- Бек ашыкъгъан меннге джетсин, дегенди аракъы.
- Уллу суу бла уллу ауруудан башынгы сакъла.
- Къанны къан бла джуума, аманны аман бла къуума.
- Агъач – джерни чырайы, кийим – эрни чырайы.
- Кюн – узун, ёмюр – къысха.
- От этилмеген джерден тютюн чыкъмайды.
- Тилде сюек болмаса да, сюек сындырыр.
- Эшекге миннген – биринчи айыб, андан джыгъылгъан – экинчи айыб.
- Ач къалгъандан, кеч къалгъан къолай.
- Чабар ат – джетген къыз.
- Ишлегенден, къарагъан уста.
- Тилчиден кери бол.
- Бети къызарыучу адамны, джюреги харам болмаз.
- Игини сыйлагъан адетди.
- Мал тутхан – май джалар.
- Хоншуну тауугъу къаз кёрюнюр, келини къыз кёрюнюр.
- Тойчу джашха къарама, къойчу джашха къара.
- Биреуню къыйынлыгъы бла кесинге джол ишлеме.
- Бермеген къол, алмайды.
- Акъыл сабырлыкъ берир.
- Айранын берсенг, челегин да къызгъанма.
- Кюл тюбюндеги от кёрюнмейди.
- Эринчекни аурууу – кёб.
- Ата Джуртча джер болмаз, туугъан элча эл болмаз.
- Насыблы элин сюер, насыбсыз кесин сюер.
- Ашхы болсанг, атынг чыгъар, аман болсанг, джанынг чыгъар.
- Терек ауса, отунчу – кёб.
- Тёзгеннге, джабылгъан эшик ачылыр.
- Келлик заман – къартлыкъ келтирир, кетген заман – джашлыкъ ёлтюрюр.
- Керек ташны ауурлугъу джокъ.
- Эрни эр этерик да, къара джер этерик да, тиширыуду.
- Керти сёзге тёре джокъ.
- Арыгъан къош чамчы болур.
- Адеб этмеген, адеб кёрмез.
- Хар ишни да аллы къыйынды.
- Окъугъан – асыу, окъумагъан – джарсыу.
- Кесинг сынамагъан затны, адамгъа буюрма.
- Юйлю уругъа ит чабмаз.
- Билмезни кёзю кёрмез, этмезни къулагъы эшитмез.
- Элге къуллукъ этмеген, элге ие болмаз.
- Босагъа таш юйге кирмей эди, тыбыр таш эшикге чыкъмай эди.
- Чакъырылмагъан къонакъ къачан кетерин сормаз.
- Билимсиз иш бармаз.
- Айырылгъанланы айю ашар, бёлюннгенлени бёрю ашар.
- Чёбню кёлтюрсенг, тюбюнден сёз чыгъар.
- Аджашхан тёгерек айланыр.
- Хунаны тюбюн къазсанг, юсюнге ауар.
- Кёкдеги болмаса, джердегин кёрмейди.
- Ишин билген, аны сыйын чыгъарады.
- Къайгъы тюбю – тенгиз.
Профиль
|
|
|
|||