атлы садакъчы клуб эмда Къарачай-Черкес кърал университет болгъандыла. Бу иш спортну джангыртыр, айнытыр, мындан ары миллетде кенг джаяр нюзюр бла бардырылгъанды. Дагъыстандан келген садакъ атыучу устала 2015-чи джыл бу проектлери бла «Машук» деген джаш тёлю форумда хорлаб, энди аны ШКФО-ну регионларында джайыб кюрешедиле. Бу джол кёзюу бизни республикагъа джетгенди.
- Бу спорт къралла арасында Олимпиячы оюнлагъа къошулгъаны себебли, биз ётген джыл «Муртазек» деб спорт-патриот клуб къурагъанбыз. Кавказ миллетлени арасында садакъ тартыу спортну джангыртыргъа, айнытыргъа муратыбыз барды. Бюгюннге дери быллай дерсле бла Къабарты-Малкъаргъа, Чеченнге, Ингушетиягъа баргъанбыз. Къарачай-Черкес Республикагъа да сюйюб келгенбиз. Быллай бир джаш адам джыйылыб, тынгылаб, юренирге излегенлерине бек къууанабыз. Бу спорт бла кюрешген адамны саулугъу тюзеледи: эси ачыкъ, сагъышы дженгил, кёзю джити, билеги кючлю, саны субай болады, - деб хапар айтды Мирзоев Магомед-Ариф, «Развитие лучного спорта в СКФО» деген проектни башчыларыны бири.
Садакъ тартхан бизни миллетни да къанындады. Аны ючюн болур, гитче сабийледен башлаб уллу адамлагъа дери, джаяны юсюнден хапаргъа да тынгылаб, андан сора университетни спорт залында садакъ тартыб чыкъгъандыла.
- Бизге Дагъыстандан къарнашларыбыз, тенглерибиз дерс берирге, садакъны юсюнден хапар айтыргъа келгендиле. Эски шохларыбыздыла, нёгерлерибиздиле. «Машук» деген форумда танышхан эдик. Биз да Карачаевск шахарда «Эдельвейс» деген садакъчы клубну болушлукъгъа тартыб, нёгерлерибизни да Дагъыстандан чакъырыб, университетде да, республикада да бу спортну джангыртыр, айнытыр умут бла джыйылгъанбыз. ШКФО-ну бютеу республикаларына барыб, дерс бериб бошагъандан сора, эришиу къураргъа муратыбыз барды. Ол эришиуге биз да неге юреннгебизни кёргюзюрге барлыкъбыз. Ары дери быллай джыйылыуларыбыз энтда боллукъдула, - деб хапар айтады бу джыйылыуну къурагъанланы бири Ёзденланы Ибрагим да – Къарачай-Черкес кърал университетни экономика эмда управление факультетини деканыны заместители.
2015-чи джыл джаз бизни республикада Карачаевск шахарда, «Эльбрусоид» фондну болушлугъу бла «Эдельвейс» деб садакъчы спорт клуб къуралгъанды. Клубну тамадасы Бостанланы Рамазан аны ишини юсюнден хапар айтды.
- Бир джылны мындан алгъа бизни шахаргъа Дагъыстандан бюгюннге дери садакъ атхан спорт бла кюрешиб, юретиб, дерсле бериб тургъан къарнашларыбыз келген эдиле. Ала бизге ишлерини юсюнден толу хапар айтыб, биргелерине келтирген тюрлю-тюрлю джаялары бла садакъларындан атаргъа да юретиб кетген эдиле. Андан сора джаш тёлюбюз, джыйылыб, клуб къурар мурат бла республикабызда «Эльбрусоид» фондну филиалыны тамадасы Къараланы Азретге болушлукъ излеб баргъан эдик. Бир айны ичинде Азрет бизге кереклиси чакълы бир садакъ джаяла табыб бериб, клубну ишин башларгъа себеблик этгенди. Ол кюнден бери клуб ишлейди. Бизге юренирге джюрюгенлени ичинде студентле да, школ окъуучула да бардыла. Иш былай барса, официал халда клуб неда федерация къураргъа да умутубуз барды.
Клубну тамадасы айтхандан, садакъ тартыудан дерслеге къуру джашчыкъла болмай, къыз сабийле да джюрюйдюле. Ыйыкъны ичинде алагъа аталгъан энчи дерс кюнле бардыла.
Бу сейир спорт оюн бизде джайыла барлыкъ болур. Алай болса уа, бизни джашларыбыз бла къызларыбыз, аны юсю бла уллу эришиулеге къошула, республиканы атын айтдырырла деб ышанабыз.
Гаджаланы Назифат,
Черкесск
Комментариев нет