Расширенный поиск
20 Апреля  2024 года
Логин: Регистрация
Пароль: Забыли пароль?
  • Айтхан сёзюне табылгъан.
  • Къызны минг тилер, бир алыр.
  • Кёб джашагъан – кёб билир.
  • Ариуну – ауруу кёб.
  • Ётюрюкчюню шагъаты – къатында.
  • Арыгъан къош чамчы болур.
  • Чомарт къолда мал къалмаз.
  • Башланнган иш битер, къымылдагъан тиш тюшер.
  • Эм уллу байлыкъ – джан саулукъ.
  • Айтылгъан буйрукъ, сёгюлмез
  • Адамны аманы адамны бети бла ойнар.
  • Таукел тауну аудурур.
  • Окъ къызбайны джокълайды.
  • Джарлы тюеге минсе да, ит къабар.
  • Аджашхан тёгерек айланыр.
  • Телиге от эт десенг, юйюнге от салыр.
  • Кёб ант этген, кёб ётюрюк айтыр.
  • Оюмсуз атлагъан, аджалсыз ёлюр.
  • Акъдан къара болмаз.
  • Къарт айтханны этмеген, къартаймаз.
  • Гугурук къычырмаса да, тангны атары къалмаз.
  • Нарт сёз къарт болмаз.
  • Къатын къылыкъсыз, эр тынчлыкъсыз.
  • Эшекни не къадар тюйсенг да, ат болмаз.
  • Иги адамны бир сёзю эки болмаз.
  • Аманны тукъумуна къарама, игини тукъумун сорма.
  • Миллетни бойну – базыкъ, аны бла кюрешген – джазыкъ.
  • Эки къатын алгъанны къулагъы тынгнгаймаз.
  • Кёбден умут этиб, аздан къуру къалма.
  • Бичгенде ашыкъма, тикгенде ашыкъ.
  • Адамны джюреги нени кёрюрге сюйсе, кёзю да аны кёрюрге ёч болады.
  • Иги болса, тамадама – махтау, аман болса, меннге – айыб.
  • Биреуню тёрюнден, кесинги эшик артынг игиди.
  • Джумушакъ сёз къаты таякъны сындырыр.
  • Таукел къуру къалмаз.
  • Кесине оноу эте билмеген, халкъына да эте билмез.
  • Джолунга кёре – джюрюшюнг, джагъанга кёре – юлюшюнг.
  • Джигер – джаннга къыйынлыкъ.
  • Биреу къой излей, биреу той излей.
  • Къыз тиширыу кеси юйюнде да къонакъды.
  • Акъыллы эркиши атын махтар, акъылсыз эркиши къатынын махтар.
  • Ата Джуртча джер болмаз, туугъан элча эл болмаз.
  • Термилгенинги табмазса, кюлгенинге тюберсе.
  • Башы джабылгъан челекге, кир тюшмез.
  • Сагъышы джокъ – джукъучу, акъылы джокъ – къаугъачы.
  • Къуру гыбыт бек дыгъырдар.
  • Адам сёзюнден белгили.
  • Башынга джетмегенни сорма.
  • Билмезни кёзю кёрмез, этмезни къулагъы эшитмез.
  • Эртде тургъан бла эртде юйленнген сокъуранмаз.

Барысыны да бир терсликлери болгъанды - миллетлери!

07.03.2024 0 756  Тикаланы Ф.
Миллетлеге кёре политика репрессияла бардырыу совет къыралда Уллу Ата журт урушха дери башланнганды. Биринчилени санында корейлиле бла поляклыла, аланы ызындан немислиле бла финнле кёчюрюлгендиле зор бла. Сёзге, 1941-1942 жыллада битеу да бирге 1,2 миллион немесли кёчюрюлгендиле эмда Поволжьеде халкъны  автономиясы жокъ этилгенди.

Ызы бла кёчгюнчюлюкню ачылыгъын кавказ халкъла сынагъандыла. 1943 жылда къарачайлыла бла къалмукълула, 1944 жылда февральда чеченлиле бла ингушлула тас этгендиле ата журтларын. «Чечевица» операциягъа Берия Грозныйге келип, кеси башчылыкъ этгенин жазадыла тарыхчыла.

Ол кюнледе Берияны атына «Къабарты-Малкъарны таулула жашагъан районларыны болуму» справка хазыр этиледи. Анда таулуланы саныны, эллени, жерини кенглигини, малланы, бахчаланы, биченликлени, агъачланы, тауланы, башхача айтханда Малкъарны экономика эм демография болумларыны юслеринден толу шартла жазылгъандыла.

Справканы ахырында быллай сёзле бардыла: «…таулуланы КъМАССР-ден тышына кёчюрюуню юсюнден сорууну тамамларгъа керекди».

Аны окъуп, Берия 24 февральда Сталиннге миллетни аманлап телеграмма жазады. Ахырында уа чеченлиле бла ингушлула кёчюрюлгенден сора эркин болгъан аскерлени таулу халкъны Шимал Кавказдан жокъ этиуде хайырланыргъа боллугъун билдиреди. «…алай бла операцияны быйыл 15-20 мартха дери, терекледе чапыракъла ёсгюнчю бошаргъа керекди» деп жазады ол документни ахырында.

1944 жылда 26 февральда Нарком «Къабарты-Малкъар АССР-ден таулу халкъны кёчюрюуню юсюнден» буйрукъну къабыл кёреди. Алай бла таулуланы туугъан журтларындан жокъ этиу жумушлагъа 21 минг аскерчи къатышадыла. Аланы асламы къарачайлыланы, къалмукъланы, чеченлилени, ингушлуланы кёчюрюуге къатышып, къужур сынау жыйгъандыла.

Киши жерге миллет саулай ашырылгъанды: граждан урушха къатышханла, Уллу Ата журт урушда душманнга къажау сермешледе къан тёкген аскерчилени жууукълары, партия къуллукъчула, депутатла… Аланы барысыны да бир терсликлери болгъанды – миллетлери!

1944 жылны 8 мартыны эрттенлиги битеу таулу юйюрледе бирча башланнганды  эшиклени ачы къагъылып, аскерчиле: «Жыйылыгъыз!  Кёчюрюлген этесиз!», – деген къычырыкъла бла киргендиле юйлеге. Хапчукланы жыяргъа жаланда 30 минут берилгенди. Заман озгъанлай, адамланы орамгъа къыстагъандыла.

Бу заманда юйлеринде болмагъанлагъа уа бютюнда къыйын тюшгенди. Ала артда юйюрлерин жылла бла излегендиле, тапмай, кеслери  жангызлай ауушханла къаллай бир болурла…

Алай бла Орта Азиягъа бла Къазахстаннга 37,7 минг таулу кёчюрюлгенди: асламы тиширыула, сабийле, акъсакъалла. Ала барысы да 14 эшелоннга сыйыннгандыла – малла жюрютюлген, жугъу да болмагъан вагонлагъа.

1944 жылда 8 апрельде СССР-ни Баш Советини Президиумуну «Къабарты-Малкъар АССР-де жашагъан таулуланы кёчюрюуню эм Къабарты-Малкъар АССР-ни Къабарты АССР-ге алышыуну юсюнден» Указы чыкъгъанды.

Таулу халкъ кёчюрюлгени, аны къыраллыгъы сыйырылгъаны бла бирге  Элбрус эмда аны тийреси Грузиягъа берилгенди. Дагъыда башха административ тюрлениуле бардырылып, Черек эм Холам-Бызынгы районла кетерилгендиле. Бир-бир эллени атлары да тюрлендирилгенди, сёзге, Яникой  Ново-Каменка, Къашхатау – Советский, Хасания – Пригорный, Лашкута  Заречный, Былым  Угольный болгъандыла. 

Тарыхчыла жазгъанларыча, кавказлы халкъла зор бла кёчюрюлгенден сора 35 минг квадрат метр жер эркин этилгенди – ол а Швейцария тенглиди!

(Нет голосов)

  • Нравится

Комментариев нет