- Кёбден умут этиб, аздан къуру къалма.
- Эрни эр этерик да, къара джер этерик да, тиширыуду.
- Тойну къарнашы – харс, джырны къарнашы – эжиу.
- Башы ишлегенни, ауузу да ишлер.
- Къая джолда джортма, ачыкъ сёзден къоркъма.
- Джарлы эскисин джамаса, къууаныр.
- Къуру гыбыт бек дыгъырдар.
- Ишлемеген – тишлемез.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Джюрек кёзден алгъа кёрюр.
- Мадар болса, къадар болур.
- Джылыгъа джылан илешир.
- Тенги кёбню джау алмаз, акъылы кёбню дау алмаз.
- Джыйырма къойну юч джыйырма эбзе кюте эди.
- Къолу уллу – асыу, аягъы уллу – джарсыу.
- Джети тилни билген джети кишиди.
- Ачлыкъда тары гырджын халыуадан татлы.
- Тилчи тилден къаныкъмаз.
- Джюрекге ариу – кёзге да ариу.
- Сыфатында болмагъаны, суратында болмаз.
- Байлыкъ тауусулур, билим тауусулмаз.
- Тюзню ётмеги тюзде къалса да, тас болмаз.
- Адеб этмеген, адеб кёрмез.
- Адам сёзге тынгыла, акъыл сёзню ангыла.
- Керилген да, ургъан кибикди.
- Сормай – алма, чакъырылмай – барма.
- Окъугъанны бети джарыкъ.
- Аман эсирсе, юйюн ояр.
- Джангызны оту джарыкъ джанмаз!
- Адамны сабийин сюйген джюреги, бычакъча, джитиди.
- Эки ойлашыб, бир сёлешген.
- Ёлюк кебинсиз къалмаз.
- Келинни – келгинчи, бёркню кийгинчи кёр.
- Тил – кесген бычакъ, сёз – атылгъан окъ.
- Ат басханны джер билед.
- Джарлыны эшигин махтагъан джабар.
- Аман къатын алгъан, арыр, иги къатын алгъан джарыр.
- Аллахдан тилесенг, кёб тиле.
- Минг тенг да азды, бир джау да кёбдю.
- Мал тутхан – май джалар.
- Алтыннга тот къонмаз.
- Кёб джашагъан – кёб билир.
- Джылкъыдан – ат чыгъар, тукъумдан – джаш чыгъар.
- Чёбню кёлтюрсенг, тюбюнден сёз чыгъар.
- Къызны минг тилер, бир алыр.
- Арпа, будай – ащды, алтын, кюмюш а – ташды.
- Аманны къуугъан, аманлыкъ табар.
- Кечеси – аяз, кюню – къыш, джарлы къаргъагъа бир аш тюш!
- Сёз къанатсыз учар.
- Гугурук къычырмаса да, тангны атары къалмаз.
Профиль
|
|
|
|||