- Эки ойлашыб, бир сёлешген.
- Тенги кёбню джау алмаз, акъылы кёбню дау алмаз.
- Джылыгъа джылан илешир.
- Ач къарным, тынч къулагъым.
- Тин – байлыгъынг, терен саулугъунг.
- Акъдан къара болмаз.
- Къайгъыны сюйген, къайгъы табар.
- Башланнган иш битер, къымылдагъан тиш тюшер.
- Ачылгъан эт джабылыр, кёрген кёз унутмаз.
- Этни бети бла шорпасы.
- Хата – гитчеден.
- Аманны эки битли тону болур, бирин сеннге кийдирир, бирин кеси киер.
- Хазыр ашха – терен къашыкъ.
- Тешик этген тынчды, аны джамагъан къыйынды.
- Башынга джетмегенни сорма.
- Ёпкелегенни ашы татлы болады.
- Дженгил джетерикме деб, узун джолну къоюб, къысхасын барма.
- Этни да ашады, бетни да ашады.
- Алтыда кюлмеген, алтмышда кюлмез.
- Кёб джашагъан – кёб билир.
- Билимсиз иш бармаз.
- Тилсиз миллет джокъ болур.
- Ургъан суудан башынгы сакъла.
- Азыкълы ат арымаз, къатыны аман джарымаз.
- Джаханимни кёрмей, джандетге кёл салмазса.
- Къанны къан бла джуума, аманны аман бла къуума.
- Аман киши кеси юйюнде – къонакъ.
- Ышармагъан – кюлмез, кюлмеген – къууанчны билмез.
- Тюзлюк шохлукъну бегитир.
- Мухарны эси – ашарыкъда.
- Окъугъан – асыу, окъумагъан – джарсыу.
- Экиндини кеч къылсанг, чабыб джетер ашхам.
- Бастасын ашагъан, хантусун да ичер.
- Къызбайны юйюне дери сюрсенг, батыр болур.
- Бек ашыкъгъан меннге джетсин, дегенди аракъы.
- Юйюнгден чыкъдынг – кюнюнгден чыкъдынг.
- Ач къарынны, токъ билмез
- Окъуу – билимни ачхычы, окъуу – дунияны бачхычы.
- Къызгъанчдан ычхыныр, мухардан ычхынмаз.
- Ашхы болсанг, атынг чыгъар, аман болсанг, джанынг чыгъар.
- Урама да – ёледи, сатама да – келеди.
- Сууда джау джокъ, кёб сёзде магъана джокъ.
- Ач, тоймам, дейди, тойгъан, ач болмам, дейди.
- Игилик игилик бла сингдирилиучю затды.
- Къыз чыгъаргъан – къызыл къымжа.
- Къазанны башы ачыкъ болса, итге уят керекди.
- Ауругъаннга – кийик саулукъ, джетген къызгъа – чилле джаулукъ.
- Тамырсыз терекге таянма – джыгъылырса.
- Кёрмегеннге кебек – танг, битмегеннге сакъал – танг.
- Чомарт къолда мал къалмаз.
Профиль
|
|
|
|||