- Джаш болсун, къыз болсун, акъылы, саны тюз болсун.
- Абынмазлыкъ аякъ джокъ, джангылмазлыкъ джаякъ джокъ.
- Хантына кёре тузу, юйюне кёре къызы.
- Дуния мал дунияда къалады.
- Миллетни бойну – базыкъ, аны бла кюрешген – джазыкъ.
- Атадан ёксюз – бир ёксюз, анадан ёксюз – эки ёксюз.
- Кийимни бичсенг, кенг бич, тар этген къыйын тюлдю.
- Келинин тута билмеген, къул этер, къызын тута билмеген, тул этер.
- Ёлюр джаннга, ёкюл джокъ.
- Билим – акъылны чырагъы.
- Чёбню кёлтюрсенг, тюбюнден сёз чыгъар.
- Иесиз малны бёрю ашар.
- Эм уллу байлыкъ – джан саулукъ.
- Уллу къазанда бишген эт, чий къалмаз.
- Аз айтсам, кёб ангылагъыз.
- Джол бла сёзню къыйыры джокъ.
- Ач бёрюге мекям джокъ.
- Хоншуну тауугъу къаз кёрюнюр, келини къыз кёрюнюр.
- Ашда – бёрю, ишде – ёлю.
- Къонакъ аман болса, къонакъбай джунчур
- Кийим тукъум сордурур.
- Насыблы элин сюер, насыбсыз кесин сюер.
- Къатын байлыкъны сюер, эр саулукъну сюер.
- Келлик заман – къартлыкъ келтирир, кетген заман – джашлыкъ ёлтюрюр.
- Нарт сёз – тилни бети.
- Чабакъсыз кёлге къармакъ салгъанлыкъгъа, чабакъ тутмазса.
- Тойну къарнашы – харс, джырны къарнашы – эжиу.
- Ачлыкъ отха секиртир.
- Башы ишлегенни, ауузу да ишлер.
- Урама да – ёледи, сатама да – келеди.
- Борчунг бар эсе, хурджунунга ойлаб узал.
- Терек ауса, отунчу – кёб.
- Джашда акъыл джокъ, къартда къарыу джокъ.
- Аманнга игилик этсенг, юйюнге сау бармазса.
- Хар зат кесини орнуна иги.
- Къошда джокъгъа – юлюш джокъ.
- Юре билмеген ит, къонакъ келтирир.
- Сёз садакъдан кючлюдю.
- Тилде сюек болмаса да, сюек сындырыр.
- Ханы къызы буюгъа-буюгъа киштик болду.
- Ёксюзню тилеги къабыл болур.
- Билим къая тешер.
- Ашатыргъа иш – ашхы, ишлетирге аш – ашхы.
- Мураты болгъанны джюрек тебюую башхады.
- Тойгъандан сора, ашны сёкме.
- Акъыллы айтыр эди, акъылсыз къоймайды.
- Ашхы тенг джолгъа салыр, аман тенг джолдан тайдырыр.
- Гугук кесини атын айтыб къычыргъанча, мен, мен деб нек тураса?
- Мухарны эси – ашарыкъда.
- Къарт бла баш аша, джаш бла аякъ аша.
Профиль
|
|
|
|||