Термилгенинги табмазса, кюлгенинге тюберсе.
Джангыз терек къынгыр ёсер.
Аурууну келиую тынч, кетиую – къыйын.
Джыланны къуйругъундан басарынг келсе, аны башы болгъанын унутма.
Сёз сёзню айтдырыр.
Джырына кёре эжиую.
Чакъырылмагъан къонакъ – орунсуз.
Аманнга игилик этсенг, юйюнге сау бармазса.
Акъыллы айтыр эди, акъылсыз къоймайды.
Аджашхан тёгерек айланыр.
Джарлы джети элни сёзюн этер.
Джарлы тюеге минсе да, ит къабар.
Сабыр джетер муратха, сабырсыз къалыр уятха.
Олтуруб кёрюнмей эди да, ёрге туруб кёрюне эди.
Джарашыу сюйген – джалынчакъ.
Уллу атлама – абынырса, уллу къабма – къарылырса.
Дуния малгъа сатылма, кесингден телиге къатылма.
Кюлме джашха – келир башха.
Сютню башын джалагъан къутулур, тюбюн ичген тутулур.
Къазанны башы ачыкъ болса, итге уят керекди.
Бек анасы джыламаз.
Ауругъаннга – кийик саулукъ, джетген къызгъа – чилле джаулукъ.
Таш бла ургъанны, аш бла ур.
Джетген къыз джерли эшекни танымаз.
Арбаз къынгырды да, ийнек сауалмайма.
Мал тутхан – май джалар.
Тулпарлыкъ, билекден тюл – джюрекден.
Акъылсызны джууукъгъа алма, акъыллыны кенгнге салма.
Джарлы эскисин джамаса, къууаныр.
Ашхы сёз таш тешер.
Эринчекге кюн узун.
Адамны бетине къарама, адетине къара.
Тойну къарнашы – харс, джырны къарнашы – эжиу.
Айыбны суу бла джууалмазса.
Кеси юйюмде мен да ханма.
Уясында не кёрсе, учханында аны этер.
Акъыл бла адеб эгизледиле.
Кёзню ачылгъаны – иги, ауузну джабылгъаны – иги.
Бюгюн дуния кибик, тамбла ахыратды.
Адам боллукъ, атламындан белгили болур.
Джерни букъусу кёкге къонмаз.
Джолда аягъынга сакъ бол, ушакъда тилинге сакъ бол.
Билмейме деген – бир сёз
Ата Джуртун танымагъан, атасын да танымаз.
Биреуню эскиси биреуге джангы болмайды.
Арбаз сайлама да, хоншу сайла.
Биреу къой излей, биреу той излей.
Къыз чыгъаргъан – къызыл къымжа.
Ётюрюк хапар аякъ тюбю бла джюрюйдю.
Телини эшигин, махтау джабар.
