- Ёксюзню къалачы уллу кёрюнюр.
- Бал ашаргъа сюе эсенг, чибин ургъаннга тёз.
- Ауругъанны сау билмез, ач къарынны токъ билмез.
- Джаш къарыу бла кючлю, къарт акъыл бла кючлю.
- Ичимден чыкъды хата, къайры барайым сата?
- Намысы болмагъанны, сыйы болмаз.
- Ашын ашагъанынгы, башын да сыйла.
- Нёгерсизни джолу узун.
- Ушамагъан – джукъмаз.
- Мухар, кеси тойса да, кёзю тоймаз.
- Нарт сёз къарт болмаз.
- Эки къатын алгъан – эки ташны ортасына башын салгъан.
- Чомартха Тейри да борчлуду.
- Эр сокъур болсун, къатын тилсиз болсун.
- Ариу джол аджал келтирмез.
- Ариу – кёзге, акъыл – джюрекге.
- Эркишини аманы тиширыуну джылатыр.
- Къартны сыйын кёрмеген, къартлыгъында сыйлы болмаз.
- Къартха ушагъан джаш – акъыллы, джашха ушагъан къарт – тели.
- Мураты болгъанны джюрек тебюую башхады.
- Чомартны къолу берекет.
- Аллахха ийнаннган кишини, Аллах онгдурур ишин.
- Джети тилни билген джети кишиди.
- Билмейме деген – бир сёз
- Эшекни не къадар тюйсенг да, ат болмаз.
- Адамны адамлыгъы къыйынлыкъда айгъакъланады.
- Биреуню къыйынлыгъы бла кесинге джол ишлеме.
- Ариу сёз – джаннга азыкъ, аман сёз – башха къазыкъ.
- Аууз сакълагъан – джан сакълар.
- Душманны тышы – акъ, ичи – къара.
- Келинин тута билмеген, къул этер, къызын тута билмеген, тул этер.
- Адамны сыфатына къарама, сёзюне къара.
- Ётюрюкден тюбю джокъ, кёлтюрюрге джиби джокъ.
- Таукел адам тау тешер.
- Ариу сёз джыланны орнундан чыгъарыр.
- Минг тенг да азды, бир джау да кёбдю.
- Аманны тукъумуна къарама, игини тукъумун сорма.
- Джаралыны джастыгъында сау ёлюр.
- Эм ашхы къайын ана мамукъ бла башынгы тешер.
- Дуния аламаты сен эсенг да, игиме деб айтма.
- Элни кючю – эмеген.
- Ойнаб айтсанг да, эслеб айт.
- Ана къойну – балагъа джандет.
- Алгъанда – джууукъ, бергенде – джау.
- Эл бла кёргенинг эрелей.
- Къарнынг ауруса, ауузунгу тый
- Ашхылыкъ джерде джатмайды, аманлыкъ суугъа батмайды.
- Къарын къуру болса, джюрек уру болур.
- Тай асырагъан, атха минер.
- Зар адамны насыбы болмаз.
Профиль
|
|
|
|||