«Эльбрусоидни» огъурлу муратлары
Уллу Хорламны 70-жыллыгъы бла байламлы «Эльбрусоид» фондда хар айдан бир-эки кере Уллу Ата журт урушха жораланнган фильмле кёргюзтюллюкдюле. Бу кюнледе уа анда жаш адамла «Отец солдата» деген киногъа къарагъандыла.
Андан тышында фондну Интернетде сайтында энчи проект бардырылады. Анда урушха къатышхан таулу жашларыбызны юслеринден информация эмда суратлары хар кюнден берилип турлукъдула. Биринчи ала къазауатны жигитлерини эм бу атха кёргюзтюлген аскерчилени юслеринден жазып башлагъандыла. Бу ишни тамамлагъан Жеккеланы Ася айтханнга кёре, материалланы ала «Балкарский народ в годы войны и депортации 1941-1957 г.г.» (авторлары: С.И. Аккиева, Х.-М.А. Сабанчиев) деген китапдан, Интернетде сайтлада, газетледе неда аскерчилени жууукъ-ахлуларындан соруп табадыла.
Школчуланы араларында да «Мени аппам жигитди» деген проект бардырылады. Аны мураты - къазауатха къатышхан ата-бабаларыбызны юсюнден кёбюрек шартла жыйыуду эмда сабийле кеслери да аллай жууукъларыны юслеринден асламыракъ билирча этиудю.
Бу ишлени юслеринден айта, фондну республикада бёлюмюню башчысы Аналаны Марат жаш тёлю бизни аскерчилерибизни жигитликлерини юсюнден, хорламны ала тенгли уланла келтиргенлерин билирге керек болгъанларын белгилейди. «20-25 жылларында ала кишилик этгендиле, аны эсде тутаргъа, уллу ыспас, хурмет этерге тийишлиди. Юлгюге Совет Союзну Жигити Байсолтанланы Алимни келтирейим. Ол туугъан жерин къоруулай жоюлгъанында, анга жангыз да 24 жыл толгъан эди. Жашланы, къызланы Ата журтха сюймекликде ёсдюрюу бла байламлы эмда Уллу Хорламгъа жораланнган битеу ишлеге да «Эльбрусоид» тири къатышырыкъды», - дегенди ол.
Кульчаланы Зульфия.
