Войти на сайт
26 Июня 2026 года

 

  • Ёгюзню мюйюзлери ауурлукъ этмейдиле.
  • Ётюрюк хапар аякъ тюбю бла джюрюйдю.
  • Къатын байлыкъны сюер, эр саулукъну сюер.
  • Ойнай-ойнай кёз чыгъар.
  • Хатерли къул болур.
  • Иесиз малны бёрю ашар.
  • Акъыл аздырмаз, билим тоздурмаз.
  • Чомарт джарлы болмаз.
  • Хар сёзню орну барды.
  • Таукел тауну аудурур.
  • Джаз бир кюнню джатсанг, къыш талай кюнню абынырса.
  • Байлыкъдан саулукъ ашхыды.
  • Джаш болсун, къыз болсун, акъылы, саны тюз болсун.
  • Экеу тутушса, биреу джыгъылыр.
  • Ариу сёз – къылычдан джити.
  • Ачлыкъ отха секиртир.
  • Ашхы болсанг, атынг чыгъар, аман болсанг, джанынг чыгъар.
  • Ёмюрлюк шохлукъну джел элтмез.
  • Тик ёргени, тик энгишгеси да болады.
  • Келинин тута билмеген, къул этер, къызын тута билмеген, тул этер.
  • Кёрмегеннге кебек – танг, битмегеннге сакъал – танг.
  • Эки итни арасына сюек атма, эки адамны арасында сёз чыгъарма.
  • Терслик кетер, тюзлюк джетер.
  • Махтаннган къыз, тойда джукълар.
  • Джангыз терек къынгыр ёсер.
  • Намысы болмагъанны, сыйы болмаз.
  • Шекер бла туз – бир болмаз, ушамагъан – юй болмаз.
  • Адам сёзге тынгыла, акъыл сёзню ангыла.
  • Онгсузну – джакъла, тенгликни – сакъла.
  • Тюзлюк тас болмайды.
  • Айыбны суу бла джууалмазса.
  • Акъыллы айтыр эди, акъылсыз къоймайды.
  • Кёз – сюйген джерде, къол – ауругъан джерде.
  • Къонакъ аман болса, къонакъбай джунчур
  • Эл ауузу – элек, анга ийнаннган – халек.
  • Къарын къуру болса, джюрек уру болур.
  • Ашын ашагъанынгы, башын да сыйла.
  • Тин – байлыгъынг, терен саулугъунг.
  • Чомартны къолун джокълукъ байлар.
  • Башланнган иш битер, къымылдагъан тиш тюшер.
  • Аман къатын сабий табса, бий болур…
  • Тёрде – темир таякълы, къаяда – чыпчыкъ аякълы.
  • Къоркъакъны кёзю экили кёрюр.
  • Чабакъгъа акъыл, табагъа тюшсе келеди.
  • Бети бедерден, намыс сакълама.
  • Эринчекни эр алмаз, эр алса да, кёл салмаз, кёл салса да, кёб бармаз!
  • Киштикге къанат битсе, чыпчыкъ къалмаз эди.
  • Эл бла кёргенинг эрелей.
  • Ауругъаннга – кийик саулукъ, джетген къызгъа – чилле джаулукъ.
  • Тёрени джагъы джокъ.

 

Архив Форума » Зеленый Форум [архив] » - ЗФ - Ана тилибизде
Страницы: Пред. 1 ... 17 18 19 20 21 ... 62 След.
RSS
Келигиз, тил байлыгъыбызны сакълайыкъ!
 
#451
Джаратама0
07.03.2008 16:56:57
Сюйюнчланы А
Салам Алейкум! Бек джаратдым назмугъузну , сау болугъуз!
 
 
 
#452
Джаратама0
07.03.2008 16:58:45
Сюйюнчланы А
Тиширыугъа къанат берген, аны джюрегин къууандыргъан да эркишиди, бюгюн заман табыб, форумну къызларын байрам бла алгъышлагъаныгъызгъа сау болугъуз. Аллах тутхан ишигизден къууандырсын, хар заманда да джылы сёзлеригиз бла джюреклеге джол табасызда, Аллах сизге саулукъну, насыбны къызгъанмай берсин!
 
 
 
#453
Джаратама0
07.03.2008 17:01:57
ТАУ АШХАМЛА

Алтын кюн батад, кюле-ышара,
Тау шоркъалада джууунуб,
Джашил наратла, субай бусакъла
Шош джукълайдыла къубулуб.

Кёксюл ингирде шохлукъ от джанад,
Ёзенни ичин джарытыб.
Сейирди джазыу: айырыб къояд,
Джашау джоллада танытыб.

Тау ашхамланы сен да сюй, ариу,
Мен да бир кемсиз сюйгенме.
Ингир кёзюуде от джарыгъында
Сени беринчи кёргенме.

Ашхам кёз байлад ингир алада,
Сени зар кёзден джашыра,
Биз олтурабыз таза хауада,
Джаннган отчукъну ышыра.

Джюрек джюрекни сёзсюз ангылайд,
Сюймеклик болса джюрекде.
Быллай огъурлу насыб ашхамла
Келиб турсунла хар кюнде.
 
 
 
#454
Джаратама0
07.03.2008 18:39:41
Сюйюнчланы А
Къалай ариу суратлай билесиз тиширыуланы сыфатларын. Сау болугъуз!
 
 
 
#455
Джаратама0
07.03.2008 20:48:40
Сюйюнчланы Азаматны айтханына биз джукъ къошаллыкъ болмазбыз, аныча ариу сёлеше билмейбиз. Насыблы болугъуз къызла. Мени атымдан да Азаматха тилерим, мадарыгъыз болса энтдандада бир назму джазсагъыз а къызлагъа!
 
 
 
#456
Джаратама0
07.03.2008 23:23:35
Багъалы шохларым! Сизни тилегигизни къабыл эте, энтда къызлагъа бир назмуну атайма.
АЛТЫНЧАЧ

Сени ала кёзлерингде
Кёк тенгизни джети къаты,
Сагъышлагъа батдырады,
Хаман мени терен тартыб.

Чырай тёкген сен бир тенгиз,
Джокъду чурум чырайынга,
Джюрегим бла батханма да,
Чыгъалмайма мен сайына.

Алтын толкьун тарайд чачынг,
Джюрегими къылларында,
Къайда эдинг, о, алтынчач,
Мени эркин джылларымда?

Алтын суудан толгъанма мен,
Толгъанма мен, толгъанма мен,
Сюймеклегим тот болмазча,
Тот болмазча болгьанма мен.

Чачынга ушаш джылтрауукъ
Имбашынгда чилле джаулукъ.
Меннге аны учун узат,
Мени таба атлаб джууукъ.

Чырай тёкген сен бир тенгиз, ,
Джокъду чурум чырайынга,
Джюрегим бла батханма да,
Чыгъалмайма мен сайына.
 
 
 
#457
Джаратама0
08.03.2008 14:55:57
Сюйюнчланы А
Быллай бир къадар ариу назмуну кимге джазыб тургъансыз?
 
 
 
#458
Джаратама0
10.03.2008 18:23:52
Акъыллычыкъ
Да болур эди джазар адамы, огъесе сеннге джазсамы сюе эдинг?
 
 
 
#459
Джаратама0
11.03.2008 13:15:19
Алтын кюн батад, кюле-ышара,
Тау шоркъалада джууунуб,
Джашил наратла, субай бусакъла
Шош джукълайдыла къубулуб
ДЖАНДАН ТАТЛЫ АТА ДЖУРТУМУ суратлары!!!!!
 
 
 
#460
Джаратама0
12.03.2008 01:21:08
Джюрек джюрекни сёзсюз ангылайд,
Сюймеклик болса джюрекде.
Быллай огъурлу насыб ашхамла
Келиб турсунла хар кюнде.

Къуанчлы болсун бюгюнгю ашхамыгъыз !
Джамагъат келигиз бери , ана тилибизни сакъларгъа!
 
 
 
#461
Джаратама0
12.03.2008 16:17:14
Кергелен
ана тилибизни сакъларгъа!
Бу сёзлени кёргенимде эсиме келди, кёб болмайын, Къарачай шахарны мэриясында ишлеген "Алан" атлы аналитический центр шахарчыланы ичинде опрос этгенди. Ана тилибизни бюгюнгю болумун ачыкълайды ол опрос. Бусагъат таба эсем, джазайым.
 
 
 
#462
Джаратама0
12.03.2008 19:58:04
Девушка Гор
Ана тилибизни бюгюнгю болумун ачыкълайды ол опрос
Къарачай шахарда болумун огъесе элледеми? Шахардан элде игирек болур болум?
 
 
 
#463
Джаратама0
12.03.2008 21:41:41
Акъыллычыкъ
Девушка Гор

Къызла,къайда тассыз?Тансыкъ этдигиз кесигизге.
 
 
 
#464
Джаратама0
12.03.2008 21:43:26
Девушка Гор
САкълайма опросунгу.
 
 
 
#465
Джаратама0
13.03.2008 14:19:18
Акъыллычыкъ
Къарачай шахарда болумун огъесе элледеми? Шахардан элде игирек болур болум?
Опрос Къарачай шахарда этилгенди, алай а, элледе да андан игиди деб турмайма болум.
 
 
 
#466
Джаратама0
13.03.2008 19:58:38
Кёб болмайын, Къарачай шахарда, миллет ана тилин билемиди, деген соруугъа джууаб табар мурат бла опрос этилген эди. Ол опросну соруулары къыйын тюл эдиле:
1) Сиз къайсы тилде сагъыш этесиз кёбюсюне?
2) Сиз ишлеген, окъугъан джерде къарачайлыла кёбмюдюле, огъесе башха миллетни адамларымы?
3) Ана тилин билмеген адам нени тас этеди:
а) миллетлигин, б) культурасын, в) адетлерин
4) Къарачайча сёлешген заманыгъызда башха тилледен сёзлени къаллай бир хайырландырасыз?
100%, 70%, 50%, 20%, 5%
5) Адамла ана тиллерин иги билир, аны сыйын мийикде тутар ючюн не этерге керекди:
а) Къарачай тилде кёб сёлеширге, б) миллетин сюерге, в) школда ана тилни иги окъургъа, г) тилни сан этмей, сыйын кёрюрге, д) къарт атала бла анала бла кёбюрек ушакъ этерге, е) ана тилибизде джырлагъа тынгыларгъа
Бу соруулагъа джууабла 160 къарачай адам бергенди. Аланы ичлеринде джаш адамла, къартла да бар эдиле.
Опросха кёре, белгили болгъаны: миллетни 51% -ти орус тилде сагъыш этеди, къарачай тилде уа къуру 49%.
52% ишлеген. окъугъан джерлеринде башха миллетле бла къатышыбдыла, 48% уа къуру да къарачайлыланы ичинде ишлейдиле.
3-чю соруугъа берилген джууаблагъа кёре, ана тилин билмеген адамланы 28%-ти миллетликлерин тас этедиле, 38%-ти культураларын, 34% адетлерин. Сёлешген сагъатда къуру да орус тилде 2% къарачай адам сёлешеди, адамланы 70%-ти 14% орус сёз къошады ушагъына, 50%-ти уа 36%.
Миллет ана тилини сыйын кёрюр ючюн не этерге керекди, деген соруугъа 33% адам къарачай тилде сёлеширге дейди, 25,5% миллетин сюерге дейди, дагъыда аллай бири, 25,5% сагъыш этгеннге кёре, тилни гитчеликден школда окъургъа керекди, 4% айтханнга кёре уа тилни унутмай, аны сакъларгъа керекди дедиле. къарт атала бла анала бла кёбюрек ушакъ этерге керекди деб 10% айтдыла, 2% айтханнга кёре къарачай тилде джырлагъа тынгылай турургъа керекди.
 
 
 
#467
Джаратама0
13.03.2008 20:14:17
Девушка Гор
Былай табсызды деб турмай эдим чотубуз
 
 
 
#468
Джаратама0
13.03.2008 20:25:53
Салам джашла, къызла!!!

Девушка Гор
Сау бол алтынчыкъ,бек сеир хапар айтаса.
Къарачайны киндигинде джашаб. Къобан бла Тебердини суун ичиб адамла башха тилде сагъыш этгенлери. тюшлери да алай болур!!
 
 
 
#469
Джаратама0
13.03.2008 22:34:03
Rassel
Ана тил эки тюрлю болады:
Аууз тил бла джазма тил
Аууз тил ? энчи азыкъ,
Джазма тил ? дунья байлыкъ.

Ана тилни тикирал (толу) билир ючюн, 3 устазы болургъа керекди: ата-ана, школда устаз, ючюнчюсю ? китаб.
Джашау буйругъуна кёре, адамны къуллугъуна кёре,
туугъан джерден айырылгъан, китабны хайырланыб, ана тилден билим алыргъа боллукъду.
Китабла быладыла:
Азбука. Грамматика. Джазыучуланы китаблары. Сёлешиу сёзлюк. (Словарь - разговорник).
Къарачай-малкъар тил ? джазма тил болгъаны себебли, кърал аралыкъ, регион башчылыкъ быллай китабланы миллетни санына кёре кърал бюджетни сметасына (ачхасына) чыгъарыргъа борчлудула. (Ученые говорят, когда 30% детей не говорят на родном языке, язык умирает)
Китабла ич магъналары, тыш суратлары бла ариу болургъа, хар ким да сюйюб къолда тутарча, бусагъатда полиграфияны джараджасында басмаларгъа керекдиле. Бу законну оноучула алкъын тыйыншлычыса толтуралмайла. Школ учебниклени къол джазмалары бёлек джылны джатадыла окъууну министерствосунда
Ана тилни, миллет культураны сыйын кёлтюрген меценатла хар бири бирер китаб чыгъарсала, уллу саугъа этерик эдиле ана тилни сакъларгъа. Азамат
 
 
 
#470
Джаратама0
13.03.2008 22:55:02
Ингиригиз ашхы болсун!
Сюйюнчланы А

Багъалы АЗАМАТ -ЭФЕНДИ , СИЗНИ ма бу сезлеригизни 20 дж. болгъан къызгъа азбар этдирдим.Ана тил эки тюрлю болады:
Аууз тил бла джазма тил
Аууз тил ? энчи азыкъ,
Джазма тил ? дунья байлыкъ.

Ана тилни тикирал (толу) билир ючюн, 3 устазы болургъа керекди: ата-ана, школда устаз, ючюнчюсю ? китаб.
 
 
 
#471
Джаратама0
13.03.2008 22:59:19
Мардасыз САУ болугъуз.

Бизге ма былай ушакъ этерге мадар табтыргъанла -КЕБ джашасынла.
МИЛЛЕТИБИЗ бла СЫЙЛЫ болсунла.
 
 
 
#472
Джаратама0
14.03.2008 21:19:09
Девушка Гор
миллетни 51% -ти орус тилде сагъыш этеди,
сагъыш этгенине кёре сёлешгени себебли, аллай адамла къарачай тилде чыртдан да сёлешмеймидиле?
 
 
 
#473
Джаратама0
15.03.2008 14:19:10
Акъыллычыкъ
Иги айтдынг сен, сагъыш башха тилде этсе, къарачай тилде къалай сёлеширикди?
Девушка Гор
Бу опрос эртде этилген болур, мени ангылагъаныма кере, бюгюнликде чот мундан аманды
Кергелен
Тюз айтаса, элинде-джеринде лджашагъан адамла тил байлыкъларын сакъларгъы уллу сагъыш этмейдиле, башха джердегилеча.
 
 
 
#474
Джаратама0
16.03.2008 19:19:56
Кюнюгюз ашхы болсун джамагъат!!

АНА тилибизден бир юлюш этеим деб киргенме.
Сиз да кире туругъуз джаш телю.
ДЖУЛДУЗЛАНЫ атларын джазаим.

АЙ- луна.
АКЪ джулдуз - сириус.
АКЪРАБ дж.--скорпион
АЛТАУ дж.--нептун
АШХАМ дж.---вечерняя Венера,
БАЙРЫМ дж.--марс.
БАЛЫКЪ дж.--- созвездие рыбы.
Боюнсхала--сзвездие весов.
БУГЪАЧАР--телец.
ГИДА- созвездие ориона.
ГЕГЕНЧИ--водолей.
ГОЧАР--овен.
ДЖЕР- земля.
ДЖЕТЕГЕЙЛИ--Б. медведица.
ИЛКЕР-- созвездие плеяды.
КАТИБ--меркурий.
КЕГЕТ дж--стожары.
КЕРУАН КЪЫРГАН--юпитер.
КЮН---солнце.
КЪАНДАУР--кентавр.
КЪАУАЛ---стрелец.
КЪОЙ джол--млечный путь.
КЪЫБЫЛА дж.--конопус.
ПОКУН дж.--козерог.
САРЫГЪАЙЛА---М. медведица.
САРЫТОН-СЮРЮУЧЮ дж---сатурн.
ТАНГ ДЖулдуз --утренняя Венера.
ТЕМИРКЪАЗАКЪ---полярная звезда.
ТОТАЙ дж.--созвездие девы.
ХАЙДАР дж.--созвездие льва.
ТОРУайгъыр.САРЫ айгъыр-- звезды из созв. Б. Медведицы.
ЧАРТАН дж--- созвездие рака.
ЧОЛПАН---Венера.
ЭГИЗ дж.--близнецы.
ЭШТАР--восмиконечная звезда.
 
 
 
#475
Джаратама0
16.03.2008 19:26:58
Кергелен
Къайдан билеме сен быллай бир затны, машалла! Тюзюн айтсам мен быланы кёбюсюнден асламысын билмей эдим. Чолпан - эртденнги джулдуз болгъанын биле эдим къуру
 
 
 
#
Джаратама0
 
 
 
#
Джаратама0
 
 
 
Страницы: Пред. 1 ... 17 18 19 20 21 ... 62 След.
Читают тему (гостей: 16)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.