Чакъырылмай келген къонакъ сыйланмай кетер.
Билими азны – ауузунда кирит.
Иги бла джюрюсенг, джетерсе муратынга, аман бла джюрюсенг, къалырса уятха.
Сютден ауузу кюйген, суугъа юфгюре эди.
Чабакъ башындан чирийди.
Нарт сёз къарт болмаз.
Аллахдан тилесенг, кёб тиле.
Адебсиз адам – джюгенсиз ат.
Мухардан ач ычхынмаз.
Кёзю сокъурдан – къоркъма, кёлю сокъурдан – къоркъ.
Байлыкъ тауусулур, билим тауусулмаз.
Ишин билген, аны сыйын чыгъарады.
Джумушакъ сёз къаты таякъны сындырыр.
Ач, тоймам, дейди, тойгъан, ач болмам, дейди.
Кёпюр салгъан кеси ётер, уру къазгъан кеси кетер.
Къая джолда джортма, ачыкъ сёзден къоркъма.
Тешигини къатында, чычхан да батыр болур.
Къыз чыгъаргъан – къызыл къымжа.
Акъдан къара болмаз.
Джылар джаш, атасыны сакъалы бла ойнар.
Уллу сёлешме да, уллу къаб.
Ётюрюкню къуйругъу – бир тутум.
Аман къатын алгъан, арыр, иги къатын алгъан джарыр.
Къанны къан бла джуума, аманны аман бла къуума.
Джети тилни билген джети кишиди.
Бек анасы джыламаз.
Биреу ашаб къутулур, биреу джалаб тутулур.
Халкъны джырын джырласанг, халкъ санга эжиу этер.
Ёксюзню къалачы уллу кёрюнюр.
Эл тойса, тоймагъан, эл къойса, къоймагъан.
Рысхы – сют юсюнде кёмюк кибикди.
Сютню башын джалагъан къутулур, тюбюн ичген тутулур.
Кёзюнде тереги болгъан, чёбю болгъаннга кюле эди.
Къонакъ болсанг, ийнакъ бол.
Къуллукъчума, деб махтанма, къуллукъ – хаух джамчыды!
Керек ташны ауурлугъу джокъ.
Намыс сатылыб алынмайды.
Джарлыны эшигин махтагъан джабар.
Ойнай билмеген, оюн бузар.
Аллахха ийнаннган кишини, Аллах онгдурур ишин.
Акъыл къартда, джашда тюйюлдю – башдады.
Бичгенде ашыкъма, тикгенде ашыкъ.
Къызын тута билмеген, тул этер, джашын тута билмеген, къул этер.
Кирсизни – саны таза, халалны – къаны таза.
Кийимни бир кюнню аясанг, минг кюннге джарар.
Таукелге нюр джауар.
Келгинчи, къонакъ уялыр, келгенден сора, къонакъбай уялыр.
Огъурлуну сёзю – суу, огъурсузну сёзю – уу.
Тил – кесген бычакъ, сёз – атылгъан окъ.
Кёз – сюйген джерде, къол – ауругъан джерде.
