Семенлени Джырчы Исмаилны джангы китабларыны тёгерегинде баргьан ушакьланы юсюнден кёлюме келген бир талай оюм айтыргьа излейме. Форумда ушакьладан болмаса, китабланы кеслерин кёрмегенме. Мени сейирсиндирген бу ушакьлада - джангы китаблагъа, юйдегиге сабий къошулса къууаннганча къууаныр орнуна, ары бизни атыбыз нек джазылмагъанды деб, бир къауумланы «къазауат» ачханлары.
«Эльбрусоид» фонд чыгъаргъан китабла кимге чырмау, тыйгъыч боладыла!? Сыйлы джырчыны китаблары ненча чыкъсала да артыкъ боллукъ тюлдю бизни миллетге. Сау къаллыкъла, чыгъарсынла бири - тыш къралда, бири – Малкъарда, фахмулу къызы Софья да - Къарачайда, аллай мадарлары бар эсе.
Семен улуну, тыйыншлысыча джан аурутулмай, талай джылны сансыз къалыб тургъан чыгъармаларын, джыйышдырыб, миллетге саугъа этген керти адамларыбызгъа, Аллах разы болсун, биз этелмеген ишни этиб, сюйген Джырчыбызны дараджасын кёлтюрюб, сау этиб, аллыбызгъа сюегенча этдигиз, дер орнуна, миллет ючюн джашаб, Къарачайны атын Эресейни ара шахары Москвада махтау бла айтдырыб кюрешген сыйлы адамларыбызгъа этер бюсюреуюлери олму эди!?
Адамлагъа болмагъан айыбны тартхан, кесин сыйсыз этеди…
Ушакъны бардыргъанла бир-бирин махтаб, бек сейирсиндирдиле. Бу форумдан мен ангылагъан, къайгъыны башы Лайпан улу Билялды. Исмаилны юйдегисин бир-бирине этиб, ол гюнахны башына нек алады? Исмаилгъа игилик этеме дебми турады? Исмаил разы боллукъму эди, аны бу ишине? Бу ишни башлагъан сагъатда аны юсюнден сагъыш этгенми эди? Фахму игиликге къуллукъ этеди, дейдиле. Ол джюрютген къайгъы , ол оюмгъа къаршы келеди.
Семенлени Азретни, фахмулу джазыучубузну, студент джылларымда мен да иги таный эдим.
Софья, айыб этме, миллет сыйлагъан къарнашынгы да, тамада эгечлеринги да сындырыб кюрешгенинг бек ушагъыусузду. «Атамы менме душеприказчиги», дейсе да, кимча да болмай, сен къууаныргъа, сау бол дерге керек эдинг Эльбрусоидге.
Мен сизлеча джазыучу болмасам да, аманны-игини, кертини-ётюрюкню, адебни-намысны, терсни-тюзню ангылайма. Сиз, сёз бла ишлеген адамла, кимча да болмай, сёзню багъасын билесиз, деб тура эдим.
Бу асыулу, аламат ишге кёлекке тюшюрюб айланнганланы Аллах кечсин! Мени да Исмаилны атыны тёгерегинде джюрюген учхара сёзлени кёлтюрмей, ауруракъ айтхан затым бар эсе, кечигиз.
