Расширенный поиск
26 Апреля 2026 года
Логин: Регистрация
Пароль: Забыли пароль?
Навигация
Словарь
  • Билеги кючлю, бирни джыгъар, билими кючлю, мингни джыгъар.
  • Адебни адебсизден юрен.
  • Аман адам этегингден тутса, кес да къач.
  • Кютгени беш эчки, сызгъыргъаны уа, джерни джарады.
  • Ёлюр джаннга, ёкюл джокъ.
  • Билим къая тешер.
  • Кёлю джокъну – джолу джокъ.
  • Ана къойну – балагъа джандет.
  • Бек анасы джыламаз.
  • Чомарт къонакъ юй иесин сыйлар.
  • Аллахха ийнаннган кишини, Аллах онгдурур ишин.
  • Ата – билек, ана – джюрек!
  • Таш бла ургъанны, аш бла ур.
  • Аджашханны ызындагъы кёреди, джангылгъанны джанындагъы биледи.
  • Босагъа таш юйге кирмей эди, тыбыр таш эшикге чыкъмай эди.
  • Тюзню ётмеги тюзде къалса да, тас болмаз.
  • Борчунг бар эсе, хурджунунга ойлаб узал.
  • Чабакъсыз кёлге къармакъ салгъанлыкъгъа, чабакъ тутмазса.
  • Ышармагъан – кюлмез, кюлмеген – къууанчны билмез.
  • Таукел адам тау тешер.
  • Эринчекге кюн узун.
  • Окъугъан озар, окъумагъан тозар.
  • Аууз сакълагъан – джан сакълар.
  • Кечеси – аяз, кюню – къыш, джарлы къаргъагъа бир аш тюш!
  • Болджал ишни бёрю ашар.
  • Босагъагъа джууукъ орун болса, ашыгъыб тёрге озма.
  • Ётюрюкчюню шагъаты – къатында.
  • Экиндини кеч къылсанг, чабыб джетер ашхам.
  • Халкъгъа джарагъан, джарлы къалмаз.
  • Чалманны аллы къалай башланса, арты да алай барады.
  • Сёлеш деб шай берген, тохта деб, сом берген.
  • Телиге от эт десенг, юйюнге от салыр.
  • Кёбню кёрген – кёб билир.
  • Тюзлюк шохлукъну бегитир.
  • Къарыусузгъа кюлме, онгсузгъа тийме.
  • Бет бетге къараса, бет да джерге къарар.
  • Адамны адамлыгъы къыйынлыкъда айгъакъланады.
  • Аман хансны – урлугъу кёб.
  • Ач отунчуну ачыуу – бурнунда.
  • Малны кют, джерни тюрт.
  • Къулакъдан эсе, кёзге ышан.
  • Ётюрюк хапар аякъ тюбю бла джюрюйдю.
  • Акъылсызны джууукъгъа алма, акъыллыны кенгнге салма.
  • Минг тенг да азды, бир джау да кёбдю.
  • Тюзлюк тас болмайды.
  • Кёбге таш атма.
  • Чакъырылмагъан къонакъ – орунсуз.
  • Ким бла джюрюсенг, аны кёзю бла кёрюнюрсе.
  • Къатын къылыкъсыз, эр тынчлыкъсыз.
  • Этек чакъмакълары баш джаргъан, сёлешген сёзлери таш джаргъан.

Форум

Форум / Бёлюмле :: Тематические разделы / Ана тилде :: Ana tilde
Страницы: 1
Беш Тау Эл сагъынылгъан не да Анга аталгъан чыгъармаланы сала барайыкъ былайгъа., ЭЛ - магагъанасы кенг, терен, уллу, мийик ангыламды. Эл - эл, Эл - кърал, Эл - джурт, Эл - дуния...
 
#1
Джаратама0
25.04.2016 02:36:33 Translit
БАБАЛАНЫ Ибрахим

БЕШАТАР

Беш тау элни
Беш да тары -
Олду мени
Бешатарым.
 
 
 
#2
Джаратама0
25.04.2016 02:39:06 Translit
ЛАЙПАНЛАНЫ Билал

БЕШ ТАУ ЭЛ - БЕШ УУАХТЫ НАМАЗ

Бир джурт болмаз Джерде Кавказча,
Минги Тау да – тёппеси аны.
Беш Тау Эл – беш ууахты намазча,
Кёк нюрюнде джулдуз бла Айны.

«Беш Тау Элни беш да тары –
Олду мени бешатарым»,-
Дегенди Ибрахим Баба,
Джуртдан кёл да, сёз да таба.

Хау, Беш Тау Эл – беш ууахты намаз,
Бешатар ушкок да бизге.
Терсликни Аллах унамаз,
Джол берир Тюзлюкге, Тюзге.

Бизге къазгъан урусуна
Душман кеси тюшмей къалмаз.
Халкъны тынглайма ауазына:
Беш Тау Эл – беш ууахты намаз.
 
 
 
#3
Джаратама1
25.04.2016 02:41:55 Translit
ЁЗДЕНЛАНЫ Альберт

ДЖАНЫМ КЪУРМАН БОЛСУН МАЛКЪАРГЪА
(джыр)

Жюрегингде пелиуанлыкъ жашагъан,
Ариулугъу сюймекликге ушагъан,
Тау намысы ушап тауда акъ къаргъа...
Жаным къурман болсун Журтум Малкъаргъа!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

Зар кёз тие кёк суууна,ташына,..
Ариулугъу душман бола башына,
Таш башында амал тапхан жашаргъа,
Жаным къурман болсун тажал Малкъаргъа!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

Тешдиртмеген тинин зорлукъ садакъгъа,
Сюргюнде да тилемеген садакъа,
Дерт тутмагъан Аллах берген къадаргъа,
Жаным къурман болсун шыйых Малкъаргъа!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!

Жаным саудан ачхан жандет эшигим,
Ёлсем, ырахат жукълар топуракъ бешигим,
Ата Журтум, Ана Сютюм, Къадарым-
Жаным къурман болсун санга, Малкъарым!

Мен бетиме салсам къолун анамы,
Беш бармагъын Беш Тау Эли сунама,
Эринлерим сыласала аланы,
Сау Малкъарны уппа этген сунама!
 
 
 
#4
Джаратама0
25.04.2016 02:42:55 Translit
ЖАБЕЛЛАНЫ Лаура

МАЛКЪАРЫМ

О, Малкъарым, санга тансыкъдан бирде
булутланы къарлы таугъа ушатдым,
Аллах айтып, жашнап тургъун ёмюрде,
тансыкълыгъым – сюйгениме шагъатым.

Беш Тау Элим, сен – беш учлу жулдузум,
умутуму, ийнамымы бешиги...
Чурум бир кёп, амал – къысха, жол – узун,–
ачармамы жан тынчлыкъны эшигин ?

Жарсыуладан болгъан кибик ышыгъым,
кёрюнесе Жаннет кибик кёзюме,
анамача, къучагъынга ашыкъдым,
къор болайым жайларынга, кюзюнге!

Алты харфынг тёрт санымдан багъалы,
жан тамырым – Эркинликни ёзени.
Къыйынлыкъда чыдай билген Малкъарым,
Фирдауусда тапха эдим мен сени...
 
 
 
#5
Джаратама1
26.04.2016 00:35:43 Translit
Зумакъулланы Танзиля

МАЛКЪАРЫМ

Беш тау элинг жашар ючюн бу ташда,
Ёхтемликде, ачыу кёрмей, къууанчда,
Беш да жаным болса, барын берирем,
Ташларынгы мен къучакълай ёлюрем!
Манга саугъа къаты ташынг, акъ къарынг,
Тюз ниетли, татлы тилли Малкъарым!

Намыс, сыйны бийикледе туталгъан,
Сёз айтханда, дуния эштирча айталгъан.
Тепсегенде, дуниягъа къарс кьакъдыргъан,
Ташда от да, ташда гюл да чакъдыргъан.

Къула тюзге къуйгъанда жашын, къартын,
Кёмген суна ёмюрлеге журт отун,
Жаннган отдан жанмагъанлай чыгъалгъан,
Тобукъланмай, намысында къалалгъан,
Ахшыларын миндиралгъан ёрлеге,
Къартларын да олтурталгъан тёрлеге,
Малкъар! Мени къарыусузгъа санама,
Къыйын кюнде тыянч болур балангма.

Ичлеринде ёмюр жарсыу къайнагъан,
Ачыуладан ёз ташларын чайнагъан
Тауларынгы мен тиллерин ачарма,
Жарытырма, къайгъыларын чачарма.

Сен чыкъ десенг, къазауатха чыгъарма.
Къажауунгу мен, окъ болуп, жыгъарма.
Къызыу болсанг, жауун болуп, жауарма.
Сууукъ болсанг, отун болуп жанарма.

Тыпырынгы жаныуумда жылыта,
Барын - ёрню, энишни да жарыта,
Бушууунгу, жарсыуунгу къурута,
Сау дуниягьа иги бла таныта,
Къууанчынга ахшыланы жыярма,
Этегинги алтын бла къыярма.

Аллах айтып, муратыма жеталсам,
Ёлмез кибик, санга тенг жыр эталсам,
Керти окъун халкъ шайыры болурма,
Бу тауланы нарт шайыры болурма,
Ёмюрлеге жумуш эте турурма.
Изменено: shaudan - 26.04.2016 00:38:36
 
 
 
#6
Джаратама1
26.04.2016 01:28:18 Translit
Нашла в теме тексты песен. Автора не знаю.

*Беш тау элден къуралгъан*

Беш тау элден къуралгъан,
Беш тау элден туралгъан,
Малкъарны тансыкълайма мен.
Анабызны сютюча,
Аны туз гыржыныча,
Сюе эсде тутама мен.
Сюеме тау кырдыкны,
Жаз башы чуакъ кюнню,
Малкъарны танг ариулугъу
Омакъдан омакъ чагъа,
Журтунга юлгю сала,
Келедиле санга сукълана.
Бийик баргъан къаяларынг,
Ахырсыз шауданларынг,
Элиме къууат бередиле.
Тауласыз Малкъар болмаз,
Таулусуз Малкъар онгмаз
Ма олду мени айтырым.
Если радость придет, радость прими
И не гордись, будь достоин ее.
Если горе придет, губы сожми
И не страшись, будь достоин его.

К. Кулиев
 
 
 
Страницы: 1
Читают тему (гостей: 1)

Форум  Мобильный | Стационарный