- Ашына кёре табагъы, балына кёре къалагъы.
- Сормай – алма, чакъырылмай – барма.
- Орну джокъну – сыйы джокъ.
- Иги бла джюрюсенг, джетерсе муратынга, аман бла джюрюсенг, къалырса уятха.
- Джашлыкъ этмеген, башлыкъ этмез.
- Къарны аманнга къазан такъдырма, къолу аманнга от джакъдырма.
- Къыз келсе, джумуш эте келеди, къатын келсе, ушакъ эте келеди.
- Керти сёзге тёре джокъ.
- Тойгъан джерден туугъан джер игиди.
- Кёл – къызбай, къол – батыр.
- Биреуню эскиси биреуге джангы болмайды.
- Ач къарным, тынч къулагъым.
- Борчунг бар эсе, хурджунунга ойлаб узал.
- Байдан умут эте, джарлыдан ёгюз багъасы къорады.
- Уллу сёлешме да, уллу къаб.
- Экиндини кеч къылсанг, чабыб джетер ашхам.
- Керек ташны ауурлугъу джокъ.
- Адеб этмеген, адеб кёрмез.
- Эр абынмай, эл танымаз.
- Магъанасыз сёз – тауушсуз сыбызгъы.
- Ата Джуртуму башы болмасам да, босагъасында ташы болайым.
- Тик ёргени, тик энгишгеси да болады.
- Ёмюрлюк шохлукъну джел элтмез.
- Къолунгдан къуймакъ ашатсанг да, атаны борчундан къутулмазса.
- Юреннген ауруу къалмаз.
- Тура эдим джата, къайдан чыкъды хата?
- Чомартха Тейри да борчлуду.
- Хата – гитчеден.
- Ойнаб айтсанг да, эслеб айт.
- Тойгъа алгъа да барма, тойда артха да къалма.
- Тыш элде солтан болгъандан эсе, кесинги элде олтан болгъан игиди!
- Байны къызы баймакъ болса да, юйде къалмаз!
- Кийимни бичсенг, кенг бич, тар этген къыйын тюлдю.
- Зар адам ашынгы ашар, кесинги сатар.
- Чабакъгъа акъыл, табагъа тюшсе келеди.
- Чёбню кёлтюрсенг, тюбюнден сёз чыгъар.
- Ашхылыкъ джерде джатмайды, аманлыкъ суугъа батмайды.
- Джылыгъа джылан илешир.
- Эртде тургъан бла эртде юйленнген сокъуранмаз.
- Ёзденликни джайгъан – джокълукъ.
- Аш иеси бла татлыды.
- Айранын берсенг, челегин да къызгъанма.
- Мен да «сен», дейме, сен да «кесим», дейсе.
- Эки къатын алгъан – эки ташны ортасына башын салгъан.
- Ишин билген, аны сыйын чыгъарады.
- Аш хазыр болса, иш харам болур.
- Сютню башын джалагъан къутулур, тюбюн ичген тутулур.
- Терек ауса, отунчу – кёб.
- Тёрени джагъы джокъ.
- Сакъ юйюне сау барыр.
Профиль
|
|
|
|||