Этек чакъмакълары баш джаргъан, сёлешген сёзлери таш джаргъан.
Алма терегинден кери кетмез.
Миллетни бойну – базыкъ, аны бла кюрешген – джазыкъ.
Кёбню кёрген – кёб билир.
Кийимни бир кюнню аясанг, минг кюннге джарар.
Джети тилни билген джети кишиди.
Тили узунну, намысы – къысха.
Бал – татлы, балдан да бала – татлы.
Намыс сатылыб алынмайды.
Джангыз торгъай джырламаз.
Суу ичген шауданынга тюкюрме.
Къызгъанчдан ычхыныр, мухардан ычхынмаз.
Ёзденликни кёбю ётюрюк.
Эм уллу байлыкъ – джан саулукъ.
Аман къатын алгъан, арыр, иги къатын алгъан джарыр.
Къуру гыбыт бек дыгъырдар.
Аджашханны ызындагъы кёреди, джангылгъанны джанындагъы биледи.
Азыкълы ат арымаз, къатыны аман джарымаз.
Къонакъ аз олтурур, кёб сынар.
Уллу сёлешме да, уллу къаб.
Элге къуллукъ этмеген, элге ие болмаз.
Акъыллы – эл иеси, тели – эл баласы.
От этилмеген джерден тютюн чыкъмайды.
Ата Джуртча джер болмаз, туугъан элча эл болмаз.
Джашынгы кесинг юретмесенг, джашау юретир.
Иги адам абынса да, джангылмаз.
Берекет берсин деген джерде, берекет болур.
Игиге айтсанг – билир, аманнга айтсанг – кюлюр.
Джахил болса анасы, не билликди баласы?
Мураты болгъанны джюрек тебюую башхады.
Айтхан – тынч, этген – къыйын.
Баланы адам этген анады.
Окъугъан озар, окъумагъан тозар.
Аман адам элни бир-бирине джау этер.
Ургъан суудан башынгы сакъла.
Ашхы атаны – джашы ашхы, ашхы ананы – къызы ашхы.
Игини сыйлагъан адетди.
Окъдан джара эртде-кеч болса да бителир, сёз джара, ёмюрге къалыр.
Тик ёргени, тик энгишгеси да болады.
Бал ашаргъа сюе эсенг, чибин ургъаннга тёз.
Нарт сёз къарт болмаз.
Терслик кетер, тюзлюк джетер.
Байлыкъ тауусулур, билим тауусулмаз.
Къарыусузгъа кюлме, онгсузгъа тийме.
Къарт айтханны этмеген, къартаймаз.
Джукъу тёшек сайламайды.
Тенгинг джокъ эсе – изле, бар эсе – сакъла!
Ёлген ийнек сютлю болур.
Джашда акъыл джокъ, къартда къарыу джокъ.
Акъыл аздырмаз, билим тоздурмаз.
