- Тешигини къатында, чычхан да батыр болур.
- Сёз садакъдан кючлюдю.
- Бир онгсуз адам адет чыгъарды, деб эштирик тюлсе.
- Урунуу – насыбны анасы.
- Нёгер болсанг, тенг бол, тенг болмасанг, кенг бол.
- Уллу атлама – абынырса, уллу къабма – къарылырса.
- Кёзню ачылгъаны – иги, ауузну джабылгъаны – иги.
- Эр сокъур болсун, къатын тилсиз болсун.
- Экиндини кеч къылсанг, чабыб джетер ашхам.
- Ишге юренсин къоллары, халкъ бла болсун джоллары.
- Къууут – джелге, берне – бошха.
- Терек ауса, отунчу – кёб.
- Биреу ашаб къутулур, биреу джалаб тутулур.
- Тенги кёбню джау алмаз, акъылы кёбню дау алмаз.
- Джеринден айырылгъан – джети джылар, джуртундан айырылгъан – ёлгюнчю джылар.
- Тамчы таш тешер.
- Киштикге къанат битсе, чыпчыкъ къалмаз эди.
- Къоркъакъны кёзю экили кёрюр.
- Ариу сёз аурууунгу алыр.
- Игиге айтсанг – билир, аманнга айтсанг – кюлюр.
- Чёбню кёлтюрсенг, тюбюнден сёз чыгъар.
- Зар адам ашынгы ашар, кесинги сатар.
- Шайтан алдады, тюзлюк къаргъады.
- Ётюрюкден тюбю джокъ, кёлтюрюрге джиби джокъ.
- Дженгил джетерикме деб, узун джолну къоюб, къысхасын барма.
- Кёбню кёрген – кёб билир.
- Адам къаллай бир ишленмесе, аллай бир кесин уллу кёреди.
- Байлыкъ тауусулур, билим тауусулмаз.
- Адам къыйынлыгъын кёлтюрюр, зауукълугъун кёлтюрмез.
- Эшекге миннген – биринчи айыб, андан джыгъылгъан – экинчи айыб.
- Нарт сёз къарт болмаз.
- Гугурук къычырмаса да, тангны атары къалмаз.
- Къатыны харакетли болса, эри къымсыз болур.
- Аууз сакълагъан – джан сакълар.
- Тойчу джашха къарама, къойчу джашха къара.
- Уллу айтханны этмеген – уллаймаз.
- Ашыкъгъанны этеги бутуна чырмалыр.
- Телиге от эт десенг, юйюнге от салыр.
- Джаханимни кёрмей, джандетге кёл салмазса.
- Аманнга алтын чыдамаз.
- Хантына кёре тузу, юйюне кёре къызы.
- Хазыр ашха – терен къашыкъ.
- Ариу сёз – къылычдан джити.
- Бастасын ашагъан, хантусун да ичер.
- Биреу къой излей, биреу той излей.
- Ачылгъан эт джабылыр, кёрген кёз унутмаз.
- Ёгюзню мюйюзюнден тутадыла, адамны сёзюнден тутадыла.
- Адам сёзге тынгыла, акъыл сёзню ангыла.
- Тили узунну, намысы – къысха.
- Къонагъынгы артмагъын алма да, алгъышын ал.
