Киштикге къанат битсе, чыпчыкъ къалмаз эди.
Бет бетге къараса, бет да джерге къарар.
Ач – эснер, ат – кишнер.
Тил – миллетни джаны.
Джети тилни билген джети кишиди.
От этилмеген джерден тютюн чыкъмайды.
Алим болгъандан эсе, адам болгъан къыйынды.
Биреуге аманлыкъ этиб, кесинге игилик табмазса.
Экиндини кеч къылсанг, чабыб джетер ашхам.
Таукел тауну аудурур.
Билеги кючлю, бирни джыгъар, билими кючлю, мингни джыгъар.
Къыз келсе, джумуш эте келеди, къатын келсе, ушакъ эте келеди.
Ач уят къоймаз.
Телиге акъыл салгъандан эсе, ёлгеннге джан салырса.
Джылкъыдан – ат чыгъар, тукъумдан – джаш чыгъар.
Билимден уллу байлыкъ джокъду.
Тёрени джагъы джокъ.
Байма, деб да, къууанма, джарлыма, деб да, джылама.
Узун джолну барсанг, бюгюн келирсе, къысха джолну барсанг, тамбла келирсе.
Къан бла кирген, джан бла чыгъар.
Сагъышы джокъ – джукъучу, акъылы джокъ – къаугъачы.
Накъырданы арты керти болур.
Ашхылыкъ джерде джатмайды, аманлыкъ суугъа батмайды.
Тели турса – той бузар.
Азыкълы ат арымаз, къатыны аман джарымаз.
Юйюнгден чыкъдынг – кюнюнгден чыкъдынг.
Джылыгъа джылан илешир.
Къралынгы – душмандан, башынгы от бла суудан сакъла.
Ашыкъгъан cуу, тенгизге джетмез.
Къарт болгъан джерде, берекет болур, сабий болгъан джерде, оюн болур.
Ургъан суудан башынгы сакъла.
Аджаллыгъа окъсуз шкок атылыр.
Тёрдеги кюлсе, эшикдеги ышарыр.
Джарлыны эшигин махтагъан джабар.
Таш ата билмеген, башына урур.
Аманны къуугъан, аманлыкъ табар.
Бал – татлы, балдан да бала – татлы.
Джаз бир кюнню джатсанг, къыш талай кюнню абынырса.
Айырылгъанланы айю ашар, бёлюннгенлени бёрю ашар.
Къолунгдан къуймакъ ашатсанг да, атаны борчундан къутулмазса.
Кийимни бир кюнню аясанг, минг кюннге джарар.
Кёл – къызбай, къол – батыр.
Къызбайны юйюне дери сюрсенг, батыр болур.
Башсыз урчукъ тюзюне айланмаз.
Борчунг бар эсе, хурджунунга ойлаб узал.
Джангыз терек къынгыр ёсер.
Бозанг болмагъан джерге, къалагъынгы сукъма.
Эки итни арасына сюек атма, эки адамны арасында сёз чыгъарма.
Къонакъ кёб келюучю юйню, къазаны отдан тюшмез.
Чыбыкълыкъда бюгюлмеген, къазыкълыкъда бюгюлмей эди.
