Чакъырылмагъан джерге барма, чакъырылгъан джерден къалма.
Зар адам ашынгы ашар, кесинги сатар.
Кюн кёрмеген, кюн кёрсе, кюндюз чыракъ джандырыр.
Адамны артындан къара сабан сюрме.
Хунаны тюбюн къазсанг, юсюнге ауар.
Ушамагъан – джукъмаз.
Биреу къой излей, биреу той излей.
Ана къойну – балагъа джандет.
Билим – акъылны чырагъы.
Айтханы чапыракъдан ётмеген.
Бетинги сатма, малынгы сат.
Аманнга да, игиге да оноусуз къатышма.
Къая джолда джортма, ачыкъ сёзден къоркъма.
Айранын берсенг, челегин да къызгъанма.
Насыблыны баласы кюн кюнден да баш болур, насыбсызны баласы, кюн кюнден да джаш болур.
Аш кетер да бет къалыр.
Экиндини кеч къылсанг, чабыб джетер ашхам.
Юй ишлеген балта эшикде къалыр.
Ашатыргъа иш – ашхы, ишлетирге аш – ашхы.
Ишленмеген джаш – джюгенсиз ат, ишленмеген къыз – тузсуз хант.
От кюйдюрген, сау болса да, тот кюйдюрген, сау болмаз.
Чыкълы кюнде чыкъмагъан, чыкъса къуру кирмеген.
Джылар джаш, атасыны сакъалы бла ойнар.
Сёлеш деб шай берген, тохта деб, сом берген.
Халкъны юйю – туугъан джери.
Таякъ этден ётер, тил сюекден ётер.
Ёмюрлюк шохлукъну джел элтмез.
Акъыл бла адеб эгизледиле.
Экеулен сёлеше тура эселе, орталарына барыб кирме.
Бети – къучакълар, джюреги – бычакълар.
Джашда акъыл джокъ, къартда къарыу джокъ.
Джогъун бар этген, барын бал этген.
Аманнга игилик этсенг, юйюнге сау бармазса.
Къонакъ хазыр болгъанлыкъгъа, къонакъбай хазыр тюлдю.
Джаш къарыу бла кючлю, къарт акъыл бла кючлю.
Ургъан суудан башынгы сакъла.
Эллинг бла джау болсанг да, юйюнг бла джау болма.
Адам бла мюлк юлешмеген эсенг, ол адамны билиб бошагъанма, деб кесинги алдама.
Къыз келсе, джумуш эте келеди, къатын келсе, ушакъ эте келеди.
Къызбайны юйюне дери сюрсенг, батыр болур.
Иги бла джюрюсенг, джетерсе муратынга, аман бла джюрюсенг, къалырса уятха.
Элге къуллукъ этмеген, элге ие болмаз.
Таукелге нюр джауар.
Джарлы джети элни сёзюн этер.
Джетген къыз джерли эшекни танымаз.
Адеб базарда сатылмаз.
Тура эдим джата, къайдан чыкъды хата?
Джашлыкъ этмеген, башлыкъ этмез.
Тамырсыз терекге таянма – джыгъылырса.
Эринчекге кюн узун.
