Войти на сайт
25 Июня 2026 года

 

  • Терек ауса, отунчу – кёб.
  • Къууут – джелге, берне – бошха.
  • Иги адам абынса да, джангылмаз.
  • Татлы тилде – сёз ариу, чемер къолда – иш ариу.
  • Чомартны къолун джокълукъ байлар.
  • Ойнай-ойнай кёз чыгъар.
  • Душманны тышы – акъ, ичи – къара.
  • Къонагъынгы артмагъын алма да, алгъышын ал.
  • Ургъан суудан башынгы сакъла.
  • Малны кют, джерни тюрт.
  • Кёб джат да, бек чаб.
  • Хар адамгъа кеси миннген тау кибик.
  • Ашхы адам – халкъ байлыгъы, ашхы джер – джашау байлыгъы.
  • Башланнган иш битер, къымылдагъан тиш тюшер.
  • Ишин билген, аны сыйын чыгъарады.
  • Аш берме да, къаш бер.
  • Арбаз сайлама да, хоншу сайла.
  • Кёзюнде тереги болгъан, чёбю болгъаннга кюле эди.
  • Ашарыкъда сайлагъаннга – чий гырджын.
  • Гугурук къычырмаса да, тангны атары къалмаз.
  • Сакъламагъан затынга джолукъсанг, не бек къууанаса, не бек ачыйса.
  • Тиширыусуз юй – отсуз от джагъа.
  • Байны оноуу, джарлыгъа джарамаз.
  • Келинин тута билмеген, къул этер, къызын тута билмеген, тул этер.
  • Къобан да къуру да къобханлай турмайды, адам да къуру да патчахлай турмайды.
  • Шапа кёб болса, аш татымсыз болур.
  • Элиб деген, элге болушур.
  • Эки къатын алгъанны къулагъы тынгнгаймаз.
  • Экеу тутушса, биреу джыгъылыр.
  • Кёзню ачылгъаны – иги, ауузну джабылгъаны – иги.
  • Джылар джаш, атасыны сакъалы бла ойнар.
  • Билеги кючлю, бирни джыгъар, билими кючлю, мингни джыгъар.
  • Къралынгы – душмандан, башынгы от бла суудан сакъла.
  • Эм ашхы къайын ана мамукъ бла башынгы тешер.
  • Тёрде – темир таякълы, къаяда – чыпчыкъ аякълы.
  • Ач отунчуну ачыуу – бурнунда.
  • Джигер – джаннга къыйынлыкъ.
  • Джарлыны эшигин махтагъан джабар.
  • Ёксюзню тилеги къабыл болур.
  • Къайгъы тюбю – тенгиз.
  • Этни да ашады, бетни да ашады.
  • Аман киши кеси юйюнде – къонакъ.
  • Ачыкъ джюрекге джол – ачыкъ.
  • Илму – джашауну джолу.
  • Ат басханны джер билед.
  • Эшекге миннген – биринчи айыб, андан джыгъылгъан – экинчи айыб.
  • Адам сёзюнден белгили.
  • Ётюрюкню къуйругъу – бир тутум.
  • Нафысынгы айтханын этме, намысынгы айтханын эт.
  • Билим насыб берир, билим джолну керир.

 

Архив Форума » Зеленый Форум [архив] » - ЗФ - Ана тилибизде
Страницы: Пред. 1 ... 9 10 11 12 13 14 След.
RSS
КЕЛИГИЗ ДЖЫРЛАЙЫКЪ
 
#251
Джаратама0
02.09.2010 06:49:36
ЁЗДЕНЛАНЫ САПАР

ХХХ

Сен ёхтемсе, билеме мен аны.
Тенг этмейсе джукъну кесинге.
Саугъагъа сюймеклик берген джазны
Къысмайса менича бетинге.

Джашыраса, билеме, хо алайды.
Менден сора да бард сени биринг.
Сенсиз насыб а меннге Къарачайды,
Алдаса, джюрекни джюрегинг.

Билмейсе, былай бла кёб бармам,
Тартына, уяла, аллынга.
Орамда къуру сени бла мен къалсам,
Сормай тиерикме чачынга.

Джазгъы чачынгы джазгъы джылыуу
Тюбер мени бла талай джыллагъа.
Дуниямы сенсиз сейир джазыуу
Джукъ фахму къоярмы джырларгъа

Эштемисе, башха элге кетсенг да,
Джашау кеси тюбешдирир бизни.
Аллыма къарт амма болуб келсенг да,
Къучакъларыкъма чачынгы сени.
 
 
 
#252
Джаратама0
02.09.2010 07:04:59
Х А С А У К А
(халкъ джыр)

Къычырады Дауле: - Хахай, къуугъун!
Къарачайны шохун барын, джууугъун
Чакъырыгъыз, бизге дженгил джетсинле,
Къара кюнде бир болушлукъ этсинле!

Гяуур патчах кёб артыкълыкъ этеди,
Марджа, джашла, орус аскер джетеди.
Аладыла этибизден тоймагъан,
Таргъа тыйыб, джашаргъа да къоймагъан.

Джау келгенди, Хасаукагъа киргенди,
Таб джолланы Амантишден билгенди.
Чанка бийди бизни сатыб къоярыкъ,
Къарачайны багъасындан тоярыкъ.

Джау келгенди кесин бизден джашырыб,
Джау киргенди ит Атаджокъ ашырыб.
Чыгыр къабан намыс-сый деб билмейди,
Эр Къарачай зорлукъгъа ийилмейди.

Къабартыды орус итге теблетген,
Джау аскерин тау тарлагъа тебретген.
Анттыймазла къара зарлыкъ этелле,
Ала чекден асыры бек ётелле.

Урлаб-тырнаб, ауурланыб джаталла,
Адамларын малланыча саталла.
Къайдан чыкъды бу ит къауум Капказгъа?!
Антмы этгенд халал къыйын къабмазгъа?!

Шам Къарачай улан этиб ёсдюрген
Атаджокъду душманланы юсдюрген.
Ол генезир бизге джаулукъ этеди,
Хайда, джашла, орус аскер джетеди.

Ол таяныб, душманлагъа-джаулагъа,
Ие болур мурат этед таулагъа.
Юлюш излеб чабады къул Къабарты,
Аман бла бошаллыкъ болур арты.

Атаджокъла ? инаралны тенглери,
Тенглери тюл ? этеклери-дженглери.
Ол къауумду бизни ачыкъ джауубуз,
Ала бла кемсиз кёбдю дауубуз

Ол инарал бизни хорлаб алалса,
Тырнакъларын юсюбюзге салалса,
Джыртыб, талаб, мууал этиб къояред,
Джасакъ бла терибизни сояред.

Ачыудан биз къайнагъынчы, бишгинчи,
Ол залимни тузагъына тюшгюнчю,
Бирлешейик, кенгдегин да джокълагъыз,
Тар ёзенде джуртубузну сакълагъыз.

Тау асланла хазыр болуб чыгъыгъыз,
Джау аскерни дженгил-дженгил джыгъыгъыз.
Ойнатыгъыз сампаллада къолланы,
Къызартыгъыз Хасаукада джолланы.

Эбекку улу от къалагъа кетгенди,
От алыргъа кёб дыгалас этгенди.
Ырхы басыб, от ёзекни джабханды,
"Ай медет!" деб, Дауут эрнин къабханды.

Излей кетиб, бир уууч от табханды,
Анга къошар затла излеб, чабханды.
Залыкъылды табыб, аны эзгенди,
Кюкюртню да къошуб, отну сюзгенди.

Ёлчелеге къуюб аны тиздиле,
Мычымай къоргъашын окъла джюздюле.
Бир базыкъны ёшюнюнден тийдиле,
Аллай кёбню къая раннга ийдиле.

Джигерлени-джигитлени къолунда,
Тау мылтыкъла этер сауут болдула.
Хасауканы айланч-буйланч джоллары
Шындык-шындык ёлюкледен толдула.

Джигит таулу ёхтем-ёхтем джекиред,
Ташдан-ташха джел ургъанча секиред.
Таукел улан инаралны ёлтюрсюн,
Башын кесиб аны бизге келтирсин.

Батыр Умар гёджебсиниб атлайды,
"Къоркъмагъыз!" деб, джаугъа къаршчы чартлайды.
"Джетигиз!" деб, нёгерлерин сакълайды,
Атады да алчыларын къаблайды.

Ма окъ тийди бизни джигит Умаргъа,
Аман кюнде джер салгъаненг Чубаргъа.
Керек эдинг, быллай кюннге тууаргъа,
Даулет барад, кёзлеринги джумаргъа.

От бошалыб, окъ бошалыб къалса да,
Ташла-агъачла окъча, тобча джаудула.
Асланланы къурч беллери талса да,
Абычарла чаууллагъа аудула.

Бу къазауат бек узакъгъа барлыгъед,
Инаралны баш токъмагъын аллыгъед.
Аскерибиз азды, саны толмайды,
Сауут кюч да биз сюйгенча болмайды.

Тизгинлешиб, ёзенни ёрге джау кирди,
Батыр Къайтукъ сабийлеге кёл берди:
- Таулучукъла, сиз да ёсюб джетерсиз,
Бу къан дертни джууабларын этерсиз.
 
 
 
#253
Джаратама0
03.09.2010 04:51:45
Ш Е Й И Т У М А Р

Эки атыб тютюнюн бир этиучю,
Умар, санга бюгюн къанмы джаугьанды?
Керек болса, къанатлыча джетиучю,
Тулпарланы бири къайда къалгьанды?

Къарачайны сакълар ючюн ол бюгюн,
Джанын берди, чаууллагьа сойланыб.
Излейик биз аждагьанны ёлюсюн,
Аны дертин алыргьа деб ойланыб.

Юсюндемед аны къара джамчысы?
Джыгъылмайын турамеди атында?
Къайда тамды къаныны арт тамчысы?
Айшатчыгьы болмадымы къатында?

Къой сюрюуге къазакъ бёрю киргенлей,
Сау аскерни къырыб тюзню толтурдунг.
Къараб артын энтда къалын кёргенлей
Атаргьа деб, бетджанынга олтурдунг.

Джаула сени кесгендиле джолунгу,
Бетджанынгы таш артына салгьанса.
Окъла тийиб юзгендиле къолунгу,
Шкогунгу сол къолунга алгьанса.

Джигитлигинг санларынга сингнгенди,
Башлыгьынгы сен къолунга чулгьадынг.
Тулпар кибик, таш башына миннгенлей,
Къылычынгы джаула таба булгьадынг.

Къылычынгы сен булгьадынг джаулагьа:
?Келигиз,- деб,- бираз ойнаб къайтырсыз!?.
Сен осият этдинг мийик таулагьа:
?Айшатыма ахыр салам айтырсыз?.

Кёкюрегинг шыбылача джашнайды,
Сёлеширге тылмачлыгьынг джетмейди.
Къолунг бла сен кёргюзюб башладынг,
Айтыр сёзюнг тамагьынгдан кетмейди.

Къурч санлада бегиген ол темир джан
Терк чыкъмайды, быллай тулпар джашладан.
Ётгюр сандан чартлаб чыкъгьан исси къан,
Тешиб ётюб кетед къаты ташладан.

Акъджал атынг кючлю тукъум эснеди,
Энди болур болгьанды деб, кишнеди.
Эсин джыйыб тюз кёзюнге къарады,
Къобалырменг деб да бираз марады.

Къобарынгдан атынг умут юзгенди,
Сен узатхан къан бусхулну къабханлай,
Къуугьун этиб Айшатынга джюзгенди,
Хасаукадан бёлюнмейин чабханлай.

Джаш санланы къан шоркъала джуугьанед,
Ууланыб ол шкогуна къатханлай,
Керек болуб быллай кюннге туугьанед,
Къобмаз джукъу аны басды джатханлай.

Къандан толгьан кийимлени барысын,
Джан бергинчи, Айшат джетиб джалагъанд.
Айталмайма сизге андан арысын,
Таш да, тау да сейирсиниб къарагъанд.

Бир ачсанг а, ариу бала, кёзюнгю,
Аладан мен, джангыз къараб тоймазма.
Айтсанг а сен, манга ахыр сёзюнгю,
Душманлагьа сени къанынгы къоймазма.

Аджал къатыш бу сёзлеге бёлюнюб,
Къандан толгъан кирпиклерин ачханды,
Дугъумлача гинжилери кёрюнюб...
Айшатыны джан тамыры чанчханды.

Бек таралыб кёзю анга къатханлай,
Джулдузланы джарыкълары тас болду.
Айшаты да биргесине джатханлай,
Кюнню бетин булут басыб, чарс болду.

Айшатынгы къамишлеча къоллары,
Бу къан дертни бир да къоймай алырла.
Бузсала да шериатны джолларын,
Экигизни бир къабыргьа салырла.

Айшат, нечик узакъ этдинг болжалны!
Ойламадынг, бу кюн келиб къаллыгьын.
Билмеймединг джигитинге ажалны
Быллай джерде, джетиб джанын аллыгьын?

Къарачайны къара къадау ташлары,
Бюгюн ала туз гыртлача эрирле.
Къабырынгда, Шейит Умар, тенглеринг,
Мыдах болуб ахыр салам берирле.

Сагьышладан башы тубан тауладан,
Шоркъа-шоркъа джыламукъла агьарла.
Артыкълыкъгьа башчы болгьан джаула да,
Мычымайын кереклерин табарла.

Ол тулпарны джаула аууб кёргенлей,
Артыкъ да бек уллу къууанч къурдула.
Джаны чыгьыб, къобалмазын билгенлей,
Кёзлеринден сюнгюлерин урдула.

Сени этингден ала бир да тоймалла,
Ачы-ачы къычыраед бирлери.
?Ол ким эди?? Таныргьа да къоймалла,
Кёзлеринги къан къатышхан терлери.

Джара къолунгу сен узатдынг таулагьа,
Ана джуртунг уллу терен ёзеннге,
Тиш къысханча сора къанлы джаулагьа,
"Джыйгьансыз, деб, бизни такъыр гёзеннге."

Мен тюлме джигитлени артлары,
Энтда сизден кёб джигитле къалырла.
Тауусулгьунчу тулпарланы артлары,
Ала сизге кёб ачыула салырла.

Абычарла, инаралла ? къанлыла,
Кечилирми бюгюн этген ишигиз?
Тулпарладан тууарла мазаллыла,
Ол кюн тюшер сизни къабан тишигиз!

Хапарынгы сени къоймай ма былай,
Ким айталыр ол кюн ишни болгьанын?
Къара къашлы, асыры кенг мангылай,
Алтмыш алты къоргьашындан толгьанын?

Сен джарлыны джазыкъсыныб терекле
Къымылдайла, къалмай бары тиллешиб.
Ачыуланыб шууулдагьан чегетле
Ма бу джырны джырладыла бирлешиб.

Сенден акъгьан бу исси къан тамчыла
Джылатырла барыб тамгьан джерлерин.
Нёгерлеринг кийиб къара джамчыла,
Къабырынгда сюртерле къан терлерин.

Сен тюлсе аскерлени артлары,
Джигит тёлю къурурукъ тюлд тауладан.
Сары гяуур бюгюн бизни дженгсе да,
Къутхарырбыз джуртну бир кюн джауладан.
 
 
 
#254
Джаратама0
05.09.2010 13:05:48
"Эртден"
Ёзденланы Альберт

Минги Тауда кюмюш бузла,къаяла
Эртденликде алтын суугъа бояла,
Кюзгюлеча кюн таякъла ашыра,
Къарагъан да къамаб, кзюн джашыра.

Хей,джарыкъ кюн,бир тынгыла сен меннге,
Хар адам да къууанырча эртденнге,
Къучагъынгы хаман рахат джерге кер,
Джылыуунгдан джюреклеге джылыу бер!

Салкъын аяз тарайд гелеу сыртланы,
Кюн таякъла къармайдыла чатланы,
Къанатлыла тёге джюрек сырларын,
Къаяла да къайтаралла джырларын.

Хей,джарыкъ кюн,бир тынгыла сен меннге,
Хар адам да къууанырча эртденнге,
Къучагъынгы хаман рахат джерге кер,
Джылыуунгдан джюреклеге джылыу бер!

Нарт таурухла тюшедиле эсиме,
Сюелеме,ийнаналмай кесиме.
Таурухладан бюгюнлюкге къайтама,
Кюннге къараб алгъыш тилек айтама:

Хей,джарыкъ кюн,бир тынгыла сен меннге,
Хар адам да къууанырча эртденнге,
Къучагъынгы хаман рахат джерге кер,
Джылыуунгдан джюреклеге джылыу бер!
1975дж.
 
 
 
#255
Джаратама0
05.09.2010 17:23:12
ЁЗДЕНЛАНЫ САПАР

КЪЫЛ КЪОБУЗНУ ГЫЛ КЪОБУЗ ЭТГЕННГЕ

Къыл къобузунгу гыл къобуз этдинг сен...

Сокъурансанг да,
Ёлтюрген заманынгы артха къайтаралмазса,
Сатылгъан, джоюлгъан фахмунгу
Энди бетин чыгьаралмазса,
Джыйгъан байлыгьынгы уа ?
Джыргъа, назмугъа, макъамгъа буралмазса:
Къаядан тюл, джашаудан тюл,
Поэзиядан, Поэзиядан кетдинг сен.

Хоу,
Къыл къобузну гыл къобуз этиб къойдунг сен.
Фахму кьудретинги, ёзден бетинги джойдунг сен.
Къыл къобузну къул къобуз этдинг сен,
Иймандан чыкъдынг? Поэзиядан кетдинг сен.

Ай медет а...
Джети къат кёкден кетдинг ?
Аллах берген фахму бла
Ибилисге къуллукъ этдинг.

Хей,
Кюн къобузну кюл этген джарлы,
Джандетин джаханим этген джарлы,
Кимден да бек кесинг кюе болурса...
Бу Джырымы джылай джаздым, окъурса.
 
 
 
#256
Джаратама0
05.09.2010 17:29:32
ЁЗДЕНЛАНЫ САПАР

ХХХ

Къарт атамы атасыны
Белляуун эшитирге Хурзукга
Мен келгенме, ма къарайма
Сейирсиниб сейир джуртуна.

Тауланы башлары,
Хурзукну къартлары
Бир кёб затны салалла эсге.
Сылайма бетими,
Къысама кесими
Къарт атамы ёсдюрген джерге.

Миийк кёкге тиреу болуб
Агъаралла къыблада таула.
Къобан суу да келед кём-кёк,
Хыралдаб, баргъан кибик джаугъа.

Кетгенле заманла.
Ёлгенле адамла.
Биягъынлай а турад Хурзук.
Кюнню джарыгъы да,
Айны джарыгъы да
Этмейди бу нарт джуртха джутлукъ.

Тау ёзенде, бек мийикде,
Орналыбды аккамы эли.
Аман кюнле узакъдалла,
Кёрюнмейди насыбны чеги.

Халкъымы джазыуу,
Аккамы белляуу ?
Бары да тууралла джюрекге.
Къууанчлы болсам да,
Бетими джабсам да,
Джыламукъ келеди кёзлеге.
 
 
 
#257
Джаратама0
07.09.2010 05:29:38
ЁЗДЕНЛАНЫ САПАР

ХХХ

Тюнюмде мен къышда,
Сагъышда уа джазда
Кёзлерими къаты къысыб, къымсызма.
Бир шошд тёгерек,
Ма алайды джюрек ?
Мени излеген, бир тёз кесек, къычырма.

Ма тюшгенд эсиме
Джашил джаз бла бирге
Алгъынлада манга сыйлы бир Адам.
Ма келеди чабыб,
Мёлеклей ышарыб,
Ариулугъу ариу болгъан тангладан.

Ма джетди къатыма,
Къысылды къойнума
Къучакълайды, мен джарлы, къымсызма.
Бир шошд тёгерек,
Ма алайды джюрек ?
Мени излеген, бир тёз кесек, къычырма.

Тюнюмде мен къышда,
Сагъышда уа джазда ?
Кёзлерими къаты къысыб къымсызма.
Бир шошд тёгерек,
Ма алайды джюрек ?
Мени излеген, бир кесек тёз, къычырма.
 
 
 
#258
Джаратама0
07.09.2010 16:19:59
На свидание к ней ходил,
Она - страшный крокодил.
Хорошо что вышла за другого...
 
 
 
#259
Джаратама0
07.09.2010 17:22:23
САПАР ЁЗДЕН

ХХХ

- Кече узуну джанад чыракъ, нек джатмайса?
Кеч тураса, кюн башладан джылтырай.
Къыйынлыгъынг ? ол не затды, нек айтмайса?
- Джукъум кёбдю, ёлюб кетсем, Къарачай.

- Къар тюбюнде сен, сын болуб, нек тураса,
Тели джашча, кеси аллынга шыбырдай?
Къучагъынгы акъгъан къаргъа нек бураса?
- Къарны кёрмем, ёлюб кетсем, Къарачай.

- Таула таба хар кюн сайын нек бараса?
Хар кьайда да бирча эсе Кюн бла Ай.
Азаулагъа алай къараб не табаса?
- Таула кёрмем, ёлюб кетсем, Къарачай.

- Тюрлю зат бла макъам айтыб не этесе,
Безгеклича, санларынг да джызылдай.
Ай джарыкъдан не аласа, не бересе?
- Джыр эталмам, ёлюб кетсем, Къарачай.

- Тёзюм табмай къолларынгы нек ууаса,
Терге тюшюб, бир бош джерде мангылай.,
Къарт адам бла ушакъ этиб нек тураса?
- Къартла кёрмем, ёлюб кетсем, Къарачай.

- Ёлмез кюннге алай джити нек къарайса?
Айыб болур, къарамачы сен алай.
Джерни юсюн сен, джел болуб, нек тарайса?
- Джашау кёрмем, ёлюб кетсем, Къарачай.

- Тобукъланыб ташлы джерни нек сылайса,
Тура эсе, ол бирчалай, алайлай?
Манга къараб, джыламукъ бла нек джырлайса?
- Сени кёрмем, ёлюб кетсем, Къарачай.
 
 
 
#260
Джаратама0
07.09.2010 20:17:28
shanson ne poiut tut?
 
 
 
#261
Джаратама0
08.09.2010 22:17:42
http://www.youtube.com/watch?v=Kae4tOx7jMI
 
 
 
#262
Джаратама0
12.09.2010 13:39:27
http://www.youtube.com/watch?v=ysQTvICVikQ&feature =related
http://www.youtube.com/watch?v=OUuDb41Yh8s
 
 
 
#263
Джаратама0
13.09.2010 22:14:00
АДАМЛАГЪА АЛГЪЫШ ТИЛЕКЛЕ
Ёзденланы Альберт

Бир сейирд бу ёмюр, бу джомакълы ёмюр!
Джашауну атламын къарау сокъур кёрюр.
Алай а джюрекден джол къыйынд джюрекге,
Джер ушайд кюкюртге,джут адам -сернекге.
Джокъду джерде тынчлыкъ, адамла ашыгъыш
Къайры барадыла,болмагъанча таныш?

Ашарыкъдан толу тепсини джанына
Олтургъан адамла чырт ач болмасынла!
Сёз нёгер табылмай, хар ким да башына
Къалыб,ол ачлыкъны чырт сынамасынла!
Джерни сабийлери. дуния мал амалтын
Тас этмегиз Джерден адамлыкъны шартын!

Джерни уланлары, уллу кёллю болсакъ,
Джашауну чегинде сюелмесек биз сакъ,
Къоркъуулуд бу ёмюр, ачылса къазауат,
Джер болур кюл-кёмюр, тас болур адам ат!
Дайымлы джашаргъа адамда амал бард,-
Сакъла рахатлыкъны гитче,уллу эм къарт!

1975дж.
 
 
 
#264
Джаратама0
14.09.2010 00:34:58
Сапар ЁЗДЕН

ХХХ

Къыш келди, улуйду джел, джауады къар,
Тюб-тюз болгъанды кюртден толуб арыкъ.
Ёзенибиз кёрюнсе да бир да бир тар,
Анам, терезенгден урады джарыкъ.

Тюненеги Ай, тас болгъанды, джокъду,
Аджашхан болур бу боранда джазыкъ.
Ай кёрюнмесе да, джюрек а токъду.
Анам, терезенгден урады джарыкъ.

Къайын чегет да илинмейди кёзге,
Къоркъама, бузлаб къалыр да деб наныкъ.
Этсин къыш оноуун джерге бла кёкге,
Анам, терезенгден урады джарыкъ.

Бусакъ бутакъла тёзалмайдыла джелге,
Чыкъырдайдыла, эшитеме мен ачыкъ.
Насыблыма бюгюн да, къар келсе да белге,-
Анам, терезенгден урады джарыкъ.

Булгъаныбды хауа - къатышды тёгерек.
Шошма, бир къыз да этгенди мени артыкъ
Минг ёлсюн джюрегим кьыздан ёнгелеб,
Анам, терезенгден урады джарыкъ.
 
 
 
#265
Джаратама0
17.09.2010 05:08:15
Сапар ЁЗДЕН


БОРАН АЙТАДЫ ДЖЫРЫН

Айтады джангы джыр боран,
Мыдахды аны макъамы.
Келсе эди бюгюн къолдан,
Айтыр эдим мен да джырны.

Айтыр эдим мен да джырны,
Булгьай башымы акъырын.
Сюеме деб мен бир къызны,
Андад деб къуру акъылым.

Андад да бютеу акъылым,
Айырмайма от бла бузну.
Бир чалды мени сагъышым,
Алгъанды да ол онгуму.

Алгъанды да ол онгуму,
Алгъанды джанны тынчлыгъын.
Кёралмайма мен джолуму,
Болубма мен сын ташча, сын.

Болубма мен сын ташча сын,
Тууады сагъыш сагъышдан.
Боран а, айтады джырын,
Къозгъай богъанны джангыдан.
 
 
 
#266
Джаратама0
18.09.2010 02:30:31
"Джангур"
Ёзденланы Альберт

Юч кюн озду,сабыр болмай джауаса,
Тохтамазгъа, бир айт, антмы этгенсе?!
Къараджелин булутланы сауаса,
Хар ёсюмню джик-джигине джетгенсе.

Тойгъанлары богъурдакъгъа джетгенди,
Бир кесекге,джангур,сабыр бол энди!
Джазгъы джерни ал къууанчы кетгенди,
Тунчугъургъа башлагъанды ол энди.

Ауазынг бир ачы кюуге ушайды,
Джыламукъгъа ушайд хар бир тамчынг да.
Къутсузлугъунг ийнамымы ашайды,
Къутхарырмы андан темир джамчы да?!

Озгъанлагъа этдирелле къуджур той,
Сени балчыкъ кёлчюклеринг.Тохта,сын!
Джашаудан да эригебиз, сенден къой,
Ол да билмей башлагъанды маардасын!
1975дж

"Толгъан мурат"
Ёзденланы Альберт

Бир терекни тамыры бла къазыб алыб,
Къач сууукъда орнатдыла къутсуз джерге.
Тамырланды терек ахыр кючюн салыб,
Джерин кюсеб, бушуу этед, къараб ёрге.

Бел къатдырыб къачхы джелде, къыш боранда,
Бёлек чапракъ юзюлмеди ол терекден,
Кёб къыйынлыкъ кёрселе да ахырында
Сейир джылыу сезгендиле джазгъы кюнден.

Юзюлдюле джазгъы джелчик ургъанында,
(Насыблыды ёлген джан да джазгъа тюбеб)
Агъа барыб,ёрге къараб къууандыла,
Терегибиз чагъыб келед къуу болмай-деб.
1979дж
 
 
 
#267
Джаратама0
18.09.2010 03:57:01
Сапар ЁЗДЕН

ХХХ

Мен билеме, чакъгъандыла алай анда
Терегими бутакълары къурмачлай.
Сюелеме мен а мында - шимал къарда,
Сагъышыма къонакъ болуб Къарачай.

Анам, меннге, айыб этме, сансызса деб,
Унутдунг деб, терегинги ёсюмюн.
Бек къыйналма, кеме тюлсе, къайыкъса деб,
Чыкъмадынг деб, макъа кёлден ёмюрюнг.

Узакъдыла, белляу кибик, макъа кёлле,
Къобанла да къалгъандыла артымда.
Бусагъатда мен барама бир тенгизде ?
Джашау дейле, ол тенгизни атына.

Азмы чагъар энтда менсиз алма терек,
Азмы тёгер мени сакълай чапрагъын.
Болгъанлыкъгъа муратымдан мен гитчерек,
Кёрмей къоймам ол тенгизни аягъын.

Мен билеме, сакълайдыла зугул тангла,
Ингирле да боллукъдула къысыкъкёз.
Быргъарыкъла, ары-бери, тер толкъунла,
Кёзюуледе тюрлю болур меннге кёк.

Сен къыйналма, учсузду деб, Джашау тенгиз,
Сагъышланы чакъыр кесек себеблеб.
Андан эсе джелпегиме джел тиле да,
Ол чакъгъанны джашымса деб, эркелет.
 
 
 
#268
Джаратама0
20.09.2010 23:10:40
Сапар ЁЗДЕН

ХХХ

Кёб турмайын сен келликсе Джангы джыл бла,
Къара чачда акъ къарчыкъла джылтырай.
Ызынгдан да, ол сен салгъан джангы ыз бла,
Келлик болур ?Алгъыш? джырым, зынгырдай.

Ай, ма сора, сеннге тюбеб мен ышарсам,
Мыдахлыгъын джюрек кенгнге ашырыр.
Къучакъламай, адам бард деб, сен уялсанг,
Насыб джауум къалын джаууб, джашырыр.

Джаякъларынг джаякълагъа туура болуб,
Солууунг да, солуу болуб джаныма,
Къычырырма къарлы кёкге къолла созуб,
Тюбедим деб, ой акъ къарым, антыма.

Мен акъ къардан бешик этиб тобукълансам,
Къыйналмазса, къалабыз деб бедишге.
Мен айтырма, белляу айт деб, эски джарам,
Салама деб джангы джырны бешикге.

Сёзюм джокъду, ким болса да, кёрген болса,
Джазыкъла деб, башын силке ышарыр.
Гитче джырчыкъ уллу болуб бир деу болса,
Къар бешигин кёргенме деб махтаныр.

Джангы джылгъа тюбеб къалсам кесим джанъыз
Сенсизликден кёрюнсе да къыш къара,
Ийнанама, боллукъ тюлдю джашау дамсыз,
Къар бешикле саллыкъдыла башхала.

Кёб турмайын, сен келликсе, Джангы джыл бла,
Кьара чачда акъ къарчыкъла джылтырай.
Ызынгдан да, ол сен салгъан джангы ыз бла,
Келлик болур ?Алгъыш? джырым, зынгырдай.
 
 
 
#269
Джаратама0
24.09.2010 04:21:12
Сапар ЁЗДЕН

ХХХ

Сабыр-сабыр себед къарын сууукъ къышым:
Къара джерни боягъанды чыммакъ акъ.
Кетеди деб, башха джашха сюйген къызым,
Чанчад сагъыш джюрегиме чыгъанакъ.

Сабыр-сабыр себед къарын сууукъ къышым:
Къаялагьа, сыртлыкълагъа, джарлагьа.
Бергенликге тёзмез саугъа, сюйген къызым,
Ант этеме, тюберикме джазлагъа.

Сабыр-сабыр, себед къарын сууукъ къышым:
Илиндиред къарчыкъланы бетиме.
Агъарса да, дуния кибик, мени тышым,
Патчах болгъанд къара бушуу ичиме.

Сабыр-сабыр себед къарын сууукъ къышым:
Кючю кёбдю, эте беред оноуун.
Болсун джолунг, бек джумушакъ, сюйген къызым,
Худжу къалмаз, сени ючюн, отоуум.
 
 
 
#270
Джаратама0
25.09.2010 01:41:47
[youtube=http://r.mail.ru/cln6446/video.mail.ru/in box/kavkaz_gerl/8/2.html]
 
 
 
#271
Джаратама0
25.09.2010 02:01:38
"Мен сюймейме..."
Ёзденланы Альберт
"Я не люблю..."
В.Высоцкий

Мен сюймейме,къоллукъну
Мор иннет бла кийгенни.
Мен сюймейме боллукъну
Хаман алгъа билгенни.

Мен сюймейме джууабы
Табылмазлыкъ джомакъны!
Мен сюймейме халкъыма
Тёре боллукъ къонакъны!

Мен сюймейме хар джурха
Джуртумду!-деб айтханны,
Мен сюймейме манкъуртха
Саугъаланы такъгъанны!

Мен сюймейме бабасы
Этген юйню ойгъанны,
Кеси ючюн баласын
Ёксюз этиб къойгъанны!

Мен сюймейме мушулдаб,
Терлеб ашагъанланы,
Халкъгъа келген бушуудан
Кери джашагъанланы!

Мен сюймейме патчахха
Аккылсыз ийнаннганны!
Мен сюймейме Аллахха,
Джокъду,деген инсанны!

1984дж
 
 
 
#272
Джаратама0
25.09.2010 03:10:06
Сапар ЁЗДЕН

ХХХ

Къозгъама мени джанымы,
Тийме, кесек джукъласын.
Сойгъанды джашау джарлыны,
Бузгъанды аны дуниясын.

Анга сен кёлтюрме ауаз,
Менден да безибди ма ол.
Билмейсе сен, бу кетген джаз
Менича болгъанды мухол.

Джарашмай иги не аман,
Чюйреди мени оноуум.
Этгенди нени да харам,
Тюрмеди анга отоуум.

Болурму эски джан джангы,
Джукълаб уянса кесекден.
Ма бу затха къорду ангы,
Тилек да ма ол кёкледен.

Сойгъанды джашау, джарлыны,
Бузгъанды аны дуниясын.
Къозгъама мени джанымы,
Тийме, кесек джукъласын.
 
 
 
#273
Джаратама0
25.09.2010 03:27:57
"Биринчи тюбешиу"
("Къара суучукъ" деген джыргъа джууаб)
Ёзденланы Альберт

Джолоучулукъда бек суусаб болуб,
Къара суучукъгъа къайтханем,
Суу алыб келген бир къызны кёрюб:
"Суу ичирсенг"-деб айтханем.

Ууакъ ышарыб,айча джарытыб,
Къошунун берди къолума,
Сууундан ичиб, кёб алгъыш этиб,
Атландым узакъ джолума.

уялтама деб,тау намыс этиб,
Сормай атын да терк кетдим.
Ичген сууум бла сюймеклик сингиб,
Таулагъа къараб ант этдим:

Къайда болсам да,сени табарма,
Къаршчы чыкъса да джазыуум!
Шагърей джолчукъ бла къайтыб барырма...
Сакъла сен, мени ариуум.
1976дж
 
 
 
#274
Джаратама0
25.09.2010 04:39:39
Сапар ЁЗДЕН

ХХХ

Урады аяз джелкемден,
Урады джангур башымдан.
Болубма тангдан мен кенгде,
Ингир ышарад аллымдан.

Ингир ышарад аллымдан,
Келгенча, алыб ма сени.
Сагъыш башланад джангыдан,
Къойса эди тынч ол мени.

Къойса эди тынч ол мени,
Арыбды мыйы сагъышдан.
Сагъыш, ой джыгъад кёблени,
Этеди, этед джанынгдан

Этеди, этед джанынгдан,
Сен табмайса чыртда орун.
Безиб кечеден, джарыкъдан,
Асар зат излейди къолунг.

Асар зат излейди кьолунг.
Алай а, тыяды бир зат.
Къабыр ичи тюлдю къошунг,
Хар не да анда джукъудад.

Хар не да анда джукъудад,
Сюзесе сен барын ачыкъ.
Алай бла, джангы кюч тууад,
Тебрейсе джашнаб сен азчыкъ.

Тебрейсе джашнаб сен азчыкъ,
Джангур тюб болады юйюнг.
Сыртдан да ура аязчыкъ,
Кетеди ма энтда кюнюнг.
 
 
 
#275
Джаратама0
25.09.2010 19:05:00
"Джашауну джоругъу"
Ёзденланы Альберт

Кечеги тойда сюйген къызынг бла
Тепсегенинги абезек
Экинчи кюнде эсге салгъанчад,
Джашлыкъны эсге тюшюрсек.

Джюз-минг бояулу джайгъы заманны
Ашыра,кюзге кирдик биз.
Кёгетден зырма бутакъча,сабыр
Бюгюле барад белибиз.

Кесибиз къачда,эсибиз джазда,
Джууукълашыб биз къышха.
Чыммакъ сакъаллы бир къартла болуб,
Джеталырбызмы ныгъышха?

Ныгъышха бара, арбазгъа къайта,
Озарла тангла, ашхамла.
Бир кюн къар эрир, джашлыкъны джазын
Бизсиз кёрюрле башхала.
 
 
 
Страницы: Пред. 1 ... 9 10 11 12 13 14 След.
Читают тему (гостей: 2)

 

Написать нам

Фонд «Содействие развитию карачаево-балкарской молодежи «Эльбрусоид»

© 2003-2026 Elbrusoid.org  |  Все права защищены Законами Гор.