- Къралынгы – душмандан, башынгы от бла суудан сакъла.
- Кесине оноу эте билмеген, халкъына да эте билмез.
- Къартха ушагъан джаш – акъыллы, джашха ушагъан къарт – тели.
- Джарлыны эшигин махтагъан джабар.
- Джаш къарыу бла кючлю, къарт акъыл бла кючлю.
- Адеби болмагъан къыз – тузсуз хант.
- Тиширыусуз юй – отсуз от джагъа.
- Иги джашны ышаны – аз сёлешиб, кёб тынгылар.
- Асхат ашлыкъ сата, юйдегиси ачдан къата.
- Ёлген эшек бёрюден къоркъмайды.
- Тёгюлген тюгел джыйылмайды.
- Баш – акъыл ючюн, акъылман – халкъ ючюн.
- Биреуге аманлыкъны тилеме да, кесинге ашхылыкъны тиле.
- Къайгъы тюбю – тенгиз.
- Минг тенг да азды, бир джау да кёбдю.
- Кёбге таш атма.
- Онгсузну – джакъла, тенгликни – сакъла.
- Булут кёкге джарашыу, уят бетге джарашыу.
- Элиб деген, элге болушур.
- Таукел тауну аудурур.
- Таукел адам тау тешер.
- Ач уят къоймаз.
- Ишге юренсин къоллары, халкъ бла болсун джоллары.
- Ашлыкъ – бюртюкден, джюн – тюкден.
- Ким бла джюрюсенг, аны кёзю бла кёрюнюрсе.
- Окъугъан озар, окъумагъан тозар.
- Ана къолу ачытмаз.
- Ашыкъгъан cуу, тенгизге джетмез.
- Атынг аманнга чыкъгъандан эсе, джанынг тамагъынгдан чыкъсын.
- Айырылмаз джууугъунга, унутмаз сёзню айтма.
- Билеги кючлю, бирни джыгъар, билими кючлю, мингни джыгъар.
- Аманны къуугъан, аманлыкъ табар.
- Эрни эр этерик да, къара джер этерик да, тиширыуду.
- Ариуну – ауруу кёб.
- Ётюрюкню къуйругъу – бир тутум.
- Чыбыкълыкъда бюгюлмеген, къазыкълыкъда бюгюлмей эди.
- Адам къыйынлыгъын кёлтюрюр, зауукълугъун кёлтюрмез.
- Байма, деб да, къууанма, джарлыма, деб да, джылама.
- Аууздан келген, къолдан келсе, ким да патчах болур эди.
- Ач отунчуну ачыуу – бурнунда.
- Мадар болса, къадар болур.
- Айтхан – тынч, этген – къыйын.
- Хата – гитчеден.
- Тешигини къатында, чычхан да батыр болур.
- Биреуню тёрюнден, кесинги эшик артынг игиди.
- Ауузу аманнга «иги», деме.
- Бир абыннган – минг сюрюнюр.
- Тели турса – той бузар.
- Ач бёрюге мекям джокъ.
- Аууз сакълагъан – джан сакълар.
Профиль
|
|
|
|||