Сормай – алма, чакъырылмай – барма.
Ёзденликни кёбю ётюрюк.
Чакъырылгъанны аты, чакъырылмагъанны багъасы болур.
Билими азны – ауузунда кирит.
Эл тойса, тоймагъан, эл къойса, къоймагъан.
Ашыкъгъанны этеги бутуна чырмалыр.
Къартны бурнун сюрт да, оноугъа тут.
Тамырсыз терекге таянма – джыгъылырса.
Ариу джол аджал келтирмез.
Къонакъ хазыр болгъанлыкъгъа, къонакъбай хазыр тюлдю.
Чакъырылмай келген къонакъ сыйланмай кетер.
Ата – баланы уясы.
Ашатыргъа иш – ашхы, ишлетирге аш – ашхы.
Джумушакъ сёз къаты таякъны сындырыр.
Тойчу джашха къарама, къойчу джашха къара.
Къралынгы – душмандан, башынгы от бла суудан сакъла.
Адамны аты башхача, акъылы да башхады.
Байлыкъ келсе, акъыл кетер.
Тенгни тенглиги джашай барсанг билинир.
Эркиши – от, тиширыу – суу.
Аманны тукъумуна къарама, игини тукъумун сорма.
Ариуну – ауруу кёб.
Къуру гыбыт бек дыгъырдар.
Эркишини аманы тиширыуну джылатыр.
Мухардан ач ычхынмаз.
Къая джолда джортма, ачыкъ сёзден къоркъма.
Олтуруб кёрюнмей эди да, ёрге туруб кёрюне эди.
Аджашхан тёгерек айланыр.
Бети – къучакълар, джюреги – бычакълар.
Зар адамны насыбы болмаз.
Джол бла сёзню къыйыры джокъ.
Ёлюр джаннга, ёкюл джокъ.
Биреуге аманлыкъ этиб, кесинге игилик табмазса.
Къарнынг бла ёч алма.
Аз сёлешген, къайгъысыз турур.
Азыгъы аз, алгъа къабар, аты аман, алгъа чабар.
Сютню башын джалагъан къутулур, тюбюн ичген тутулур.
Джылыгъа джылан илешир.
Тиширыусуз юй – отсуз от джагъа.
Аз сёлеш, кёб ишле.
Огъурлуну сёзю – суу, огъурсузну сёзю – уу.
Ёлген аслан – сау чычхан.
Зар адам ашынгы ашар, кесинги сатар.
Айран ичген – къутулду, джугъусун джалагъан – тутулду.
Таш бла ургъанны, аш бла ур.
Чабар ат – джетген къыз.
Джыланны къуйругъундан басарынг келсе, аны башы болгъанын унутма.
Башланнган иш битер, къымылдагъан тиш тюшер.
Чомартха хар кюн да байрамды.
Аз айтсам, кёб ангылагъыз.
