- Байлыкъдан саулукъ ашхыды.
- Суу ичген шауданынга тюкюрме.
- Джан саулукъ бермей, сан саулукъ бермезсе.
- Аман хансны – урлугъу кёб.
- Ёгюзню мюйюзлери ауурлукъ этмейдиле.
- Билими азны – ауузунда кирит.
- Халкъны джырын джырласанг, халкъ санга эжиу этер.
- Тюкюрюк баш джармаз, налат кёз чыгъармаз!
- Минг тенг да азды, бир джау да кёбдю.
- Эринчекни аурууу – кёб.
- Кесинг сынамагъан затны, адамгъа буюрма.
- Аманны тукъумуна къарама, игини тукъумун сорма.
- Ичимден чыкъды хата, къайры барайым сата?
- Айтылгъан сёз ызына къайтмаз.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Ат да турмайды бир териде.
- Аман адамны тепсинге олтуртсанг, къызынгы тилер.
- Чабакъгъа акъыл, табагъа тюшсе келеди.
- Тойгъа алгъа да барма, тойда артха да къалма.
- Арбаз сайлама да, хоншу сайла.
- Бюгюн дуния кибик, тамбла ахыратды.
- Къайтырыкъ эшигинги, къаты уруб чыкъма.
- Мен да «сен», дейме, сен да «кесим», дейсе.
- Урама да – ёледи, сатама да – келеди.
- Мал ёлсе, сюек къалыр, адам ёлсе, иши къалыр.
- Таукел тауну аудурур.
- Уллу атлама – абынырса, уллу къабма – къарылырса.
- Аманны къуугъан, аманлыкъ табар.
- Акъыл неден да кючлюдю.
- Бек ашыкъгъан меннге джетсин, дегенди аракъы.
- Баргъанынга кёре болур келгенинг.
- Кёзюнде тереги болгъан, чёбю болгъаннга кюле эди.
- Эки итни арасына сюек атма, эки адамны арасында сёз чыгъарма.
- Тау башында, тау болмаз, джангыз терек, бау болмаз.
- Ач келгенни – тойдур, кеч келгенни – къондур.
- Адамны сыфатына къарама, сёзюне къара.
- Айраннга суу къош, телиге джол бош.
- Кийиминг бла танылма, адамлыкъ бла таныл.
- Татлы сёз – балдан татлы.
- Чакъырылмагъан къонакъ – орунсуз.
- Байма, деб да, къууанма, джарлыма, деб да, джылама.
- Ариуну – ауруу кёб.
- Накъырданы арты керти болур.
- Байлыкъ адамны сокъур этер.
- Аманнга игилик этсенг, юйюнге сау бармазса.
- Джыланны къуйругъундан басарынг келсе, аны башы болгъанын унутма.
- Къонагъынгы артмагъын алма да, алгъышын ал.
- Кёзню ачылгъаны – иги, ауузну джабылгъаны – иги.
- Суугъа – чабакъ, къаягъа – ыргъакъ.
- Аш кетер да бет къалыр.
Профиль
|
|
|
|||