- Къошда джокъгъа – юлюш джокъ.
- Джиби бир къат джетмей эди да, эки къат тарта эди.
- Иги джашны ышаны – аз сёлешиб, кёб тынгылар.
- Джыгъылгъанны сырты джерден тоймаз.
- Джангыз терек къынгыр ёсер.
- Ушамагъан – джукъмаз.
- Аш иеси бла татлыды.
- Башланнган иш битер, къымылдагъан тиш тюшер.
- Ач уят къоймаз.
- Бастасын ашагъан, хантусун да ичер.
- Джырчы джырчыгъа – къарнаш.
- Намыс сатылыб алынмайды.
- Кеси юйюмде мен да ханма.
- Къазанчы аман болса, къазаны къайнамаз.
- Эте билген, этген этеди, эте билмеген, юретген этеди!
- Ёлюк кебинсиз къалмаз.
- Къонагъынгы артмагъын алма да, алгъышын ал.
- Суу ичген шауданынга тюкюрме.
- Мухар, кеси тойса да, кёзю тоймаз.
- Гугук кесини атын айтыб къычыргъанча, мен, мен деб нек тураса?
- Эркишини аманы тиширыуну джылатыр.
- Сангырау къулакъ эл бузар.
- Джаным-тиним – окъуу, билим.
- Тели турса – той бузар.
- Кимни – тили, тиши онглу, кимни – къолу, иши онглу.
- Окъумагъан сокъурду, сокъур ташха абыныр!
- Билим ат болуб да чабар, къуш болуб да учар.
- Аманнга алтын чыдамаз.
- Хатерли къул болур.
- Алтыннга тот къонмаз.
- Джерни букъусу кёкге къонмаз.
- Этим кетсе да, сюегим къалыр.
- Къатын байлыкъны сюер, эр саулукъну сюер.
- Къатын къылыкъсыз, эр тынчлыкъсыз.
- Уллу суу бла уллу ауруудан башынгы сакъла.
- Тойгъан джерге джети къайт.
- «Ма», - дегенни билмесенг, «бер», - дегенни билмезсе.
- Насыб бютеу халкъны юлюшюдю.
- Ашхы болсанг, атынг чыгъар, аман болсанг, джанынг чыгъар.
- Къолу уллу – асыу, аягъы уллу – джарсыу.
- Ат басханны джер билед.
- Бир онгсуз адам адет чыгъарды, деб эштирик тюлсе.
- Джигер – джаннга къыйынлыкъ.
- Къарыусузгъа кюлме, онгсузгъа тийме.
- Къарнынг тойгъунчу аша да, белинг талгъынчы ишле.
- Рысхысына кёре, джаш ёсер, къышлыгъына кёре, мал ёсер.
- Эм ашхы къайын ана мамукъ бла башынгы тешер.
- Кюн кёрмеген, кюн кёрсе, кюндюз чыракъ джандырыр.
- Эки къатын алгъанны къулагъы тынгнгаймаз.
- Айтхан сёзюне табылгъан.
Профиль
|
|
|
|||