- Ач къарным, тынч къулагъым.
- Тюзлюк шохлукъну бегитир.
- Урама да – ёледи, сатама да – келеди.
- Уллу сёзде уят джокъ.
- Къыйынлы джети элни къайгъысын этер.
- Киштикге къанат битсе, чыпчыкъ къалмаз эди.
- Тойгъан антын унутур.
- Сыфатында болмагъаны, суратында болмаз.
- Тил джюрекге джол ишлейди.
- Ашатыргъа иш – ашхы, ишлетирге аш – ашхы.
- Этек чакъмакълары баш джаргъан, сёлешген сёзлери таш джаргъан.
- Къонакъны къачан кетерин сорма, къачан келлигин сор.
- Сакъ юйюне сау барыр.
- Джерни букъусу кёкге къонмаз.
- Телини эшигин, махтау джабар.
- Намысы джокъну – дуниясы джокъ.
- Кесинге джетмегенни, кёб сёлешме.
- Аджашханны ызындагъы кёреди, джангылгъанны джанындагъы биледи.
- Арбаз къынгырды да, ийнек сауалмайма.
- Джол бла сёзню къыйыры джокъ.
- Кимни – тили, тиши онглу, кимни – къолу, иши онглу.
- Мадар болса, къадар болур.
- Дуния мал дунияда къалады.
- Адам сёзге тынгыла, акъыл сёзню ангыла.
- Хансыз джомакъ болмаз.
- Кютгени беш эчки, сызгъыргъаны уа, джерни джарады.
- Баш болса, бёрк табылыр.
- Тойгъан джерден туугъан джер игиди.
- Биреуню къыйынлыгъы бла кесинге джол ишлеме.
- Иги бла джюрюсенг, джетерсе муратынга, аман бла джюрюсенг, къалырса уятха.
- Къыз келсе, джумуш эте келеди, къатын келсе, ушакъ эте келеди.
- Ачлыкъда тары гырджын халыуадан татлы.
- Байлыкъ болгъан джерде, тынчлыкъ джокъду.
- Алтыннга тот къонмаз.
- Баргъанынга кёре болур келгенинг.
- Иги адам абынса да, джангылмаз.
- Тыш элде солтан болгъандан эсе, кесинги элде олтан болгъан игиди!
- Ишлегенден, къарагъан уста.
- Башланнган иш битер, къымылдагъан тиш тюшер.
- Аш хазыр болса, иш харам болур.
- Ат басханны джер билед.
- Уясында не кёрсе, учханында аны этер.
- Болджал ишни бёрю ашар.
- Джангыз торгъай джырламаз.
- Бир абыннган – минг сюрюнюр.
- Ариу сёз – джаннга азыкъ, аман сёз – башха къазыкъ.
- Хата – гитчеден.
- Элге къуллукъ этмеген, элге ие болмаз.
- Халкъны джырын джырласанг, халкъ санга эжиу этер.
- Сакъалы текени да бар, мыйыгъы киштикни да бар.
Профиль
|
|
|
|||